ಇಸ್ಲಾಮಾಬಾದ್: ಭಯೋತ್ಪಾದಕ ಹಫೀಜ್ ಸಯೀದ್ಗೆ ಸೇರಿದ ಎಲ್ಲಾ ಸೇವಾಸಂಸ್ಥೆಗಳು ಮತ್ತು ಆರ್ಥಿಕ ಸ್ವತ್ತುಗಳನ್ನು ಸಂಪೂರ್ಣ ತನ್ನ ನಿಯಂತ್ರಣಕ್ಕೆ ತೆಗೆದುಕೊಳ್ಳಲು ಪಾಕಿಸ್ತಾನ ಸರಕಾರ ಯೋಚಿಸಿದೆ ಎಂದು ರಾಯ್ಟರ್ಸ್ ಸುದ್ದಿಸಂಸ್ಥೆ ವರದಿ ಮಾಡಿದೆ.
ಉಗ್ರ ಸಂಘಟನೆಗಳನ್ನು ಹತ್ತಿಕ್ಕುವ ಕಾರ್ಯತಂತ್ರವನ್ನು ಪಾಕಿಸ್ತಾನ ಸರಕಾರದ ನಾನಾ ಇಲಾಖೆಗಳು ಹಾಗೂ ಪ್ರಾಂತೀಯ ಸರಕಾರಗಳು ಡಿಸೆಂಬರ್ 19ರಂದು ‘ರಹಸ್ಯ ಸಭೆ’ಯಲ್ಲಿ ಚರ್ಚಿಸಿವೆ ಎಂದು ಸಭೆಗೆ ಹಾಜರಾಗಿದ್ದ ಅಧಿಕಾರಿಯೊಬ್ಬರು ತಿಳಿಸಿದರು.
ಸಯೀದ್ ಸೊತ್ತುಗಳನ್ನು ಮುಟ್ಟುಗೋಲು ಹಾಕಿಕೊಳ್ಳುವ ಸಂಬಂಧ ‘ಅತ್ಯಂತ ರಹಸ್ಯ’ ಎಂದು ಗುರುತಿಸಲಾದ ದಾಖಲೆಯೊಂದನ್ನು ಹಣಕಾಸು ಇಲಾಖೆ ಸಿದ್ಧಪಡಿಸಿದ್ದು, ಕಾನೂನು ಜಾರಿ ಇಲಾಖೆ ಹಾಗೂ ಐದು ಪ್ರಾಂತೀಯ ಸರಕಾರಗಳಿಗೆ ನಿರ್ದೇಶನಗಳನ್ನು ಕಳುಹಿಸಿದೆ.
ಸಯೀದ್ನ ಎರಡು ಸೇವಾಸಂಸ್ಥೆಗಳಾದ ಜಮಾತ್-ಉದ್-ದಾವಾ (ಜೆಯುಡಿ) ಮತ್ತು ಫಲಾಹ್-ಇ-ಇನ್ಸಾನಿಯತ್ ಸಂಘಟನೆಗಳ ಎಲ್ಲ ಆಸ್ತಿಗಳನ್ನು ಸ್ವಾಧೀನಪಡಿಸಿಕೊಳ್ಳಲು ಡಿಸೆಂಬರ್ 28ರಂದು ಪಾಕ್ ಸರಕಾರ ಆದೇಶಿಸಿದೆ.
ಸಯೀದ್ನ ಎಲ್ಲ ಸಂಘಟನೆಗಳನ್ನು ಭಯೋತ್ಪಾದಕ ಸಂಘಟನೆಗಳೆಂದು ಅಮೆರಿಕ ಘೋಷಿಸಿದ್ದು, 26/11ರ ಮುಂಬಯಿ ದಾಳಿಯ ಸಂಚುಕೋರ ಸಯೀದ್ನ ತಲೆಗೆ 1 ಕೋಟಿ ಡಾಲರ್ ಬಹುಮಾನ ಪ್ರಕಟಿಸಿದೆ.
Comments are closed.