ಅಕ್ರಮ ಸಂಬಂಧ: ಪೋರ್ನ್‌ ಸ್ಟಾರ್‌ಗೆ ಅಮೆರಿಕ ಅಧ್ಯಕ್ಷರಿಂದ ಹಣ

ವಾಷಿಂಗ್ಟನ್‌: ಸದಾ ಒಂದಿಲ್ಲೊಂದು ಕಾರಣದಿಂದ ಸುದ್ದಿಯಾಗುವ ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಇದೀಗ ನೀಲಿ ತಾರೆಯೊಬ್ಬರ ಜತೆ ಅಕ್ರಮ ಸಂಬಂಧದ ವಿವಾದಕ್ಕೆ ಸಿಲುಕಿದ್ದಾರೆ.

ಡೊನಾಲ್ಡ… ಟ್ರಂಪ್‌ ಅವರೊಂದಿಗಿನ ಸಂಬಂಧದ ಬಗ್ಗೆ ಸಾರ್ವಜನಿಕವಾಗಿ ಬಾಯಿ ಬಿಡದಿರಲು ಪೋರ್ನ್‌ ಸ್ಟಾರ್‌ ಸ್ಟೆಫನಿ ಕ್ಲಿಫರ್ಡ್‌ ಅವರಿಗೆ ಅಧ್ಯಕ್ಷೀಯ ಚುನಾವಣೆ ಸಂದರ್ಭದಲ್ಲಿ 1,30,000 ಡಾಲರ್‌ (ಸುಮಾರು 8.3 ಲಕ್ಷ ರೂ.) ನೀಡಲಾಗಿತ್ತು ಎಂದು ‘ವಾಲ್‌ಸ್ಟ್ರೀಟ್‌ ಜರ್ನಲ್‌’ ವರದಿ ಮಾಡಿದೆ.

ಚಿತ್ರಗಳಲ್ಲಿ ‘ಸ್ಟಾರ್ಮಿ ಡೆನಿಲ್ಸ್‌’ ಹೆಸರಿನಲ್ಲಿ ಕಾಣಿಸಿಕೊಳ್ಳುವ ಈ ನಟಿಗೆ ಟ್ರಂಪ್‌ ಅವರ ವಕೀಲರಾದ ಮೈಕೆಲ್‌ ಕೊಹೆನ್‌ 2016ರ ಅಮೆರಿಕಾ ಅಧ್ಯಕ್ಷೀಯ ಚುನಾವಣೆಯ ನಡೆಯುವ ಕೆಲವೇ ವಾರಗಳ ಮುನ್ನ 1,30,000 ಡಾಲರ್‌ ನೀಡಿದ್ದರು. ನಟಿಯು ‘ಎಬಿಸಿ ನ್ಯೂಸ್‌’ ಸುದ್ದಿ ವಾಹಿನಿಯ ವರದಿಯೊಂದರಲ್ಲಿ ಟ್ರಂಪ್‌ ಜತೆಗಿನ ಸಂಬಂಧದ ಬಗ್ಗೆ ಮಾಹಿತಿ ನೀಡಲು ಮುಂದಾಗಿದ್ದರು. ಜತೆಗೆ, ‘ಸ್ಲೇಟ್‌’ ಹೆಸರಿನ ಆನ್‌ಲೈನ್‌ ನಿಯತಕಾಲಿಕೆಗೂ ಟ್ರಂಪ್‌ ಜತೆಗಿನ ಸಂಬಂಧದ ಬಗ್ಗೆ ಸುದ್ದಿ ನೀಡುವುದಾಗಿ ಹೇಳಿದ್ದರು. ಇದನ್ನು ತಡೆಯುವ ಉದ್ದೇಶದಿಂದ ಡೀಲ್‌ ಕುದುರಿಸಿ ಈ ಹಣವನ್ನು ನೀಡಲಾಗಿತ್ತು. ಲಾಸ್‌ ಏಂಜಲೀಸ್‌ನ ‘ಸಿಟಿ ನ್ಯಾಷನಲ್‌ ಬ್ಯಾಂಕ್‌’ ಮೂಲಕ ಹಣ ಸಂದಾಯವಾಗಿತ್ತು. ನಟಿಯ ವಕೀಲ ಕೀತ್‌ ಡೇವಿಡ್‌ಸನ್‌ ಈ ಒಪ್ಪಂದದ ಮಧ್ಯಸ್ಥಿಕೆ ವಹಿಸಿದ್ದರು ಎಂದು ವರದಿಯಲ್ಲಿ ತಿಳಿಸಲಾಗಿದೆ.

2006ರಲ್ಲಿ ಕ್ಯಾಲಿಫೋರ್ನಿಯಾದ ‘ಲೇಕ್‌ ತಾಹೊ’ ಸೆಲೆಬ್ರಿಟಿ ಗಾಲ್ಫ್‌ ಟೂರ್ನಮೆಂಟ್‌ನಲ್ಲಿ ಮೊದಲ ಬಾರಿ ಸ್ಟೆಫನಿ ಕ್ಲಿಫರ್ಡ್‌ ಮತ್ತು ಟ್ರಂಪ್‌ ಭೇಟಿಯಾಗಿದ್ದರು. ನಂತರ ಇವರಿಬ್ಬರ ನಡುವೆ ಸಂಬಂಧ ಬೆಳೆದಿತ್ತು. ಈ ಸಂಬಂಧ ಕುದುರುವ ಒಂದು ವರ್ಷದ ಮೊದಲಷ್ಟೇ ಟ್ರಂಪ್‌ ಅವರು ಮೆಲನಿಯಾ ಅವರನ್ನು ಮೂರನೇ ಪತ್ನಿಯಾಗಿ ವರಿಸಿದ್ದರು.

ವರದಿ ನಿರಾಕರಿಸಿದ ಶ್ವೇತ ಭವನ: ‘ವಾಲ್‌ಸ್ಟ್ರೀಟ್‌ ಜರ್ನಲ್‌’ ವರದಿಯನ್ನು ಆಧಾರರಹಿತ ಎಂದು ಶ್ವೇತಭವನ ತಳ್ಳಿಹಾಕಿದೆ. ”ಈ ರೀತಿಯ ವದಂತಿಗಳು 2011ರಿಂದಲೇ ಕೇಳಿಬರುತ್ತಿವೆ. ಪತ್ರಿಕೆಯ ಸುದ್ದಿ ಸಂಪೂರ್ಣ ಸುಳ್ಳು. ಟ್ರಂಪ್‌ ಕೂಡ ವದಂತಿಯ ಬಗ್ಗೆ ಸ್ಪಷ್ಟನೆಯನ್ನು ನೀಡಿದ್ದಾರೆ,” ಎಂದು ಶ್ವೇತ ಭವನದ ಅಧಿಕಾರಿಗಳು ಹೇಳಿದ್ದಾರೆ.