ಮೋದಿಗೆ ಪಾಕಿಸ್ತಾನದ ಸೀಪ್ಲೇನ್ ಕಳುಹಿಸಿದ್ದು ಯಾರು?: ಓವೈಸಿ

ಹೈದರಾಬಾದ್: ಜೆರುಸೆಲಂ ಅನ್ನು ಇಸ್ರೇಲ್ ರಾಜಧಾನಿ ಎಂದು ಅಮೆರಿಕ ಘೋಷಿಸಿದ್ದನ್ನು ವಿರೋಧಿಸಲು ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ, ಪ್ರಧಾನಿ ಮೋದಿಯನ್ನು ತರಾಟೆಗೆ ತೆಗೆದುಕೊಂಡ ಎಐಎಮ್‌ಐಎಂ ನಾಯಕ ಅಸಾದುದ್ದೀನ್ ಓವೈಸಿ, ಗುಜರಾತ್ ಚುನಾವಣೆ ವೇಳೆ ಬಳಸಿದ ಸೀಪ್ಲೇನ್ ಪಾಕಿಸ್ತಾನಕ್ಕೆ ಸೇರಿದ್ದೆಂದು ಆರೋಪಿಸಿದ್ದಾರೆ.

ಅಖಿಲ ಭಾರತೀಯ ವೈಯಕ್ತಿಕ ಕಾನೂನು ಮಂಡಳಿ ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ ಮಾತನಾಡಿದ ಓವೈಸಿ, ಈ ಸೀಪ್ಲೇನ್ ಪಾಕಿಸ್ತಾನದ್ದಾಗಿದ್ದು, ವೈರ ನೆರೆ ರಾಷ್ಟ್ರದೊಂದಿಗೆ ಅತ್ಯುತ್ತಮ ಬಾಂಧವ್ಯ ಹೊಂದಿರುವ ಬಿಜೆಪಿ ಹಾಗೂ ಪ್ರಧಾನಿ ನರೇಂದ್ರ ಮೋದಿ ರಾಷ್ಟ್ರ ದ್ರೋಹಿಗಳೆಂದು ಓವೈಸಿ ಹೇಳಿದ್ದಾರೆ.

ಮೋದಿ ಬಳಸಿದ ಸೀ ಪ್ಲೇನ್ ಪಾಕಿಸ್ತಾನದ ಕರಾಚಿಯಿಂದ ಹೊರಟು ಗುಜರಾತಿನ ಧರೋಯಿಯಲ್ಲಿ ಬಂದಿಳಿದಿದೆ. ಪ್ರಧಾನಿಯೇ ವೈರ ರಾಷ್ಟ್ರದಿಂದ ಬಂದ ವಿಮಾನವನ್ನು ಬಳಿಸಿದರೇನು ಅರ್ಥವೆಂದು ಪ್ರಶ್ನಿಸಿದ ಓವೈಸಿ, ಈ ವಿಮಾನವನ್ನು ಯಾರು ಕಳುಹಿಸಿದ್ದಾರೆಂದು ಮೋದಿ ಸ್ಪಷ್ಟಪಡಿಸಬೇಕೆಂದು ಆಗ್ರಹಿಸಿದ್ದಾರೆ.

ರಾಜಸ್ಥಾನದಲ್ಲಿ ಮುಸ್ಲಿಮ್ ಯುವಕನ ಹತ್ಯೆಯಾಗಿದ್ದು, ಮೋದಿ ಅವರಿಗೆ ಇಂಥ ಬರ್ಬರ ಹತ್ಯೆಯಾದವರ ಬಗ್ಗೆ ಮಾತನಾಡಲು ಸಮಯವಿಲ್ಲ. ಆದರೆ, ಮಾಜಿ ಪ್ರಧಾನಿ ಹಾಗೂ ಮಾಜಿ ಉಪ ರಾಷ್ಟ್ರಪತಿ ಅವರನ್ನು ಅನುಮಾನಿಸಲು ಸಮಯ ಸಿಗುತ್ತದೆ, ಎಂದು ಆರೋಪಿಸಿದ್ದಾರೆ.

ಗುಜರಾತ್ ಚುನಾವಣೆ ಪ್ರಚಾರದ ವೇಳೆ ದೇವಸ್ಥಾನಗಳಿಗೆ ಭೇಟಿ ನೀಡಿದ ರಾಹುಲ್ ಅವರನ್ನೂ ಓವೈಸಿ ಟೀಕಿಸಿದ್ದಾರೆ.