ಉತ್ತರ ಪ್ರದೇಶದಲ್ಲಿ ಭೀಕರ ಜ್ವರಕ್ಕೆ 40 ಮಂದಿ ಸಾವು

ಲಕ್ನೋ (ಸೆ.14): ಉತ್ತರ ಪ್ರದೇಶದ ಬರೇಲಿ ಜಿಲ್ಲೆಯಲ್ಲಿ ಭೀಕರ ಜ್ವರ ಕಾಣಿಸಿಕೊಂಡಿದ್ದು, ಕಳೆದ ಕೆಲವು ವಾರಗಳು 40ಕ್ಕೂ ಹೆಚ್ಚು ಜನ ಸಾವನ್ನಪ್ಪಿದ್ದಾರೆ.

ಅನಧಿಕೃತವಾಗಿ 100ಕ್ಕೂ ಹೆಚ್ಚು ಜನರು ಈ ಜ್ವರಕ್ಕೆ ಸಾವನ್ನಪ್ಪಿದ್ದಾರೆ ಎನ್ನಲಾಗಿದೆ. ಈ ನಿಗೂಢ ಜ್ವರ ಬಢೂನ್​ ಜಿಲ್ಲೆಯಲ್ಲಿಯೂ ಕಾಣಿಸಿಕೊಂಡಿದೆ.

ಬರೇಲಿಯಲ್ಲಿ ಅಧಿಕ ಮಳೆಯಾಗಿದ್ದು, ಕೆಟ್ಟ ಪರಿಸ್ಥಿತಿ ನಿರ್ಮಾಣವಾಗಿತ್ತು. ಕಲುಷಿತ ನೀರಿನಿಂದಾಗಿ ಕಾಯಿಲೆಗಳು ಹರಡುತ್ತಿದ್ದು, ಜನರಿಗೆ ಸೂಕ್ತ ಚಿಕಿತ್ಸೆ ನೀಡಲು ದೆಹಲಿ ಮತ್ತು ಲಕ್ನೋನಿಂದ ವೈದ್ಯರು ತಂಡ ಆಗಮಿಸಿದೆ.

ಮಜಗಾವ್​ ಬ್ಲಾಕ್​ನಲ್ಲಿ ಪ್ಲಸ್ಮೋಡಿಯಂ ಫಲ್ಕಿಪರಂ(ಫಿಎಫ್​) ಮಲೇರಿಯಾ ಸೋಂಕು ಇರುವುದನ್ನು ರಾಜ್ಯ ತುರ್ತು ನಿರ್ವಹಣಾ ತಂಡ ಪತ್ತೆ ಹಚ್ಚಿದ್ದು, ಇದು ಅತಿ ಹೆಚ್ಚು ಸಾವು ನೋವಿಗೆ ಕಾರಣವಾಗಿದೆ ಎನ್ನಲಾಗಿದೆ.

ಪಿಎಫ್​ ಮಲೇರಿಯಾ ಭಯಂಕರ ಮಲೇರಿಯಾ ರೋಗವಾಗಿದ್ದು, ಚಿಕಿತ್ಸೆ 24ಗಂಟೆ ವಿಳಂಬವಾದರೆ ಜೀವಕ್ಕೆ ಇದು ಕುತ್ತು ತರಲಿದೆ. 15ದಿನದಲ್ಲಿ 40 ಜನರು ಸಾವನ್ನಪ್ಪಿದ ಹಿನ್ನೆಲೆಯಲ್ಲಿ ಜಿಲ್ಲಾ ಮಲೇರಿಯಾ ಅಧಿಕಾರಿ ಡಾ. ಪಿಕೆ ಜೈನ್​ ಅವರನ್ನು ವಜಾಗೊಳಿಸಿದ್ದಾರೆ.

ಈ ಕುರಿತು ಮಾತನಾಡಿರುವ ಉತ್ತರ ಪ್ರದೇಶ ಆರೋಗ್ಯ ಸಚಿವರಾದ ಸಿದ್ಧಾರ್ಥ ನಾಥ್​ ಸಿಂಗ್​, ಯಾವಾಗ ಜ್ವರ ಕಾಣಿಸಿಕೊಳ್ಳುತ್ತದೆಯೋ ಆಗ ಸರ್ಕಾರ ನೀಡಿರುವ ವೈದ್ಯಕೀಯ ಕಿಟ್​ ಬಳಸಿ, ಪರೀಕ್ಷಿಸಿ, ಅದು ನಿಮಗೆ ಯಾವಾಗ ರೋಗ ಇದೆ ಎಂಬ ಸುಳಿವು ನೀಡಲಿದೆ ಎಂದರು.