ಪ್ರಧಾನಿಗೆ ರಾಖಿ ಕಟ್ಟುವ ಬಾಲಕಿಯರಿಗೆ ಆಧಾರ್ ಕಡ್ಡಾಯ ಸುಳ್ಳು ಸುದ್ದಿ

ಹೊಸದಿಲ್ಲಿ: ರಕ್ಷಾಬಂಧನ ದಿನದಂದು ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ರಾಖಿ ಕಟ್ಟಲು ತೆರಳಿದ ಮಕ್ಕಳು ಮತ್ತು ಮಹಿಳೆಯರಿಗೆ ಆಧಾರ್ ಕಾರ್ಡ್‌ ತೋರಿಸುವುದು ಕಡ್ಡಾಯಗೊಳಿಸಲಾಗಿತ್ತು ಎಂಬ ನಕಲಿ ಸುದ್ದಿಯೊಂದು ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಸದ್ದು ಮಾಡಿದೆ.

ಪ್ರಧಾನ ಮಂತ್ರಿಗಳ ಕಚೇರಿಯ (ಪಿಎಂಓ ಇಂಡಿಯಾ) ಅಧಿಕೃತ ಜಾಲತಾಣ ಮತ್ತು (www.pmindia.gov.in) ವಾರ್ತಾ ಇಲಾಖೆ (ಪಿಐಬಿ) ವೆಬ್‌ಸೈಟ್‌ಗಳಲ್ಲಿ ಪ್ರಕಟಿಸಲಾದ ಫೋಟೋ ಒಂದನ್ನು ಆಧರಿಸಿ ಆ ನಕಲಿ ಸುದ್ದಿ ಹರಡಿತ್ತು. ಆ ಚಿತ್ರದಲ್ಲಿ ಆಧಾರ್‌ ಕಾರ್ಡ್‌ ಹಿಡಿದುಕೊಂಡಿದ್ದ ಬಾಲಕಿಯೊಬ್ಬಳು ಪ್ರಧಾನಿ ಮೋದಿ ಅವರಿಗೆ ರಾಖಿ ಕಟ್ಟುವ ದೃಶ್ಯವಿತ್ತು.

ಫೇಸ್‌ಬುಕ್‌ ಅಷ್ಟೇ ಅಲ್ಲ, ಟ್ವಿಟರ್‌ನಲ್ಲೂ ಇದು ವೈರಲ್ ಆಗುತ್ತಿದೆ ಎಂದು ಹೇಳಲಾಗಿತ್ತು.

ಅಷ್ಟಕ್ಕೂ ವೈರಲ್ ಆಗಿದ್ದೇನು?:
ಈ ಪೋಸ್ಟ್‌ ಅನ್ನು ನಾನಾ ಸಾಮಾಜಿಕ ತಾಣಗಳಲ್ಲಿ ಹಲವು ಬಾರಿ ಶೇರ್ ಮಾಡಿಕೊಳ್ಳಲಾಗಿತ್ತು. ಫೇಸ್‌ಬುಕ್ ಮತ್ತು ಟ್ವಿಟರ್‌ನ ಹಲವು ಅಕೌಂಟ್‌ಗಳಲ್ಲಿ ಈ ಫೋಟೋವನ್ನು ಎತ್ತಿಕೊಂಡು ಸಂದರ್ಭವನ್ನು ತಪ್ಪಾಗಿ ಬಿಂಬಿಸಿ ಮೋದಿ ಅವರ ವಿರುದ್ಧ ‘ಶೇಮ್‌ಲೆಸ್‌’ (ನಾಚಿಕೆಗೇಡು) ಮತ್ತು ‘ಕವಾರ್ಡ್‌’ (ಹೇಡಿ) ಎಂಬ ಹಣೆಪಟ್ಟಿ ಹಚ್ಚಿ ಶೇರ್‌ ಮಾಡಲಾಗಿತ್ತು.

ಸತ್ಯಾಸತ್ಯದ ಪರಿಶೀಲನೆ:
ಹಾಗಿದ್ದರೂ, ಪಿಐಬಿಯ ಅಧಿಕೃತ ಟ್ವಿಟರ್‌ ಖಾತೆಯಲ್ಲಿ ಪ್ರಕಟಿಸಲಾದ ಚಿತ್ರಗಳಲ್ಲಿ ಪ್ರತಿಯೊಬ್ಬ ಮಹಿಳೆಯೂ ಅದೇ ಗುರುತಿನ ಚೀಟಿ ಹಿಡಿದುಕೊಂಡು ರಾಖಿ ಕಟ್ಟುವ ದೃಶ್ಯಗಳಿದ್ದವು. ಪ್ರಧಾನಿಯವರ ಭದ್ರತಾ ನಿಯಮಗಳ ಪ್ರಕಾರ ಯಾವುದಾದರೂ ಗುರುತಿನ ಚೀಟಿ ಇರಬೇಕೆಂದು ಸೂಚಿಸಲಾಗಿತ್ತು.

