ನಟ ದರ್ಶನ್ ‘ಮಿಸ್ಟರ್ ಐರಾವತ’ ಚಿತ್ರವನ್ನು ಮುಗಿಸಿದ್ದಾರೆ. ಅದರ ಚಿತ್ರೀಕರಣೋತ್ತರ ಕೆಲಸಗಳಿಗೆ ನಿರ್ದೇಶಕ ಎ.ಪಿ. ಅರ್ಜುನ್ ಚಾಲನೆ ನೀಡಿದ್ದಾರೆ. ಈ ಮಧ್ಯೆ ನಿಂತುಹೋಗಿದ್ದ ‘ವಿರಾಟ್’ ಶೂಟಿಂಗ್ನಲ್ಲೂ ದರ್ಶನ್ ಭಾಗಿಯಾಗಿದ್ದರು. ಸದ್ಯ ಎಲ್ಲರ ಚಿತ್ತ ‘ಜಗ್ಗುದಾದಾ’ ಕಡೆಗಿದೆ. ರಾಘವೇಂದ್ರ ಹೆಗಡೆ ಮೊದಲ ಬಾರಿಗೆ ಆಕ್ಷನ್-ಕಟ್ ಹೇಳುತ್ತಿರುವ ಈ ಚಿತ್ರಕ್ಕೆ ದರ್ಶನ್ ಹುಟ್ಟುಹಬ್ಬದಂದು ಮುಹೂರ್ತ ಮಾಡಲಾಗಿತ್ತು. ಆ ಬಳಿಕ ಹೆಚ್ಚೇನೂ ಮಾಹಿತಿ ಹೊರಬಂದಿರಲಿಲ್ಲ. ಇದೀಗ, ನಾಯಕಿ ಆಯ್ಕೆ ಮುಖೇನ ಸಣ್ಣಗೆ ಸೌಂಡು ಮಾಡುತ್ತಿದ್ದಾನೆ ‘ಜಗ್ಗುದಾದಾ’.
ಟಾಲಿವುಡ್ನ ‘ಮಿರಪಕಾಯ್’ ದೀಕ್ಷಾ ಸೇಠ್ಗೆ ದರ್ಶನ್ ಜೊತೆ ಡ್ಯುಯೆಟ್ ಹಾಡುವ ಅವಕಾಶ ಸಿಕ್ಕಿದೆ. ಮುಂದಿನ ವಾರದಿಂದ ಚಿತ್ರೀಕರಣ ಶುರು ಮಾಡಲು ನಿರ್ದೇಶಕರು ಮುಂಬೈನಲ್ಲಿ ಸಕಲ ಸಿದ್ಧತೆ ಮಾಡಿಕೊಂಡಿದ್ದಾರೆ. ಇನ್ನು, ದೀಕ್ಷಾ ಸೇಠ್ ಬಗ್ಗೆ ಗೊತ್ತಿಲ್ಲದವರು ತೆಲುಗಿನ ‘ಮಿರಪಕಾಯ್’, ‘ನಿಪ್ಪು’ ಚಿತ್ರಗಳನ್ನು ನೆನಪು ಮಾಡಿಕೊಳ್ಳಬೇಕು. ಆ ಚಿತ್ರಗಳಲ್ಲಿ ರವಿತೇಜ ಜತೆ ನಟಿಸಿದ್ದ ಈ ಬೆಡಗಿ, ವಿಕ್ರಮ್ ಅವರೊಂದಿಗೆ ತಮಿಳಿನಲ್ಲಿ ‘ರಾಜಪಟ್ಟೈ’ ಚಿತ್ರದಲ್ಲೂ ನಟಿಸಿದ್ದಾರೆ. ಸೈಫ್ ಅಲಿ ಖಾನ್ ನಿರ್ವಣದ ‘ಲೇಕರ್ ಹಮ್ ದೀವಾನಾ ದಿಲ್’ ಚಿತ್ರದ ಮೂಲಕ ಬಾಲಿವುಡ್ಗೂ ಪಾದ ಬೆಳಿಸಿದ್ದರು ದೀಕ್ಷಾ. ಇದೀಗ ದರ್ಶನ್ ಹೈಟ್ಗೆ ತಕ್ಕಂತಿರುವ ಅವರನ್ನು ನಿರ್ದೇಶಕ ರಾಘವೇಂದ್ರ ಓಕೆ ಮಾಡಿದ್ದಾರೆ.
ಇದಕ್ಕೂ ಮೊದಲು ‘ಮುಂಗಾರು ಮಳೆ 2’ ನಾಯಕಿ ನೇಹಾ ಶೆಟ್ಟಿಗೆ ‘ಜಗ್ಗುದಾದಾ’ ಚಿತ್ರದಲ್ಲಿ ನಟಿಸುವ ಅವಕಾಶ ಒದಗಿಬಂದಿತ್ತಾದರೂ, ಕಾರಣಾಂತರ ‘ನೋ’ ಅಂದಿದ್ದರಿಂದ ನಿರ್ದೇಶಕರು ಬೇರೆಯವರ ಹುಡುಕಾಟದಲ್ಲಿದ್ದರು ಎಂಬ ಮಾತುಗಳು ಕೇಳಿಬಂದಿದ್ದವು.
