ಪಿತ್ತಕೋಶದಲ್ಲಿದ್ದ 10 ಸಾವಿರ ಕಲ್ಲುಗಳನ್ನು ಹೊರತೆಗೆದ ವೈದ್ಯರು!

ಕೋಲ್ಕತ: ಪಿತ್ತಕೋಶದಲ್ಲಿದ್ದ ಬರೋಬ್ಬರಿ 10,000 ಕಲ್ಲುಗಳನ್ನು ಕೋಲ್ಕತದ ವೈದ್ಯರು ಹೊರತೆಗೆದಿದ್ದಾರೆ.

ಕೋಲ್ಕತ ಎಂಸಿಎಚ್‌ ಆಸ್ಪತ್ರೆಯಲ್ಲಿ ಪೌಷ್ಟಿಕತಜ್ಞರಾದ, 40 ವರ್ಷದ ಡಾ. ರಾಜೀವ್‌ ಚೌದರಿ ಹೊಟ್ಟೆ ನೋವು ಎಂದು ದಾಖಲಾಗಿದ್ದರು. ಚೌದರಿ ಅವರ ಪಿತ್ತಕೋಶದಿಂದ 10,356 ಕಲ್ಲುಗಳನ್ನು ಅತಿಸೂಕ್ಷ್ಮ ಸರ್ಜರಿ ಮೂಲಕ ಹೊರಗೆ ತೆಗೆಯಲಾಗಿದ್ದು, ಚೇತರಿಸಿಕೊಳ್ಳುತ್ತಿದ್ದಾರೆ.

ನಗರದಲ್ಲಿ 2ನೇ ಬಾರಿಗೆ ಇಂತಹ ಪ್ರಕರಣ ದಾಖಲಾಗಿದೆ. ಅಷ್ಟು ಪ್ರಮಾಣದ ಕಲ್ಲುಗಳು ಹೇಗೆ ಪಿತ್ತಕೋಶಕ್ಕೆ ಸೇರ್ಪಡೆಗೊಂಡವು ಎಂದು ಗೊತ್ತಿಲ್ಲ. ಈ ಮೊದಲು ದಾಖಲಾಗಿದ್ದು ರೋಗಿಯ ಪಿತ್ತಕೋಶದಿಂದ 12,000 ಕಲ್ಲುಗಳನ್ನು ಹೊರತೆಗೆದಿದ್ದೇವೆ ಎಂದು ಆಸ್ಪತ್ರೆ ಅಧಿಕಾರಿ ಡಾ. ಮಾನಸ್‌ ಕುಮಾರ್‌ ದತ್ತ ತಿಳಿಸಿದ್ದಾರೆ.

ತಜ್ಞರ ಪ್ರಕಾರ ರೋಗಿಗಳು ಹೆಚ್ಚಿನ ಮಧುಮೇಹ ಮತ್ತು ಟ್ರೈಗ್ಲಿಸರೈಡ್‌ ರೋಗದಿಂದ ಬಳಲುತ್ತಿದ್ದರು. ಮಧುಮೇಹ ಸಮಸ್ಯೆಯಿಂದ ಕಲ್ಲುಗಳು ಉತ್ಪತ್ತಿಯಾದ ಸಾಧ್ಯತೆಯಿದೆ. ಅತಿಹೆಚ್ಚು ಜಂಕ್‌ ಫುಡ್‌, ಆಯಾಸ, ಜೆನೆಟಿಕ್ಸ್‌ ಸಮಸ್ಯೆಯಿಂದಲೂ ಕಲ್ಲುಗಳು ಸೃಷ್ಟಿಯಾಗುವ ಸಾಧ್ಯತೆ ಇದೆ. ಕಳೆದ ವರ್ಷ ಇಂತಹ ಸಮಸ್ಯೆಯಿಂದ ಬಳಲುತ್ತಿದ್ದ 1 ವರ್ಷದ ಮಗುವಿಗೆ ಸರ್ಜರಿ ಮಾಡಿದ್ದೇವೆ ಎಂದು ವೈದ್ಯರು ತಿಳಿಸಿದ್ದಾರೆ.