ಮಕ್ಕಳು ತಮ್ಮ ಶಾಲಾ ಗುರುತಿನ ಚೀಟಿ ಧರಿಸಿದ್ದರೆ, ಹಿರಿಯ ಮಹಿಳೆಯರು ತಮ್ಮ ಸಂಸ್ಥೆಯ ಬ್ಯಾಡ್ಜ್‌ ಧರಿಸಿದ್ದರು.

ಆದರೆ ಸುದ್ದಿಗೆ ಗ್ರಾಸವಾದ ಬಾಲಕಿ ತನ್ನ ಗುರುತಿನ ಚೀಟಿಯಾಗಿ ಪ್ರಧಾನಿ ಕಚೇರಿಯಲ್ಲಿ ತೋರಿಸಲು ಆಧಾರ್‌ ಕಾರ್ಡ್‌ ಒಯ್ದಿದ್ದಳು. ಅವಳು ಎಳೆ ವಯಸ್ಸಿನವಳಾಗಿದ್ದರಿಂದ ಆಧಾರ್‌ ಹೊರತು ಬೇರೆ ಗುರುತಿನ ಚೀಟಿ ಅವಳ ಬಳಿ ಇರಲಿಲ್ಲ.

ಮೊದಲೇ ವಿವರಿಸಿದಂತೆ ಪ್ರಧಾನ ಮಂತ್ರಿಗಳನ್ನು ಭೇಟಿ ಮಾಡುವಾಗ ಭದ್ರತಾ ನಿಯಮಗಳ ಭಾಗವಾಗಿ ಗುರುತಿನ ಚೀಟಿ ಪ್ರದರ್ಶಿಸುವುದು ಕಡ್ಡಾಯ.

ಸತ್ಯಾಸತ್ಯ ಪರಿಶೀಲನೆ ವಿಧಾನ:
ಗೂಗಲ್‌ನಲ್ಲಿ ಚಿತ್ರದ ಹಿಮ್ಮುಖ ಶೋಧ (ರಿವರ್ಸ್‌ ಸರ್ಚ್‌) ನಡೆಸಿದಾಗ ಸರಕಾರದ ಹಲವಾರು ವೆಬ್‌ಸೈಟ್‌ಗಳು ಮತ್ತು ಸಂಬಂಧಿತ ಸಾಮಾಜಿಕ ಮಾಧ್ಯಮ ಅಕೌಂಟ್‌ಗಳ ಮೂಲಕ ಆ ಫೋಟೋ ಶೇರ್‌ ಆಗಿರುವುದು ಪತ್ತೆಯಾಯಿತು.

ಟೈಮ್ಸ್‌ ಫ್ಯಾಕ್ಟ್‌ ಸರ್ಚ್‌ (ಸತ್ಯಶೋಧಕ) ತಂಡ) ಪ್ರಧಾನಿ ಕಚೇರಿಯನ್ನು ಸಂಪರ್ಕಿಸಿ ವಿಚಾರಿಸಿತು. ಸಾಮಾಜಿಕ ಮಾಧ್ಯಮಗಳಲ್ಲಿ ಹರಡುತ್ತಿರುವ ಸುಳ್ಳು ಟಿಪ್ಪಣಿಗಳನ್ನು ಪಿಎಂಓ ನಿರಾಕರಿಸಿದೆ. ‘ಪ್ರಧಾನಿ ಕಚೇರಿ ಗರಿಷ್ಟ ಭದ್ರತೆಯ ವಲಯವಾಗಿರುವುದರಿಂದ ಅಲ್ಲಿಗೆ ಪ್ರವೇಶಿಸುವ ಪ್ರತಿಯೊಬ್ಬ ವ್ಯಕ್ತಿಯೂ ಗುರುತಿನ ಚೀಟಿ ತೋರಿಸುವುದು ಕಡ್ಡಾಯ. ಆ ಬಾಲಕಿ ಪರ್ಸ್‌ ಹೊಂದಿರದ ಕಾರಣ ಗುರುತಿನ ಚೀಟಿಯನ್ನು ಕೈಯ್ಯಲ್ಲಿ ಹಿಡಿದುಕೊಂಡಿದ್ದಳು’ ಎಂದು ಪಿಎಂಓ ತಿಳಿಸಿದೆ.

ಅಂತಿಮ ತೀರ್ಪು:
ಟೈಮ್ಸ್‌ ಫ್ಯಾಕ್ಟ್‌ ಚೆಕ್‌ ತಂಡಕ್ಕೆ ಪತ್ತೆಯಾದಂತೆ ಸಾಮಾಜಿಕ ಜಾಲತಾಣಗಳಲ್ಲಿ ಹಬ್ಬಿದ ಟಿಪ್ಪಣಿಗಳು ಸುಳ್ಳಾಗಿವೆ. ಆ ಚಿತ್ರ ನೈಜವಾಗಿದ್ದು ಫೋಟೋಶಾಪ್ ಮಾಡಿದ್ದಲ್ಲ; ಆದರೆ ಚಿತ್ರಕ್ಕೆ ನೀಡಿರುವ ಅಡಿ ಟಿಪ್ಪಣಿಗಳು ತಪ್ಪಾಗಿವೆ.