ಕೇಂದ್ರದಲ್ಲಿ ಅಧಿಕಾರ ಹಿಡಿಯಲು ಬಿಜೆಪಿ ಟಿ20 ಸೂತ್ರ

ಹೊಸದಿಲ್ಲಿ: ಮುಂದಿನ ವರ್ಷ ಲೋಕಸಭಾ ಚುನಾವಣೆ ನಡೆಯಲಿದ್ದು, ಕೇಂದ್ರದಲ್ಲಿ ಅಧಿಕಾರ ಹಿಡಿಯಲು ಬಿಜೆಪಿ ಮತ್ತು ಕಾಂಗ್ರೆಸ್ ನೇತೃತ್ವದ ಮಿತ್ರಪಕ್ಷಗಳು ವಿವಿಧ ತಂತ್ರಕ್ಕೆ ಮುಂದಾಗಿವೆ.

ಬಿಜೆಪಿಗೆ ಕಳೆದ ಬಾರಿಗಿಂತ ಹೆಚ್ಚಿನ ಲೋಕಸಭಾ ಸ್ಥಾನಗಳನ್ನು ಈ ಬಾರಿ ಗೆಲ್ಲುವುದು ಪ್ರತಿಷ್ಟೆಯ ಸಂಗತಿಯಾಗಿದ್ದು, ಅದಕ್ಕಾಗಿ ಪಕ್ಷ ಟಿ20 ಫಾರ್ಮುಲಾ ಅಳವಡಿಕೆಗೆ ಮುಂದಾಗಿದೆ. ಟಿ20 ಫಾರ್ಮುಲಾ ಅನ್ವಯ ಬಿಜೆಪಿ ತಳಮಟ್ಟದ ಬೂತ್ ಕಾರ್ಯಕರ್ತನಿಂದ ಚುನಾವಣಾ ಪ್ರಚಾರ ಆರಂಭಿಸಲಿದ್ದು ತಮ್ಮ ಪ್ರದೇಶದ ಕನಿಷ್ಠ 20 ಮನೆಗಳಿಗೆ ತೆರಳಿ ಪ್ರಚಾರ ನಡೆಸಬೇಕಿದೆ.

ಕೇಂದ್ರದ ನರೇಂದ್ರ ಮೋದಿ ಸರಕಾರದ ವಿವಿಧ ಯೋಜನೆಗಳು, ಫಲಶ್ರುತಿ ಮತ್ತು ಸಾಧನೆಗಳ ಬಗ್ಗೆ ಪ್ರತಿ ಮನೆಯಲ್ಲೂ ವಿವರವಾದ ಮಾಹಿತಿ ನೀಡಿ, ಅವರೊಂದಿಗೆ ವಿಚಾರ ವಿನಿಮಯ ನಡೆಸಿ ವರದಿ ಒಪ್ಪಿಸಬೇಕಿದೆ. ಇದಕ್ಕಾಗಿ ನಮೋ ಆ್ಯಪ್ ಮೂಲಕ ವ್ಯವಸ್ಥಿತವಾಗಿ ಕಾರ್ಯತಂತ್ರ ರೂಪಿಸಲು ಬಿಜೆಪಿ ಸಿದ್ಧತೆ ನಡೆಸಿದೆ.

ತಮ್ಮ ಕಾರ್ಯಕ್ಷೇತ್ರದ ಬೂತ್‌ ಕಾರ್ಯಕರ್ತ 20 ಮನೆಗೆ ತೆರಳಿ ಚುನಾವಣಾ ಪ್ರಚಾರ ನಡೆಸುವ ಜತೆಗೆ ಅಲ್ಲಿ ಚಹಾ ಕುಡಿದು ಬರಲಿದ್ದಾರೆ. ಹರ್ ಬೂತ್‌ ದಸ್ ಯೂತ್ ಎಂಬ ಯೋಜನೆಯಡಿ ಟಿ20 ಪ್ರಚಾರ ಕಾರ್ಯತಂತ್ರ ರೂಪುಗೊಳ್ಳುತ್ತಿದ್ದು, ಅಧಿಕ ಸಂಖ್ಯೆಯಲ್ಲಿ ಜನರು ನಮೋ ಆ್ಯಪ್ ಮೂಲಕ ಬಿಜೆಪಿ ನೇತೃತ್ವದ ಕೇಂದ್ರ ಸರಕಾರ ಯೋಜನೆಗಳ ಬಗ್ಗೆ ಪ್ರಚುರಪಡಿಸಬೇಕಿದೆ.

ಗ್ರಾಮದಲ್ಲಿ ಅತ್ಯಂತ ತಳಮಟ್ಟದ ಕಾರ್ಯಕರ್ತನನ್ನೂ ಸಮರ್ಥವಾಗಿ ಈ ಪ್ರಚಾರ ಕಾರ್ಯ ಬಳಸಿಕೊಳ್ಳಲಿದೆ. ಅದರ ಜತೆಗೆ ಸಾಮಾಜಿಕ ಮಾಧ್ಯಮ, ಅತ್ಯಾಧುನಿಕ ತಂತ್ರಜ್ಞಾನದ ಬಳಕೆಯನ್ನೂ ಬಿಜೆಪಿ ಮಾಡಿಕೊಳ್ಳಲಿದೆ.