ವಾಷಿಂಗ್ಟನ್‌: ಅಮೆರಿಕದ ಖ್ಯಾತ ಗಾಯಕಿ ಅರೆತಾ ಫ್ರಾಂಕ್ಲಿನ್‌ ಅವರ ಅಂತ್ಯಕ್ರಿಯೆ ಕಾರ್ಯಕ್ರಮದಲ್ಲಿ ಗಾಯಕಿ ಅರಿಯಾನ ಗ್ರಾಂಡೆ ಅವರ ಎದೆಯ ಭಾಗ ಮುಟ್ಟಿ ಖಂಡನೆಗೆ ಗುರಿಯಾಗಿದ್ದ ಬಿಷಪ್‌ ಮೂರನೇ ಚಾರ್ಲ್ಸ್ ಎಚ್‌. ಎಲ್ಲಿಸ್‌ ಅವರು ಗಾಯಕಿಯ ಕ್ಷಮೆ ಕೋರಿದ್ದಾರೆ.
ಡೆಟಾಯಿಟ್‌ನ ಗ್ರೇಟರ್‌ ಗ್ರೇಸ್‌ ಚರ್ಚಿನಲ್ಲಿ ನಡೆದ ಅಂತ್ಯಕ್ರಿಯೆ ಸಮಾರಂಭದಲ್ಲಿ ಅರೆತಾ ಅವರಿಗೆ ಶ್ರದ್ಧಾಂಜಲಿ ಸೂಚಕವಾಗಿ ಗಾಯಕಿ ಅರಿಯಾನ ಗ್ರಾಂಡೆ ಅವರು ಕೆಲವು ಹಾಡುಗಳನ್ನು ಹಾಡಿದರು. ಈ ವೇಳೆ ವೇದಿಕೆಗೆ ಗಾಯಕಿಯನ್ನು ಬಿಷಪ್‌ ಚಾರ್ಲ್ಸ್ ಅವರು ತೀರ ಆತ್ಮೀಯವಾಗಿ ಬರಮಾಡಿಕೊಂಡರು. ಆ ಸಮಯದಲ್ಲಿ ಬೆನ್ನಿನ ಮೂಲಕ ಎದೆಯ ಭಾಗಕ್ಕೆ ಅವರ ಬಲಕೈ ಸೋಕಿಸಿ, ಆಕೆಯನ್ನು ಅಭಿನಂದಿಸಿದರು. ಇದು ಸಾಮಾಜಿಕ ಜಾಲತಾಣದಲ್ಲಿ ವೈರಲ್‌ ಆಗಿದ್ದು, ಮಹಿಳೆಯನ್ನು ಗೌರವಿಸಿ ಎಂಬ ಹ್ಯಾಷ್‌ಟ್ಯಾಗ್‌ನೊಂದಿಗೆ ಬಿಷಪ್‌ ಅವರ ನಡೆಯನ್ನು ಅನೇಕರು ತೀವ್ರವಾಗಿ ಖಂಡಿದ್ದಾರೆ.
ಇದಕ್ಕೆ ಬಿಷಪ್‌ ಚಾರ್ಲ್ಸ್ ಅವರು ಪ್ರತಿಕ್ರಿಯಿಸಿದ್ದು, ”ಯಾವುದೇ ಮಹಿಳೆಯ ಎದೆಯ ಭಾಗವನ್ನು ಮುಟ್ಟುವುದು ನನ್ನ ಉದ್ದೇಶವಾಗಿರಲಿಲ್ಲ. ಆದರೂ ಅರಿಯಾನ ವಿಷಯದಲ್ಲಿ ಮಿತಿ ಮೀರಿ ಆತ್ಮೀಯವಾಗಿ ವರ್ತಿಸಿದ್ದಕ್ಕಾಗಿ ಅವರ ಕ್ಷಮೆ ಕೇಳುತ್ತೇನೆ. ಜತೆಗೆ ಅವರ ಹೆಸರನ್ನು ತಪ್ಪಾಗಿ ಉಚ್ಚರಿಸಿದ್ದಕ್ಕಾಗಿ ಸಹ ಅವರ ಮತ್ತು ಅವರ ಅಭಿಮಾನಿಗಳ ಕ್ಷಮೆಯಾಚಿಸುತ್ತೇನೆ,” ಎಂದು ಹೇಳಿದ್ದಾರೆ.
Comments are closed.