ಬಾಲಸೋರ್ (ಒಡಿಶಾ): ಸ್ವದೇಶಿ ತಂತ್ರಜ್ಞಾನವನ್ನು ಉಪಯೋಗಿಸಿಕೊಂಡು ನೆಲದಿಂದ ಆಕಾಶದ ಗುರಿಗಳನ್ನು ತಲುಪಬಲ್ಲ ಆಕಾಶ್ ಕ್ಷಿಪಣಿಯನ್ನು ಗುರುವಾರ ಯಶಸ್ವಿಯಾಗಿ ಪರೀಕ್ಷಿಸಲಾಯಿತು.
ವಾಯುಪಡೆಯು ಒಡಿಶಾದ ಬಾಲಸೋರ್ ಬಳಿಯ ಚಂಡಿಪುರದಲ್ಲಿರುವ ಪರೀಕ್ಷಾ ಕೇಂದ್ರದಲ್ಲಿ ಕ್ಷಿಪಣಿಯನ್ನು ಪರೀಕ್ಷಿಸಿತು.
ಈ ಕ್ಷಿಪಣಿಗಳು 60 ಕೆ.ಜಿ. ಸ್ಪೋಟಕ ಹೊತ್ತು 25 ಕಿ.ಮೀ. ದೂರದ ಗುರಿಯನ್ನು ತಲುಪುವ ಸಾಮರ್ಥ್ಯ ಹೊಂದಿವೆ. ವಿಮಾನ ನಿರೋಧಕ ರಕ್ಷಣಾ ವ್ಯವಸ್ಥೆಯ ಭಾಗವಾಗಿ ರಕ್ಷಣಾ ಸಂಶೋಧನೆ ಮತ್ತು ಅಭಿವೃದ್ಧಿ ಸಂಸ್ಥೆ (ಡಿಆರ್ಡಿಒ) ಈ ಕ್ಷಿಪಣಿಯನ್ನು ಅಭಿವೃದ್ಧಿ ಪಡಿಸಿದೆ. ಈ ಕ್ಷಿಪಣಿಯು ಸೂಪರ್ಸಾನಿಕ್ ವೇಗದಲ್ಲಿ ಗುರಿ ತಲುಪುವ ಸಾಮರ್ಥ್ಯ ಹೊಂದಿದೆ. ಇದು 2.8 ರಿಂದ 3.5 ಮ್ಯಾಕ್ ವೇಗದಲ್ಲಿ ಚಲಿಸುವ ಸಾಮರ್ಥ್ಯ ಹೊಂದಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಜುಲೈ 2015ರಲ್ಲಿ ಈ ಕ್ಷಿಪಣಿಗಳನ್ನು ವಾಯುಪಡೆಗೆ ಸೇರ್ಪಡೆ ಮಾಡಿಕೊಳ್ಳಲಾಗಿತ್ತು. ಈ ಕ್ಷಿಪಣಿಯು ಅಮೆರಿಕದ ಎಂಐಎಂ-104 ಕ್ಷಿಪಣಿಗೆ ಸರಿಸಮವಾಗಿದೆ. ಇದು ಯುದ್ಧ ವಿಮಾನ, ವೈಪರಿ ಪಡೆಗಳ ಕ್ಷಿಪಣಿಗಳನ್ನು ಯಶಸ್ವಿಯಾಗಿ ಹೊಡೆದುರುಳಿಸುವ ಸಾಮರ್ಥ್ಯ ಹೊಂದಿದೆ.
