ಉಗ್ರರ ದಾಳಿಗೆ ನಾಲ್ವರು ಪೊಲೀಸರ ಹತ್ಯೆ

ಶ್ರೀನಗರ: ದಕ್ಷಿಣ ಕಾಶ್ಮೀರದ ಸೊಪೋರ್‌ ಪಟ್ಟಣದಲ್ಲಿ ಪಾಕ್‌ ಪೋಷಿತ ಉಗ್ರರು ಸಂಘಟಿಸಿದ ಬಾಂಬ್‌ ಸ್ಫೋಟದಲ್ಲಿ ಗಸ್ತುಪಡೆಯ ನಾಲ್ವರು ಪೊಲೀಸರು ಹುತಾತ್ಮರಾಗಿದ್ದಾರೆ.

ಮಾರುಕಟ್ಟೆ ಪ್ರದೇಶದ ಅಂಗಡಿಯೊಂದರ ಬಳಿ ಉಗ್ರರು ಈ ಬಾಂಬ್‌ ಇಟ್ಟಿದ್ದು, ಶನಿವಾರ 10 ಗಂಟೆ ವೇಳೆಗೆ ಅದು ಸ್ಫೋಟಿಸಿ ಸ್ಥಳದಲ್ಲಿದ್ದ ಪೊಲೀಸರ ಪೈಕಿ ಆರು ಮಂದಿ ಗಾಯಗೊಂಡರು. ಅವರಲ್ಲಿ ನಾಲ್ವರು ಮೃತಪಟ್ಟರು. ಹಲವು ಅಂಗಡಿಗಳು ಜಖಂಗೊಂಡಿದ್ದು, ಹಲವು ನಾಗರಿಕರಿಗೂ ಗಾಯಗಳಾಗಿವೆ.

ಜೈಶೆ ಕೈವಾಡ: ಪಾಕ್‌ ಮೂಲದ ಜೈಷೆ ಮೊಹಮ್ಮದ್‌ ಸಂಘಟನೆ ಈ ಕೃತ್ಯದ ಹೊಣೆಯನ್ನು ಹೊತ್ತುಕೊಂಡಿದ್ದು, ಸತ್ಯಾಸತ್ಯತೆಯನ್ನು ಪರಿಶೀಲಿಸಬೇಕಾಗಿದೆ.

2 ವರ್ಷದ ಬಳಿಕ ಐಇಡಿ ಬಳಕೆ

ಸುಧಾರಿತ ಸ್ಫೋಟಕ ಸಾಧನವನ್ನು ಬಳಸಿ ಈ ಸ್ಫೋಟವನ್ನು ಸಂಘಟಿಸಲಾಗಿದ್ದು ಕಾಶ್ಮೀರದಲ್ಲಿ 2015ರಲ್ಲಿ ಕೊನೆಯ ಬಾರಿಗೆ ಐಇಡಿ ಬಳಸಲಾಗಿತ್ತು.