ನಟಿ ನಿಕ್ಕಿ ತಂಬೋಲಿ ಮೊದಲು ಬಣ್ಣ ಹಚ್ಚಿದ್ದು ತಮಿಳಿನ ‘ಕಾಂಚನ 3’ ಚಿತ್ರದಲ್ಲಿ. ರಾಘವ ಲಾರೆನ್ಸ್ ನಟಿಸಿ, ನಿರ್ದೇಶಿಸಿದ್ದ ಈ ಸಿನಿಮಾ ಬಾಕ್ಸ್ ಆಫೀಸ್‌ನಲ್ಲಿ ಸಿಕ್ಕಾಪಟ್ಟೆ ಕಲೆಕ್ಷನ್ ಮಾಡಿತ್ತು. ಇದೀಗ ನಿಕ್ಕಿ ಕನ್ನಡಕ್ಕೂ ಎಂಟ್ರಿ ನೀಡಿದ್ದಾರೆ. ಅವರ ನಟಿಸಿರುವ ಮೊದಲ ಸಿನಿಮಾವೇ ದ್ವಿಭಾಷೆಯಲ್ಲಿ ಮೂಡಿಬಂದಿದೆ ಎಂಬುದು ವಿಶೇಷ. ಆ ಸಿನಿಮಾ ಯಾವುದು? ಇಲ್ಲಿದೆ ಮಾಹಿತಿ.
ಕನ್ನಡದಲ್ಲಿ ಸಿದ್ಧಗೊಂಡಿರುವ ‘ತಿರುಗ್ಸೋ ಮೀಸೆ’ ಚಿತ್ರದಲ್ಲಿ ನಾಯಕಿಯಾಗಿ ನಿಕ್ಕಿ ನಟಿಸಿದ್ದಾರೆ. ಈ ಸಿನಿಮಾ ಕನ್ನಡ ಮತ್ತು ತೆಲುಗು ಭಾಷೆಗಳಲ್ಲಿ ಏಕಕಾಲಕ್ಕೆ ನಿರ್ಮಾಣ ಆಗಿದೆ ಎನ್ನುವುದು ವಿಶೇಷ. ಇಲ್ಲಿ ನಿಕ್ಕಿ ಎರಡು ಶೇಡ್‌ ಇರುವಂಥ ಪಾತ್ರ ನಿರ್ವಹಿಸುತ್ತಿದ್ದು, ಸಿನಿಮಾದ ಮೊದಲರ್ಧ ಸಿಂಪಲ್‌ ಹುಡುಗಿ, ದ್ವಿತೀಯಾರ್ಧದಲ್ಲಿ ಪೊಲೀಸ್‌ ಆಫೀಸರ್‌ ಆಗಿ ಕಾಣಿಸಿಕೊಳ್ಳಲಿದ್ದಾರಂತೆ. ‘ನಿರ್ದೇಶಕರು ಆಡಿಷನ್‌ ಮಾಡಿದ್ದರು. ಅದರಲ್ಲಿ ನಾನು ಭಾಗಿಯಾಗಿದ್ದೆ. ಈ ಸಿನಿಮಾದಲ್ಲಿ ಪಾತ್ರ ಮಾಡಿದ ನಂತರ ಕನ್ನಡ ಕಲಿಯುತ್ತಿದ್ದೇನೆ. ಸ್ಯಾಂಡಲ್‌ವುಡ್‌ನಲ್ಲೇ ನೆಲೆಯೂರುವ ಆಸೆ ಕೂಡ ಇದೆ’ ಎಂದಿದ್ದಾರೆ ನಿಕ್ಕಿ.
