ಯಾವುದೇ ನಟಿಗೆ ಗ್ಲಾಮರ್‌ ಬಗ್ಗೆ ಹೆಚ್ಚು ಕಾಳಜಿ ಇರುತ್ತದೆ. ತಾವು ಕ್ಯಾಮರಾ ಮುಂದೆ ಹೇಗೆ ಕಾಣುತ್ತಿದ್ದೇವೆ ಎಂಬುದರ ಬಗ್ಗೆ ಸಾಕಷ್ಟು ಎಚ್ಚರಿಕೆ ವಹಿಸುತ್ತಾರೆ. ಸಿನಿಮಾ ಮಾತ್ರವಲ್ಲದೆ ಸೋಶಿಯಲ್‌ ಮೀಡಿಯಾದಲ್ಲಿ ಫೋಟೋಗಳನ್ನು ಅಪ್‌ಲೋಡ್‌ ಮಾಡುವಾಗಲೂ ಮೇಕಪ್‌ ಮೆತ್ತಿಕೊಂಡ ಫೋಟೋವನ್ನೇ ಆಯ್ಕೆ ಮಾಡುತ್ತಾರೆ. ಆದರೆ ಈ ಮಾತನ್ನು ನಟಿ ಕೀರ್ತಿ ಸುರೇಶ್‌ ಅವರಿಗೆ ಅನ್ವಯಿಸೋಕೆ ಆಗಲ್ಲ.
ದಕ್ಷಿಣ ಭಾರತದಲ್ಲಿ ಸಾಕಷ್ಟು ಜನಪ್ರಿಯತೆ ಗಿಟ್ಟಿಸಿರುವ ಕೀರ್ತಿ ಅವರನ್ನು ಕಂಡರೆ ಅಭಿಮಾನಿಗಳಿಗೆ ವಿಶೇಷ ಪ್ರೀತಿ. ಅದಕ್ಕೆ ಕಾರಣ ಅವರ ಸರಳತೆ. ಬೇರೆ ನಟಿಯರು ಅಂದ-ಚಂದಕ್ಕಾಗಿ ಮೇಕಪ್‌ನ ಮೊರೆ ಹೋದರೆ ಕೀರ್ತಿ ಸುರೇಶ್‌ ಮಾತ್ರ ಮೇಕಪ್‌ ಇಲ್ಲದೆಯೇ ಪೋಸ್ ನೀಡಲು ಯಾವತ್ತೂ ಹಿಂದೇಟು ಹಾಕುವವರಲ್ಲ. ಅವರ ಸೋಶಿಯಲ್‌ ಮೀಡಿಯಾ ಖಾತೆಯಲ್ಲಿ ಮೇಕಪ್‌ ರಹಿತ ಅನೇಕ ಫೋಟೋಗಳನ್ನು ನೀವು ಕಾಣಬಹುದು.
ಅದೇ ಕಾರಣಕ್ಕೆ ಜನರು ಅವರನ್ನು ತುಂಬ ಇಷ್ಟಪಡುತ್ತಾರೆ. ಇತ್ತೀಚೆಗೆ ಇನ್‌ಸ್ಟಾಗ್ರಾಮ್‌ನಲ್ಲಿ ಕೀರ್ತಿ ಸುರೇಶ್‌ ಒಂದು ಮೈಲಿಗಲ್ಲು ಸಾಧಿಸಿದ್ದಾರೆ. ಅವರನ್ನು ಫಾಲೋ ಮಾಡುವವರ ಸಂಖ್ಯೆ ಬರೋಬ್ಬರಿ 5 ಮಿಲಿಯನ್‌, ಅಂದರೆ 50 ಲಕ್ಷಕ್ಕೆ ಏರಿದೆ. ಈ ಖುಷಿಯನ್ನು ಹಂಚಿಕೊಳ್ಳುವ ಸಂದರ್ಭದಲ್ಲಿಯೂ ಮೇಕಪ್‌ ರಹಿತ ಫೋಟೋವನ್ನೇ ಕೀರ್ತಿ ಪೋಸ್ಟ್‌ ಮಾಡಿದ್ದಾರೆ ಎಂಬುದು ವಿಶೇಷ.
ಕಾಡಿಗೆ, ಲಿಪ್‌ಸ್ಟಿಕ್‌ ಕೂಡ ಇಲ್ಲ. ಅಷ್ಟೇ ಯಾಕೆ, ಅವರು ಕೇಶ ವಿನ್ಯಾಸವನ್ನೂ ಮಾಡಿಕೊಂಡಿಲ್ಲ. ತುಂಬ ಸಿಂಪಲ್‌ ಆಗಿ ಕ್ಯಾಮರಾ ಮುಂದು ಬಂದು ಒಂದು ವಿಡಿಯೋ ಮೂಲಕ ಅಭಿಮಾನಿಗಳಿಗೆ ಧನ್ಯವಾದ ತಿಳಿಸಿದ್ದಾರೆ. ಅವರ ಜೊತೆಗೆ ಮುದ್ದಿನ ನಾಯಿ ಕೂಡ ಸಾಥ್‌ ನೀಡಿದೆ. 5 ಮಿಲಿಯನ್‌ ಮೈಲಿಗಲ್ಲು ಸಾಧಿಸಿರುವುದಕ್ಕೆ ಎಲ್ಲರೂ ಕೀರ್ತಿಗೆ ಅಭಿನಂದನೆ ಸಲ್ಲಿಸುತ್ತಿದ್ದಾರೆ.
ನಟಿ ಸಾವಿತ್ರಿ ಜೀವನಾಧಾರಿತ ‘ಮಹಾನಟಿ’ ಸಿನಿಮಾದ ಯಶಸ್ಸಿನ ಬಳಿಕ ಕೀರ್ತಿ ಅಭಿಮಾನಿ ಬಳಗ ದೊಡ್ಡದಾಯಿತು. ಆ ಸಿನಿಮಾದಲ್ಲಿನ ನಟನೆಗೆ ಎಲ್ಲರಿಂದೂ ಮೆಚ್ಚುಗೆ ವ್ಯಕ್ತವಾಗಿತ್ತು. ‘ಅತ್ಯುತ್ತಮ ನಟಿ’ ರಾಷ್ಟ್ರ ಪ್ರಶಸ್ತಿ ಕೂಡ ಸಿಕ್ಕಿತು. ಈಗ ಅವರು ‘ಪೆಂಗ್ವಿನ್‌’ ಚಿತ್ರದಲ್ಲಿ ನಟಿಸಿದ್ದು, ಲಾಕ್‌ಡೌನ್‌ ಇರುವ ಕಾರಣ ನೇರವಾಗಿ ಓಟಿಟಿಯಲ್ಲಿ ಬಿಡುಗಡೆ ಆಗಲಿದೆ. ಇದರ ಜೊತೆಗೆ ಕೀರ್ತಿ ಕೈಯಲ್ಲಿ ಹಲವು ಸಿನಿಮಾಗಳಿವೆ.
Comments are closed.