ಭಾರತೀಯ ಕ್ರಿಕೆಟಿಗರ ಅರ್ಧ ತಲೆ ‘ಬೋಳಿಸಿದ’ ಬಾಂಗ್ಲಾ ಪತ್ರಿಕೆ

ಹೊಸದಿಲ್ಲಿ: ಬಾಂಗ್ಲಾದೇಶದಲ್ಲಿ ಸರಣಿ ಸೋತ ಬೆನ್ನಲ್ಲೇ ಟೀಮ್ ಇಂಡಿಯಾದ ಏಳು ಆಟಗಾರರನ್ನು ಬಾಂಗ್ಲಾದೇಶದ ಸ್ಥಳೀಯ ಪತ್ರಿಕೆಯೊಂದು ಸಭ್ಯತೆಯ ಎಲ್ಲೆ ಮೀರಿ ಗೇಲಿ ಮಾಡಿದೆ.

ಭಾರತ ಕ್ರಿಕೆಟ್ ತಂಡಕ್ಕೆ ಅಗೌರವ ತೋರಿಸುವ ರೀತಿಯಲ್ಲಿ ಏಳು ಆಟಗಾರರ ಅರ್ಧ ತಲೆ ಬೋಳಿಸಿರುವ ಚಿತ್ರವನ್ನು ಬಾಂಗ್ಲಾ ರಾಷ್ಟ್ರೀಯ ದೈನಿಕ ‘ಪ್ರೊಥೊಮ್ ಅಲೋ’ ಪತ್ರಿಕೆ ಪ್ರಕಟಿಸಿದೆ. ಏಕದಿನ ಸರಣಿಯ ವೇಳೆ ಬಾಂಗ್ಲಾದೇಶದ ಎಡಗೈ ಮಧ್ಯಮ ವೇಗಿ ಮುಸ್ತಾಫಿಜುರ್ ರಹ್ಮಾನ್ ಅವರ ಆಫ್ ಕಟ್ಟರ್ ಎಸೆತಗಳಿಗೆ ಟೀಮ್ ಇಂಡಿಯಾ ಬ್ಯಾಟ್ಸ್‌ಮನ್‌ಗಳು ವಿಕೆಟ್ ಒಪ್ಪಿಸಿದ್ದರು. ಇದನ್ನು ಸಾಂಕೇತಿಕವಾಗಿ ಬಿಂಬಿಸುವಂತೆ ಎಂ.ಎಸ್.ಧೋನಿ, ಅಜಿಂಕ್ಯ ರಹಾನೆ, ರೋಹಿತ್ ಶರ್ಮಾ, ವಿರಾಟ್ ಕೊಹ್ಲಿ, ರವೀಂದ್ರ ಜಡೇಜಾ, ಶಿಖರ್ ಧವನ್ ಮತ್ತು ಆರ್.ಅಶ್ವಿನ್‌ರ ಚಿತ್ರಗಳನ್ನು ಅರ್ಧ ತಲೆ ಬೋಳಿಸಿರುವ ರೀತಿಯಲ್ಲಿ ಪತ್ರಿಕೆಯಲ್ಲಿ ಪ್ರಕಟ ಮಾಡಲಾಗಿದೆ.

ಅಷ್ಟೇ ಅಲ್ಲದೆ, ಮುಸ್ತಾಫಿಜುರ್ ಕೈಯಲ್ಲಿ ಕಟರ್ ಹಿಡಿದುಕೊಂಡಿರುವ ಚಿತ್ರವನ್ನೂ ಪ್ರಕಟಿಸಲಾಗಿದೆ. ಟೀಮ್ ಇಂಡಿಯಾದ ಏಳು ಆಟಗಾರರು ಬ್ಯಾನರ್ ಒಂದನ್ನು ಕೈಯಲ್ಲಿ ಹಿಡಿದುಕೊಂಡಿದ್ದು, ಬ್ಯಾನರ್‌ನಲ್ಲಿ ‘ನಾವು ಉಪಯೋಗಿಸಿದ್ದೇವೆ, ನೀವೂ ಬಳಸಿ ನೋಡಿ’ ಎಂದು ಬಂಗಾಳಿ ಭಾಷೆಯಲ್ಲಿ ಬರೆಯಲಾಗಿದೆ.

ಬಾಂಗ್ಲಾದೇಶ ವಿರುದ್ಧದ ಏಕದಿನ ಸರಣಿಯನ್ನು ಟೀಮ್ ಇಂಡಿಯಾ 1-2ರ ಅಂತರದಲ್ಲಿ ಸೋತಿತ್ತು. ಆ ಸರಣಿಯಲ್ಲಿ ಮುಸ್ತಾಫಿಜುರ್ 13 ವಿಕೆಟ್ ಪಡೆದು ಧೋನಿಪಡೆಯ ಸೋಲಿಗೆ ಕಾರಣರಾಗಿದ್ದರು.