ರಶ್ಮಿಕಾ ಮಂದಣ್ಣ ಚಿತ್ರಕ್ಕೆ ಸಾಥ್ ಕೊಟ್ಟ ಅನಂತ್ ನಾಗ್

ಕನ್ನಡದ ಹಿರಿಯ ನಟ ಅನಂತ್‌ ನಾಗ್ ಕನ್ನಡ ಸೇರಿದಂತೆ ಹಿಂದಿ, ಮರಾಠಿ, ತೆಲುಗು, ತಮಿಳು, ಇಂಗ್ಲಿಷ್ ಸಿನಿಮಾಗಳಲ್ಲೂ ಅಭಿನಯಿಸಿದ್ದಾರೆ. ಇವರು ಬಹುಬೇಡಿಕೆಯ ನಟರೂ ಹೌದು.

ರಶ್ಮಿಕಾ ಮಂದಣ್ಣ ಸಿನಿಮಾದಲ್ಲಿ ಅನಂತ್‌ನಾಗ್‌
ಬೇರೆ ಭಾಷೆಗಳಿಗಿಂತ ಕನ್ನಡ ಸಿನಿಮಾಗಳಲ್ಲಿ ನಟಿಸಿದ್ದೇ ಹೆಚ್ಚು. ಅವರ ಕೈಯಲ್ಲಿ ಹಲವಾರು ಕನ್ನಡ ಸಿನಿಮಾಗಳಿವೆ. ವಿಶೇಷವೇನೆಂದರೆ ಅವರು ತೆಲುಗು ಸಿನಿಮಾವೊಂದರಲ್ಲಿ ನಟಿಸುತ್ತಿದ್ದಾರೆ. ಅದು ನಾಲ್ಕು ದಶಕಗಳ ಬಳಿಕ. ತೆಲುಗಿನ ‘ಭೀಷ್ಮ’ ಸಿನಿಮಾದಲ್ಲಿ ಅನಂತ್‌ ನಾಗ್ ನಟಿಸುತ್ತಿದ್ದಾರೆ. ಈ ಚಿತ್ರದಲ್ಲಿ ನಿತಿನ್, ರಶ್ಮಿಕಾ ಮಂದಣ್ಣ ನಾಯಕ-ನಾಯಕಿಯಾಗಿ ನಟಿಸುತ್ತಿದ್ದಾರೆ. ಆಹಾರ ಕಲಬೆರಕೆ ಕುರಿತ ಕಥೆ ಆಧಾರಿತ ಸಿನಿಮಾವಿದು. ನಿರ್ದೇಶಕ ವೆಂಕಿ ಕುದುಮುಲ ಈ ಚಿತ್ರ ನಿರ್ದೇಶನ ಮಾಡುತ್ತಿದ್ದಾರೆ. ಸಾವಯವ ಕೃಷಿಕನ ಪಾತ್ರದಲ್ಲಿ ಅನಂತ್‌ ನಾಗ್ ಕಾಣಿಸಿಕೊಳ್ಳಲಿದ್ಧಾರೆ. ಇದು ಚಿತ್ರದ ಪ್ರಮುಖ ಪಾತ್ರಗಳಲ್ಲಿ ಒಂದಾಗಿರಲಿದೆಯಂತೆ.

‘ಭೀಷ್ಮ’ ಶೂಟಿಂಗ್ ಕಥೆ ಎಲ್ಲಿಗೆ ಬಂತು?
‘ಭೀಷ್ಮ’ ಸಿನಿಮಾದಲ್ಲಿ ಅವರ ದೃಶ್ಯಗಳ ಶೂಟಿಂಗ್ ಮುಕ್ತಾಯವಾಗಿದೆ. ಕ್ಲೈಮ್ಯಾಕ್ಸ್‌ ಭಾಗದಲ್ಲಿ ಅನಂತ್‌ ನಾಗ್ ಭಾಗವಹಿಸಬೇಕಿದೆ. “ಈ ಚಿತ್ರದಲ್ಲಿ ಅನಂತ್‌ ನಾಗ್ ಬಿಟ್ಟರೆ ಬೇರೆ ಯಾರೂ ಸೂಕ್ತರಾಗೋದಿಲ್ಲ, ಅವರೇ ಈ ಚಿತ್ರದಲ್ಲಿ ನಟಿಸಬೇಕು” ಎಂಬುದು ನಿರ್ದೇಶಕ ವೆಂಕಿ ಕುದುಮುಲ ಅವರ ಆಸೆಯಾಗಿತ್ತು. ಹೀಗಾಗಿ ಡೈಲಾಗ್ಸ್ ಎಲ್ಲವನ್ನು ಕನ್ನಡದಲ್ಲಿ ನಿರ್ದೇಶಕರು ಬರೆದುಕೊಂಡು ಅನಂತ್‌ನಾಗ್ ಮುಂದೆ ಬಂದಿದ್ದರು. ಒಂದೆರೆಡು ಸುತ್ತಿನ ಮಾತುಕತೆ ಆದ ನಂತರ ಅನಂತ್‌ನಾಗ್ ಒಪ್ಪಿಗೆ ಸೂಚಿಸಿದರಂತೆ.

ಅನಂತ್‌ನಾಗ್ ಅವರ ತೆಲುಗು ಸಿನಿಮಾ ಯಾವುವು?
1970ರ ಸಮಯದಲ್ಲಿ ಮೂಡಿಬಂದ ‘ಅನುಗ್ರಹಂ’, ‘ಪ್ರೇಮಲೇಖಲು’ ಸಿನಿಮಾಗಳಲ್ಲಿ ನಟಿಸಿದ್ದರು. ತದನಂತರದಲ್ಲಿ ಅನಂತ್‌ ನಾಗ್ ಟಾಲಿವುಡ್‌ನತ್ತ ಮುಖ ಮಾಡಲೇ ಇಲ್ಲ. ತುಂಬ ದೊಡ್ಡ ಗ್ಯಾಪ್ ನಂತರದಲ್ಲಿ ‘ಭೀಷ್ಮ’ ಸಿನಿಮಾದಲ್ಲಿ ಇವರೀಗ ನಟಿಸುತ್ತಿದ್ದಾರೆ. ಹೀಗಾಗಿ ಈ ಚಿತ್ರದ ಮೇಲೆ ಸಹಜವಾಗಿ ನಿರೀಕ್ಷೆ ಹೆಚ್ಚಿದೆ.