ಭಾರತ ವಿರೋಧಿ ಅಪಪ್ರಚಾರ: ಪಾಕ್ ರಕ್ಷಣಾ ಇಲಾಖೆಯ ಟ್ವಿಟರ್‌ ಖಾತೆ ಬಂದ್‌

ಹೊಸದಿಲ್ಲಿ: ಭಾರತ ವಿರೋಧಿ ನೀತಿಯ ಪ್ರಚಾರಕ್ಕಾಗಿ ಭಾರತೀಯ ಹುಡುಗಿಯೊಬ್ಬಳ ರೂಪಾಂತರಗೊಳಿಸಿದ ಚಿತ್ರವನ್ನು ಬಳಸಿದ್ದಕ್ಕಾಗಿ ಪಾಕಿಸ್ತಾನ ರಕ್ಷಣಾ ಇಲಾಖೆಯ ಅಧಿಕೃತ ಟ್ವಿಟರ್‌ ಖಾತೆಯನ್ನು ಟ್ವಿಟರ್‌ ಸ್ಥಗಿತಗೊಳಿಸಿದೆ.

@defencepk ಹೆಸರಿನ ಅಧಿಕೃತ ಟ್ವಿಟರ್‌ ಪುಟದಲ್ಲಿ ದಿಲ್ಲಿಯ ಜಾಮಾ ಮಸೀದಿಯ ಎದುರು ನಿಂತ ಭಾರತೀಯ ಯುವತಿಯೊಬ್ಬಳು ‘ನಾನೊಬ್ಬಳು ಭಾರತೀಯಳು; ಆದರೆ ಭಾರತ ಒಂದು ವಸಾಹತುಶಾಹಿ ಸಾಮ್ರಾಜ್ಯವಾಗಿದ್ದು ನಾಗಾಗಳು, ಮಣಿಪುರಿಗಳು, ಹೈದರಾಬಾದ್‌, ಜುನಾಗಢ, ಸಿಕ್ಕಿಂ, ಮಿಜೋರಾಂ, ಗೋವಾದಂತಹ ದೇಶಗಳನ್ನು ಆಕ್ರಮಿಸಿಕೊಂಡ ಕಾರಣಕ್ಕೆ ನಾನು ಭಾರತವನ್ನು ದ್ವೇಷಿಸುತ್ತೇನೆ’ ಎಂಬ ಫಲಕ ಹಿಡಿದ ಚಿತ್ರವನ್ನು ಪ್ರಕಟಿಸಲಾಗಿತ್ತು.

ಅಂತರ್ಜಾಲದಲ್ಲಿ ಹದ್ದಿನ ಕಣ್ಣಿಟ್ಟಿರುವ ಕೆಲವು ಭಾರತೀಯ ನೆಟಿಜನ್‌ಗಳು ಪಾಕ್‌ ರಕ್ಷಣಾ ಇಲಾಖೆಯ ಪೋಸ್ಟನ್ನು ಗಮನಿಸಿ, ನಕಲಿ ಪೋಸ್ಟ್‌ನ ಅಸಲಿಯತ್ತನ್ನು ಬಹಿರಂಗಪಡಿಸಿದರು. ಮೂಲತಃ ದಿಲ್ಲಿ ವಿವಿಯ ವಿದ್ಯಾರ್ಥಿನಿ ಕವಾಲ್‌ಪ್ರೀತ್‌ ಕೌರ್‌ನ ಚಿತ್ರ ಇದಾಗಿತ್ತು. ಆಕೆ ‘ನಾನು ಭಾರತೀಯ ಪ್ರಜೆ. ನಮ್ಮ ಸಂವಿಧಾನದ ಜಾತ್ಯತೀತ ಮೌಲ್ಯಗಳನ್ನು ನಾನು ಬೆಂಬಲಿಸುತ್ತೇನೆ’ ಎಂಬ ಫಲಕ ಹಿಡಿದ ಫೋಟೋವನ್ನು ಸಾಮಾಜಿಕ ಜಾಲತಾಣದಲ್ಲಿ ಪೋಸ್ಟ್‌ ಮಾಡಿಕೊಂಡಿದ್ದರು.

ಇದನ್ನೇ ತಿರುಚಿದ ಪಾಕಿಸ್ತಾನ್‌ ಡಿಫೆನ್ಸ್‌ ಆ ಫೋಟೋವನ್ನು ಭಾರತ ವಿರೋಧಿ ಸಂದೇಶ ಬಿತ್ತರಿಸಲು ಬಳಸಿಕೊಂಡಿತ್ತು. ಈ ಪ್ರಮಾದ ಅರಿವಿಗೆ ಬಂದ ಸ್ವಲ್ಪ ಹೊತ್ತಿನ ಬಳಿಕ ಪಾಕ್ ರಕ್ಷಣಾ ಇಲಾಖೆ ಆ ಪೋಸ್ಟನ್ನು ಅಳಿಸಿಹಾಕಿತು. ಆದರೆ ಇದು ಟ್ವಿಟರ್‌ ಗಮನಕ್ಕೆ ಬರುತ್ತಿದ್ದಂತೆಯೇ ಆ ಖಾತೆಯನ್ನೇ ಅಮಾನತುಗೊಳಿಸಿತು.

