ಹೊಸದಿಲ್ಲಿ: ಉದ್ಯೋಗ ಕಡಿತದ ಭೀತಿ ಮತ್ತು ಕಂಪನಿಯ ಆದಾಯ ಕುಸಿತದ ದುರ್ಬಲ ಆದಾಯದ ಮುನ್ಸೂಚನೆ ನಡುವೆಯೂ ಉದ್ಯೋಗಿಗಳಿಗೆ ಟಾಟಾ ಕನ್ಸಲ್ಟೆನ್ಸಿ ಸವೀರ್ಸಸ್(ಟಿಸಿಎಸ್) ಸಂತೋಷದ ಸುದ್ದಿ ನೀಡಿದೆ. ಅಂದರೆ, ತನ್ನ ಎಲ್ಲ ಉದ್ಯೋಗಿಗಳಿಗೆ ಕಂಪನಿಯು ಶೇ.100ರಷ್ಟು ಟಾರ್ಗೆಟ್ ವೇರಿಯಬಲ್ ಪೇ(ಟಿವಿಪಿ) ಅನ್ನು ಪ್ರಕಟಿಸಿದೆ.
ಉದ್ಯೋಗಿಗಳಿಗೆ ಟಿಸಿಎಸ್ ಎಚ್ಆರ್ ಈ ಸಂಬಂಧ ಇಮೇಲ್ ಕಳಿಸಿದ್ದು, ಟಿವಿಪಿಯನ್ನು ಘೋಷಿಸಿದೆ. ”ಇದೊಂದು ಅಪರೂಪ ಮತ್ತು ಅನಿರೀಕ್ಷಿತ ಬೆಳವಣಿಗೆ,” ಎಂದು ಉದ್ಯೋಗಿಯೊಬ್ಬರು ಪ್ರತಿಕ್ರಿಯಿಸಿದ್ದಾರೆ.
”ಬಿಸಿನೆಸ್ ಘಟಕಗಳು, ವೈಯಕ್ತಿಕವಾಗಿ ಉದ್ಯೋಗಿಗಳು ಮತ್ತು ಇಡೀ ಕಂಪನಿಯ ಕಾರ್ಯಕ್ಷಮತೆಯನ್ನು ಆಧರಿಸಿ ಟಿವಿಪಿ ನೀಡಲಾಗುತ್ತದೆ. ಮೂರನೇ ತ್ರೈಮಾಸಿಕದಲ್ಲಿ ಉದ್ಯೋಗಿಗಳ ಕಾರ್ಯಕ್ಷಮತೆ ಉತ್ತಮವಾಗಿದೆ,” ಎಂದು ಟಿಸಿಎಸ್ನ ಜಾಗತಿಕ ಎಚ್ಆರ್ ವಿಭಾಗದ ಮುಖ್ಯಸ್ಥ ಅಜೋಯೇಂದ್ರ ಮುಖರ್ಜಿ ಹೇಳಿದ್ದಾರೆ.
ಐಟಿ ವಲಯದ ಬಹುತೇಕ ಗ್ರಾಹಕರು ಸಾಂಪ್ರದಾಯಿಕ ಸೇವೆಗಳಿಂದ ಡಿಜಿಟಲ್ ವೇದಿಕೆಗೆ ವರ್ಗವಾಗಿದ್ದು, ಆಟೋಮೇಷನ್ನತ್ತ ಕಂಪನಿಗಳು ಒಲವು ತೋರಿವೆ.
Comments are closed.