ಫೈಜಾಬಾದ್ (ಉಪ್ರ): ವರದಕ್ಷಿಣೆ ಕಿರುಕುಳ ಕೊಟ್ಟು, ಪತ್ನಿಯನ್ನು ಹತ್ಯೆ ಮಾಡಿದ ಆರೋಪದಲ್ಲಿ ಪತಿ ಕೇಸು ಹಾಕಿಸಿಕೊಂಡು ರುಬ್ಬಿಸಿಕೊಳ್ಳುತ್ತಿದ್ದರೆ, ಪತ್ನಿ ಮತ್ತೊಬ್ಬನ ಜತೆ ಸಹಜೀವನ ನಡೆಸುತ್ತಿದ್ದಳು!
ಸತ್ತವಳು ಹೇಗೆ ಮತ್ತೊಬ್ಬ ಪುರುಷನ ಜತೆ ಇದ್ದಾಳೆ ಎಂಬ ಪ್ರಶ್ನೆಯೇ? ಅಸಲಿಗೆ ವರದಕ್ಷಿಣೆ ಕಿರುಕುಳ, ಹತ್ಯೆ ದೂರೇ ಖೊಟ್ಟಿ! ಫೇಸ್ಬುಕ್ ಮತ್ತು ಮೊಬೈಲ್ ಬಳಕೆಯ ಬೆನ್ನು ಹತ್ತಿದ ಉತ್ತರ ಪ್ರದೇಶದ ಪೊಲೀಸರು ಆಕೆಯನ್ನು ಬಂಧಿಸಿ, ವಿಚಾರಣೆ ನಡೆಸುತ್ತಿದ್ದ ಸ್ಥಳೀಯ ನ್ಯಾಯಾಲಯದ ಮುಂದೆ ಹಾಜರು ಪಡಿಸಿದ್ದಾರೆ.
ಪೊಲೀಸರು ನೀಡಿದ ಮಾಹಿತಿ ಪ್ರಕಾರ ಉತ್ತರ ಪ್ರದೇಶದ ಬಾರಾಬಂಕಿ ನಿವಾಸಿ ರೂಬಿ ಎಂಬಾಕೆ 2016ರಲ್ಲಿ ರಾಹುಲ್ ಎಂಬಾತನನ್ನು ವಿವಾಹವಾಗಿದ್ದಾಳೆ. ಜೂನ್ 2018ರಲ್ಲಿ ರೂಬಿ ತಂದೆ ಸ್ಥಳೀಯ ಪೊಲೀಸರಿಗೆ ತನ್ನ ಮಗಳನ್ನು ವರದಕ್ಷಿಣೆಗಾಗಿ ಪತಿ ರಾಹುಲ್ ಮತ್ತು ಅತ್ತೆ-ಮಾವ ಸೇರಿ ಹತ್ಯೆ ಮಾಡಿರುವುದಾಗಿ ದೂರು ದಾಖಲಿಸಿದ್ದರು. ಆದರೆ ಪ್ರಕರಣ ದಾಖಲಿಸಲು ಅಧಿಕೃತ ಮಾಹಿತಿ ಸಿಗದ ಹಿನ್ನೆಲೆ ಪೊಲೀಸರು ನಿರಾಕರಿಸಿದ್ದಾರೆ. ಇಷ್ಟಕ್ಕೆ ಸುಮ್ಮನಾಗದ ರೂಬಿ ತಂದೆ ಸ್ಥಳೀಯ ನ್ಯಾಯಾಲಯಕ್ಕೆ ದೂರು ಸಲ್ಲಿಸಿದ್ದಾರೆ.
ಕೊನೆಗೆ ನ್ಯಾಯಾಲಯದ ಆದೇಶದಂತೆ ತನಿಖೆ ಆರಂಭಿಸಿದ ಪೊಲೀಸರು ಹತ್ಯೆಗೆ ಒಳಗಾಗಿದ್ದಾಳೆ ಎನ್ನಲಾದ ರೂಬಿಯನ್ನು ಜೀವಂತ ಹಿಡಿದು ತಂದು ನ್ಯಾಯಾಲಯದ ಮುಂದೆ ನಿಲ್ಲಿಸಿದ್ದಾರೆ. ಸುಳ್ಳು ದೂರು ದಾಖಲಿಸಿದ ರೂಬಿ ತಂದೆಯನ್ನು ಬಂಧಿಸಿದ್ದಾರೆ.
Comments are closed.