ಕೊರೊನಾ: ಭಾರತೀಯ ರೈಲ್ವೆಯಿಂದ 40,000 ಐಸೋಲೇಷನ್ ಬೆಡ್

ಹೊಸದಿಲ್ಲಿ: ಮಹಾಮಾರಿ ಕೊರೊನಾ ವೈರಸ್ ವಿರುದ್ಧ ಇಡೀ ದೇಶವೇ ಒಗ್ಗಟ್ಟಾಗಿ ಹೋರಾಟ ಸಾರಿದೆ. ಕೋವಿಡ್ 19 ಸಾಂಕ್ರಾಮಿಕ ರೋಗ ಕ್ಷಿಪ್ರ ಗತಿಯಲ್ಲಿ ಹರಡುತ್ತಿರುವುದರಿಂದ ಸೂಕ್ತ ಚಿಕಿತ್ಸೆ ಒದಗಿಸುವುದು ವೈದ್ಯಕೀಯ ಮಂಡಳಿಯ ಪಾಲಿಗೆ ಸವಾಲಿನ ವಿಷಯವಾಗಿ ಪರಿಣಮಿಸಿದೆ.

ವೈದ್ಯಕೀಯ ತುರ್ತು ಪರಿಸ್ಥಿತಿಯ ಈ ಹಂತದಲ್ಲಿ ವಿಶ್ವದ ಅತಿ ದೊಡ್ಡ ರೈಲ್ವೆ ಜಾಲಗಳಲ್ಲಿ ಒಂದಾಗಿರುವ ಭಾರತೀಯ ರೈಲ್ವೆ, ಬರೋಬ್ಬರಿ 40,000 ಐಸೋಲೇಷನ್ ಬೆಡ್‌ಗಳನ್ನು ನಿರ್ಮಿಸಲು ತಯಾರಿ ನಡೆಸಿದೆ.

ಈ ಬಗ್ಗೆ ಮಹತ್ವದ ಮಾಹಿತಿಯನ್ನು ಕೇಂದ್ರ ಆರೋಗ್ಯ ಇಲಾಖೆಯ ಜಂಟಿ ಕಾರ್ಯದರ್ಶಿ ಲಾವ್ ಅಗರ್ವಾಲ್ ನೀಡಿದ್ದಾರೆ.

2,500 ಕೋಚ್‌ಗಳಲ್ಲಾಗಿ 40,000 ಐಸೋಲೇಷನ್ ಬೆಡ್‌ಗಳನ್ನು ನಿರ್ಮಿಸಲು ಭಾರತೀಯ ರೈಲ್ವೆ ತಯಾರಿ ನಡೆಸಿದೆ ಎಂಬುದಾಗಿ ಅಗರ್ವಾಲ್ ಮಾಹಿತಿ ಬಹಿರಂಗಪಡಿಸಿದರು.

ದೇಶದ 133 ಪ್ರದೇಶಗಳಲ್ಲಿ ಭಾರತೀಯ ರೈಲ್ವೆ ಈ ತುರ್ತು ಸೇವೆಯನ್ನು ಒದಗಿಸಲಿದ್ದು, ದೈನಂದಿನ 375ರಷ್ಟು ಐಸೋಲೇಷನ್ ಬೆಡ್‌ಗಳನ್ನು ನಿರ್ಮಿಸುತ್ತಿದೆ.

ಕೊರೊನಾ ವೈರಸ್ ವ್ಯಾಪಕವಾಗಿ ಹರಡುತ್ತಿರುವ ಹಿನ್ನೆಲೆಯಲ್ಲಿ ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಏಪ್ರಿಲ್ 14ರ ವರೆಗೆ 21 ದಿನಗಳ ಕಾಲ ಲಾಕ್‌ಡೌನ್ ಘೋಷಿಸಿದ್ದರು. ಈ ಸಂದರ್ಭದಲ್ಲಿ ಭಾರತೀಯ ರೈಲ್ವೆ ಸೇವೆಯನ್ನು ಸ್ಥಗಿತಗೊಳಿಸಿತ್ತು.

ಇದರೊಂದಿಗೆ ಏಷ್ಯಾದ ಅತಿ ಪುರಾತನ ರೈಲ್ವೆ ಜಾಲ ಎಂದೆನಿಸಿರುವ ಭಾರತೀಯ ರೈಲ್ವೆ ಕಳೆದ 167 ವರ್ಷಗಳಲ್ಲಿ ಇದೇ ಮೊದಲ ಬಾರಿಗೆ ಸೇವೆಯನ್ನು ನಿಲುಗಡಗೊಳಿಸಿತ್ತು.

ಜಗತ್ತಿನ ನಾಲ್ಕನೇ ಅತಿ ದೊಡ್ಡ ರೈಲ್ವೆ ಜಾಲವನ್ನು ಹೊಂದಿರುವ ಇಂಡಿಯನ್ ರೈಲ್ವೆ, ದೇಶದಲ್ಲಿ ಅತಿ ಹೆಚ್ಚು ಜನರಿಗೆ ಉದ್ಯೋಗವನ್ನು ಒದಗಿಸುತ್ತಿರುವ ಸಂಸ್ಥೆ ಕೂಡಾ ಆಗಿದೆ. ಇದೀಗ ಕೊರೊನಾ ವೈರಸ್ ಸೋಕಿಂತರಿಗೆ ಐಸೋಲೇಷನ್ ಹಾಗೂ ಕ್ವಾರಂಟೈನ್ ವ್ಯವಸ್ಥೆಯನ್ನು ಒದಗಿಸುವ ಮೂಲಕ ನಿರಂತರ ಸೇವೆಯಲ್ಲಿ ನಿರತವಾಗಿದೆ.

ಅಂದ ಹಾಗೆ ದೇಶದಲ್ಲಿ ಇದುವರೆಗೆ 4421 ಮಂದಿಯಲ್ಲಿ ಕೊರೊನಾ ವೈರಸ್ ಸೋಂಕು ಕಂಡುಬಂದಿದ್ದು, 114 ಮಂದಿ ಸಾವಿಗೆ ಶರಣಾಗಿದ್ದಾರೆ. ಈ ಪೈಕಿ 326 ಮಂದಿ ರೋಗ ಮುಕ್ತರಾಗಿದ್ದಾರೆ. ಇನ್ನು ಲಕ್ಷಾಂತರ ಮಂದಿ ಕ್ವಾರಂಟೈನ್‌ನಲ್ಲಿದ್ದಾರೆ.