ಹೊಸದಿಲ್ಲಿ: ಪತ್ನಿಯ ಮೊಬೈಲ್ ಕದ್ದವನನ್ನು ಪತಿಯೇ ಪೊಲೀಸ್ ಮಾದರಿಯಲ್ಲಿ ತನಿಖೆ ನಡೆಸಿ ಹಿಡಿದುಕೊಟ್ಟು ಸೈ ಎನಿಸಿಕೊಂಡಿದ್ದಾರೆ.
ಸಬ್ಸಿ ಮಂಡಿ ಪೊಲೀಸ್ ಠಾಣಾ ವ್ಯಾಪ್ತಿಯ ಕಟ್ರ ಗುಲ್ಖನ್ ಪ್ರದೇಶದಲ್ಲಿ ವಾಸಿಸುವ ಟ್ಯಾಕ್ಸಿ ಚಾಲಕ ಮಹೇಶ್ ಕುಮಾರ್ ಪತ್ನಿಯ ಮೊಬೈಲ್ ಕದ್ದವನಿಗೆ ತಕ್ಕ ಶಾಸ್ತಿ ಮಾಡಿಸಿದವರು.
ಮೂರು ದಿನಗಳ ಕಾಲ ಕಳ್ಳನ ಪತ್ತೆಯಲ್ಲಿ ತೊಡಗಿದ ಮಹೇಶ್, ಸಿಸಿಟಿವಿ ದೃಶ್ಯಾವಳಿಗಳನ್ನು ನೋಡಿದ್ದಾರೆ. ಅದರಲ್ಲಿ ಸಿಕ್ಕ ಮಾಹಿತಿ ಮೇಲೆ, ಮದ್ಯದ ಅಂಗಡಿಯೊಂದರಲ್ಲಿ ಕಳ್ಳನಿಗಾಗಿ ಕಾದುಕುಳಿತಿದ್ದಾರೆ. ಶನಿವಾರ ಕಳ್ಳ ಅಂಗಡಿಗೆ ಬಂದೊಡನೆ ಮೇಲೆರಗಿ, ಥಳಿಸಿ, ಪೊಲೀಸರಿಗೊಪ್ಪಿಸಿದ್ದಾರೆ.
ಆ.2ರಂದು ಮಗನೊಂದಿಗೆ ಮಹೇಶ್ ಕುಮಾರ್ ಅವರ ಪತ್ನಿ ಮನೆಗೆ ವಾಪಸಾಗುತ್ತಿದ್ದರು. ಮನೆ ಮುಂದಿನ ಗಲ್ಲಿಯಲ್ಲಿ ಸ್ಕೂಟಿ ನಿಲ್ಲಿಸಿದ್ದಾರೆ. ಪುತ್ರನ ಕೈಯಲ್ಲಿದ್ದ ಮೊಬೈಲ್ನನ್ನು ಸ್ಕೂಟಿಯಲ್ಲೇ ಬಿಟ್ಟು ಮನೆಯೊಳಕ್ಕೆ ಹೋಗಿದ್ದಾರೆ. ಮನೆ ಬಾಗಿಲಿಗೆ ತಲುಪುವಷ್ಟರಲ್ಲಿ ಪತ್ನಿಗೆ ಮೊಬೈಲ್ ನೆನಪಾಗಿ ಮತ್ತೆ ಸ್ಕೂಟಿ ಬಳಿ ಬರುವಷ್ಟರಲ್ಲಿ ಮೊಬೈಲ್ ಕಳವಾಗಿತ್ತು. ಈ ಸಂಬಂಧ ಸಬ್ಸಿ ಮಂಡಿ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು.
ಕಳ್ಳನ ಪತ್ತೆಗೆ ಪೊಲೀಸರನ್ನು ಕಾಯದ ಮಹೇಶ್ ಕುಮಾರ್, ಕಳ್ಳನ ಬೈಕ್ನಲ್ಲಿದ್ದ ಹಾರ್ಟ್ ಸಿಂಬಲ್ ಹಾಗೂ ಇನ್ನಿತರ ಗುರುತುಗಳನ್ನು ಸಿಸಿಟಿವಿಗಳ ಮೂಲಕ ಪತ್ತೆ ಹಚ್ಚಿದ್ದಾರೆ. 2 ದಿನಗಳ ಕಾಲ ಸ್ವಯಂ ಕಾರ್ಯಾಚರಣೆಗೆ ಇಳಿದ ಮಹೇಶ್ ಕುಮಾರ್, ಮದ್ಯದ ಅಂಗಡಿಗೆ ಆತ ಬರುವುದನ್ನು ಕಾದು ಕುಳಿತು ಹಿಡಿದಿದ್ದಾರೆ.
ಪೊಲೀಸರ ಕಳ್ಳನನ್ನು ಗುರುತಿಸಿದ್ದ ವಿಕಿ ಸಾಗರ್ ಎಂದು ಹೇಳಿದ್ದಾರೆ. ಈ ಸಂಬಂಧ ಪ್ರಕರಣ ದಾಖಲಿಸಲಾಗಿದೆ.
Comments are closed.