ಪಾಕಿಸ್ತಾನ್‌ ಡಿಫೆನ್ಸ್‌ ಸರಕಾರದ ಜತೆಗೆ ಯಾವುದೇ ಸಂಬಂಧ ಹೊಂದಿಲ್ಲ. ಹಾಗಿದ್ದರೂ ‘ಪಾಕಿಸ್ತಾನದ ರಕ್ಷಣೆ, ವ್ಯೂಹಾತ್ಮಕ ವ್ಯವಹಾರಗಳು, ಭದ್ರತಾ ವಿಷಯಗಳು, ವಿಶ್ವ ರಕ್ಷಣೆ ಮತ್ತು ಮಿಲಿಟರಿ ವ್ಯವಹಾರಗಳ ಸಮಗ್ರ ಸಂಪನ್ಮೂಲ ಕೇಂದ್ರ’ ಎಂದು ತನ್ನನ್ನು ತಾನು ಬಣ್ಣಿಸಿಕೊಳ್ಳುತ್ತಿದೆ.

ಆಗಾಗ್ಗೆ ಈ ವೆಬ್‌ ಪೋರ್ಟಲ್‌ ಭಾರತ ವಿರೋಧಿ ವಿಚಾರಗಳನ್ನು ಬಿತ್ತರಿಸುತ್ತಿದೆ. ಅಲ್ಲದೆ ಪಾಕಿಸ್ತಾನದ ಸಶಸ್ತ್ರಪಡೆಗಳು ಮತ್ತು ಬೇಹುಗಾರಿಕೆ ಸಂಸ್ಥೆಗಳಿಗೆ ನೆರವಾಗುವ ಪಾಕ್ ಪತ್ರಕರ್ತರು ಮತ್ತು ಕಾರ್ಯಕರ್ತರ ವಿರುದ್ಧ ಅವಹೇಳನಕಾರಿ ಅಭಿಯಾನಗಳನ್ನು ನಡೆಸುತ್ತದೆ.

ಭಾರತ ವಿರೋಧಿ ಅಪಪ್ರಚಾರಕ್ಕೆ ಪಾಕಿಸ್ತಾನ ಈ ರೀತಿ ತಿರುಚಿದ ಮಾಹಿತಿಗಳನ್ನು ಬಳಸಿಕೊಳ್ಳು ತ್ತಿರುವುದು ಹೊಸತೇನಲ್ಲ. ಕಳೆದ ಸೆಪ್ಟೆಂಬರ್‌ನಲ್ಲಿ ವಿಶ್ವಸಂಸ್ಥೆಯ ಪಾಕ್‌ ಪ್ರತಿನಿಧಿ ಮಲೀಹಾ ಲೋಧಿ, ಭಾರತದ ವಿದೇಶಾಂಗ ಸಚಿವೆ ಸುಷ್ಮಾ ಸ್ವರಾಜ್ ಅವರ ಭಾಷಣಕ್ಕೆ ಉತ್ತರಿಸುತ್ತ ಗಾಯಗೊಂಡ ಪಾಕ್‌ ಹುಡುಗಿಯೊಬ್ಬಳ ಫೋಟೋವನ್ನು ಪ್ರದರ್ಶಿಸಿ, ಕಾಶ್ಮೀರದಲ್ಲಿ ಭಾರತ ನಡೆಸುತ್ತಿರುವ ದೌರ್ಜನ್ಯಕ್ಕೆ ಸಾಕ್ಷಿ ಎಂದು ಹೇಳಿಕೊಂಡಿದ್ದರು. ಆದರೆ ಅದು ರೂಪಾಂತರಿಸಿದ ಚಿತ್ರ ಎಂಬುದನ್ನು ಭಾರತ ಅದೇ ವೇದಿಕೆಯಲ್ಲಿ ಸಾಬೀತುಪಡಿಸಿತ್ತು.

ಭಯೋತ್ಪಾದಕರ ಸ್ವರ್ಗವಾಗಿರುವ ಪಾಕಿಸ್ತಾನ ಜಗತ್ತಿನ ಗಮನವನ್ನು ಬೇರೆಡೆ ಸೆಳೆಯಲು ಭಾರತದ ವಿರುದ್ಧ ಇಂತಹ ಅಪಪ್ರಚಾರ ನಡೆಸುತ್ತಿದೆ ಎಂದು ಭಾರತ ಆಗಲೇ ತಿರುಗೇಟು ನೀಡಿರುವುದನ್ನು ಇಲ್ಲಿ ನೆನಪಿಸಿಕೊಳ್ಳಬಹುದು.