ತೆಲುಗು, ತಮಿಳು ಮತ್ತು ಕನ್ನಡದಲ್ಲಿ ಕೆಲಸ ಮಾಡಿರುವ ಅವರಿಗೆ ಮುಂದಿನ ದಿನಗಳಲ್ಲಿ ಬಾಲಿವುಡ್‌ಗೂ ಹಾರುವ ಆಸೆ ಇದೆಯಂತೆ. ಟಾಲಿವುಡ್‌ ಮೂಲದ ನಿರ್ದೇಶಕ ಕೃಷ್ಣ ವಿಜಯ್ ಈ ಸಿನಿಮಾಗೆ ಆ್ಯಕ್ಷನ್‌-ಕಟ್‌ ಹೇಳಿದ್ದಾರೆ. ನಾಯಕನಾಗಿ ಶ್ರೀವಿಷ್ಣು ನಟಿಸಿದ್ದಾರೆ. ‘ನನಗೆ ಕನ್ನಡ ಬರಲ್ಲ, ಆದ್ರೆ ಮುಂದಿನ ಸಿನಿಮಾ ಹೊತ್ತಿಗೆ ಕನ್ನಡ ಕಲಿಯುತ್ತೇನೆ. ನಾನು ರಾಹುಲ್ ದ್ರಾವಿಡ್ ಅಭಿಮಾನಿ, ನನಗೆ ಬೆಂಗಳೂರು ಅಂದ್ರೆ ಇಷ್ಟ’ ಎಂದು ಸಿಲಿಕಾನ್ ಸಿಟಿಯ ಪ್ರೀತಿಯನ್ನು ಬಿಚ್ಚಿಡುತ್ತಾರೆ ಶ್ರೀವಿಷ್ಣು. ‘ನಮ್ಮ ಸಿನಿಮಾ ಯುವಜನತೆಯ ಇಷ್ಟಪಡುವಂತಿದೆ. ನಾನು ಈ ಚಿತ್ರದಲ್ಲಿ ವಿಭಿನ್ನ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದೇನೆ’ ಎನ್ನುತ್ತಾರವರು. ಬೆಂಗಳೂರು, ಹಿಂದೂಪುರ, ಅನಂತಪುರ ಹಾಗೂ ಹೈದರಾಬಾದ್‍ನಲ್ಲಿ ಚಿತ್ರೀಕರಣ ಮಾಡಲಾಗಿದೆ.
ಪೋಷಕ ಪಾತ್ರಗಳಲ್ಲಿ ಶ್ರೀಕಾಂತ್ ಅಯ್ಯಂಗಾರ್, ಕೆಂಪೇಗೌಡ, ರೋಹಿಣಿ, ರವಿವರ್ಮ ಮುಂತಾದವರು ಅಭಿನಯಿಸಿದ್ದಾರೆ. ಶ್ರೀನಿವಾಸ ಮೂವೀಸ್ ಹಾಗೂ ರಿಜ್ವಾನ್ ಎಂಟರ್ಟೈನ್ಮೆಂಟ್ ಬ್ಯಾನರ್‌ನಡಿಯಲ್ಲಿ ‘ತಿರುಗ್ಸೋ ಮೀಸೆ’ ಚಿತ್ರವನ್ನು ನಿರ್ಮಾಣ ಮಾಡಲಾಗಿದೆ. ಹಾಡುಗಳಿಗೆ ವಿ. ಮನೋಹರ್, ರಾಘವೇಂದ್ರ ಕಾಮತ್ ಹಾಗೂ ಚಂದ್ರಶೇಖರ್ ಸಾಹಿತ್ಯ ಬರೆದಿದ್ದಾರೆ. ಕೃಷ್ಣ ವಿಜಯ್. ಎಲ್ ಕಥೆ ಬರೆದು ನಿರ್ದೇಶನ‌‌ವನ್ನೂ ಮಾಡಿದ್ದಾರೆ. ಚಿತ್ರಕ್ಕೆ ಸುರೇಶ್ ಬಾಬ್ಲಿ ಅವರ ಸಂಗೀತವಿದೆ. ಸಿದ್ದು ಅವರ ಛಾಯಾಗ್ರಹಣ, ಧರ್ಮೇಂದ್ರ ಸಂಕಲನವಿದೆ.
Comments are closed.