ಹೊಸದಿಲ್ಲಿ: ಸಾಮಾಜಿಕ ಜಾಲತಾಣಗಳಲ್ಲಿ ಲೈವ್ ಸ್ಟ್ರೀಮಿಂಗ್ ಮಾಡುವ ಮೂಲಕ ಆತ್ಮಹತ್ಯೆಗೆ ಯತ್ನಿಸಿದ ಯುವಕನನ್ನು ನೆರೆ ಮನೆಯವರು ರಕ್ಷಿಸಿದ್ದಾರೆ.
ಆದರೆ ಆತನ ಸಹೋದರ ಹಾಗೂ ನೆರೆಹೊರೆಯುವರು ತಕ್ಷಣ ಕಾರ್ಯಪ್ರವೃತ್ತರಾಗಿ ನಡೆಸಿದ ಕಾರ್ಯಾಚರಣೆಯಿಂದ ಯುವಕ ಪ್ರಾಣಾಪಾಯದಿಂದ ಪಾರಾಗಿದ್ದಾನೆ.
ಜೀವನದಲ್ಲಿ ಜುಗುಪ್ಸೆಗೊಂಡಿಂದ್ದ ಹೊಸದಿಲ್ಲಿಯ 26 ವರ್ಷದ ಯುವಕ ಆತ್ಮಹತ್ಯೆ ಮಾಡಿಕೊಳ್ಳಲು ಯತ್ನಿಸಿದ. ತನ್ನ ಆತ್ಮಹತ್ಯೆಯನ್ನು ಸಾಮಾಜಿಕ ಜಾಲತಾಣದಲ್ಲಿ ಲೈವ್ ಸ್ಟ್ರೀಮಿಂಗ್ ಮಾಡಲು ಯುವಕ ಯತ್ನಿಸಿದ.
ಅಂಕಿತ್‌ ವರ್ಮಾ (ಹೆಸರು ಬದಲಿಸಲಾಗಿದೆ) ತನ್ನ ಪಾಲಕರು ಹಾಗೂ ಸಹೋದರನ ಜತೆ ವಾಸವಾಗಿದ್ದ. ಜೀವನದಲ್ಲಿ ಸೂಕ್ತ ಅವಕಾಶಗಳು ಸಿಗದೆ, ಜುಗುಪ್ಸೆಗೊಂಡಿದ್ದೇನೆ. ಹೀಗಾಗಿ ಆತ್ಮಹತ್ಯೆ ಮಾಡಿಕೊಳ್ಳಲು ನಿರ್ಧರಿಸಿದ್ದೇನೆ. ನನ್ನನ್ನು ಎಲ್ಲರೂ ಕ್ಷಮಿಸಿ ಎಂದು ಡೆತ್‌ನೋಟ್‌ ಬರೆದು ಆತ್ಮಹತ್ಯೆಗೆ ಯತ್ನಿಸಿದ್ದಾನೆ.
ಇದರ ಲೈವ್ ಸ್ಟ್ರೀಮಿಂಗ್ ಮಾಡಿ, ತನ್ನ ಸಮಸ್ಯೆಗಳನ್ನೆಲ್ಲ ಹೇಳಿಕೊಂಡ. ಆರಂಭದಲ್ಲಿ ಇದನ್ನು ಯಾರೂ ವೀಕ್ಷಿಸಲಿಲ್ಲ. ಈತನ ಸ್ನೇಹಿತೆ ರೀನಾ ಕೆಲಸದಿಂದ ಬಂದು ಇದನ್ನು ವೀಕ್ಷಿಸಿದ್ದಾಳೆ. ಕೂಡಲೇ ಅಂಕಿತ್‌ ಸಹೋದರ ಅಮಿತ್‌ಗೆ ಮಾಹಿತಿ ನೀಡಿದ್ದಾರೆ.
ಛತ್ರಪುರದಲ್ಲಿದ್ದ ಅಮಿತ್‌ ಕೂಡಲೇ ನೆರೆ ಮನೆಯವರಿಗೆ ದೂರವಾಣಿ ಮಾಡಿ ಸಹಾಯ ಮಾಡುವಂತೆ ಕೋರಿದ್ದಾರೆ. ಆವರು ಕೂಡಲೇ ಮನೆಗೆ ಬಂದು ಕೊಠಡಿಯ ಬಾಗಿಲು ಒಡೆದು ನುಗ್ಗಿದ್ದಾರೆ. ಆಗಲೇ ಫ್ಯಾನ್‌ಗೆ ನೇಣು ಹಾಕಿಕೊಂಡಿದ್ದ ಅಂಕಿತ್‌ ನೇತಾಡುತ್ತಿದ್ದ. ಕೂಡಲೇ ಹಗ್ಗವನ್ನು ಬಿಚ್ಚಿ ಪ್ರಥಮ ಚಿಕಿತ್ಸೆ ಕೊಡಿಸಿ ಆಸ್ಪತ್ರೆಗೆ ಕೊಂಡೊಯ್ಯಲಾಯಿತು.
ಸೂಕ್ತ ಚಿಕಿತ್ಸೆ ಕೊಡಿಸಿದ ಬಳಿಕ ಅಂಕಿತ್‌ ವರ್ಮಾ ಚೇತರಿಸಿಕೊಂಡಿದ್ದಾನೆ ಎಂದು ವೈದ್ಯರು ತಿಳಿಸಿದ್ದಾರೆ.
ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ಅಂಕಿತ್‌ ಸಹೋದರ, ನೆರೆಮನೆಯವರನ್ನು ವಿಚಾರಣೆಗೊಳಪಡಿಸಿ ಮಾಹಿತಿ ಪಡೆದರು. ಅಂಕಿತ್‌ ವರ್ಮಾನ ಲೈವ್ ಸ್ಟ್ರೀಮಿಂಗ್ ಕೂಡ ವೀಕ್ಷಿಸಲಾಗಿದೆ ಎಂದು ದಿಲ್ಲಿ ಪೊಲೀಸ್‌ ವರಿಷ್ಠಾಧಿಕಾರಿ ಚಿನ್ಮಯ್‌ ಬಿಸ್ವಾಲ್‌ ತಿಳಿಸಿದ್ದಾರೆ.
Comments are closed.