ಮುಂಬಯಿ: 65ರ ಮುದುಕ ಡೇಟಿಂಗ್ ಸೈಟ್‌ಗೆ ಹೋಗಿ ಮೂರೇ ದಿನದಲ್ಲಿ 46 ಲಕ್ಷ ರೂ. ಯನ್ನು ಕಳೆದುಕೊಂಡಿರುವ ಘಟನೆ ಮಹಾರಾಷ್ಟ್ರದ ಮುಂಬಯಿಯಲ್ಲಿ ನಡೆದಿದೆ. ಬಳಿಕ, ಕುರಾರ್ ಪೊಲೀಸರಿಗೆ ಮುದುಕ ದೂರು ನೀಡಿದ್ದು, ಅಪರಿಚಿತ ವ್ಯಕ್ತಿಗಳ ಮೇಲೆ ಆರೋಪ ದಾಖಲಿಸಲಾಗಿದೆ. ಈ ಸಂಬಂಧ ಪೊಲೀಸರು ಸಹ ವಂಚಕರನ್ನು ಸೆರೆಹಿಡಿಯಲು ಯತ್ನಿಸುತ್ತಿದ್ದಾರೆ.
ಫೆಬ್ರವರಿ 2019ರಲ್ಲಿ ಮುದುಕ ಪೊಲೀಸರಿಗೆ ದೂರು ನೀಡಿದ್ದು, ತನಿಖೆಗಳ ಬಳಿಕ ಮಾರ್ಚ್ 29ರಂದು ಪೊಲೀಸರು ಕೊನೆಗೂ ಎಫ್‌ಐಆರ್‌ ದಾಖಲಿಸಿಕೊಂಡಿದ್ದಾರೆ. www.locanto.net ಎಂಬ ಉಚಿತ ಕ್ಲಾಸಿಫೈಡ್ಸ್ ಸೈಟ್‌ನಲ್ಲಿ ಮುದುಕ 2018ರಲ್ಲಿ ವೆಬ್‌ಸೈಟ್‌ ಚೆಕ್‌ ಮಾಡುತ್ತಿರುವ ವೇಳೆ ಮನರಂಜನೆ ಎಂದು ಕ್ಲಿಕ್‌ ಮಾಡಿದ್ದಾರೆ. ನಂತರ, ಆ ವೆಬ್‌ಸೈಟ್‌ನಲ್ಲಿ ಅವರು ರಿಜಿಸ್ಟರ್ ಮಾಡಿಕೊಂಡಿದ್ದು, ನಂತರ ಮೀರಾ ಎಂಬ ಮಹಿಳೆ ತನಗೆ ಕಾಲ್‌ ಮಾಡಿದ್ದರು ಎಂದು ಮುದುಕ ಪೊಲೀಸರಿಗೆ ನೀಡಿದ ದೂರಿನಲ್ಲಿ ತಿಳಿಸಿದ್ದಾರೆ.
ಅಲ್ಲದೆ, ”ಮೀರಾ ಮೂವರು ಹುಡುಗಿಯರ ಫೋಟೋ ಕಳಿಸಿ ಒಂದನ್ನು ಆಯ್ಕೆ ಮಾಡಲು ಸೂಚಿಸಿದ್ರು. ನಾನು ಆಯ್ಕೆ ಮಾಡಿಕೊಂಡ ಬಳಿಕ ಹುಡುಗಿಯನ್ನು ಭೇಟಿ ಮಾಡಲು 25,500 ರೂ. ಹಣ ನೀಡಬೇಕು. ನಂತರ ಆಕೆಯನ್ನು ಒಂದು ವರ್ಷ ಕಾಲ ಡೇಟ್‌ ಮಾಡಬಹುದು” ಎಂದು ಅವರು ಹೇಳಿದ್ದರು. ಅಲ್ಲದೆ, ರಹಸ್ಯ ಒಪ್ಪಂದ, ವೀಡಿಯೊ ಕರೆ ವಿಮೆ ಮುಂತಾದ್ದಕ್ಕೆ 46 ಲಕ್ಷ ರೂ, ಕಟ್ಟಿಸಿಕೊಂಡರು” ಎಂದು ದೂರಿನಲ್ಲಿ ತಿಳಿಸಿದ್ದಾರೆ. ಜತೆಗೆ, ಹಣ ನೀಡಿದ ಬಳಿಕ ರೋಸಿ ತನ್ನ ಜತೆ ಎರಡು ಬಾರಿ ಮಾತನಾಡಿದ್ದರು ಅಷ್ಟೇ, ಬಳಿಕ ಕಾಲ್‌ ಮಾಡುವುದನ್ನು ಆಕೆ ನಿಲ್ಲಿಸಿದರು” ಎಂದೂ ಪೊಲೀಸರಿಗೆ ತಿಳಿಸಿದ್ದಾರೆ.
ಇನ್ನು, ವೆಬ್‌ಸೈಟ್‌ನ ಮತ್ತೊಂದು ವಿಭಾಗದಲ್ಲಿ ನೋಡುತ್ತಿರಬೇಕಾದರೆ, ತಾನು ರಿಜಿಸ್ಟರ್ ಮಾಡಿಕೊಂಡಿದ್ದ ಲಿಂಕ್ ಬಗ್ಗೆ ಹಲವರು ಋಣಾತ್ಮಕ ಕಾಮೆಂಟ್‌ಗಳನ್ನು ಮಾಡಿದ್ದರು. ನಂತರ, ತಾನು ಹಣ ವಾಪಸ್‌ ಪಡೆಯಲು ಮೀರಾ ಹಾಗೂ ರೋಸಿಗೆ ಕರೆ ಮಾಡಿದೆ. ಬಳಿಕ, ಅವರು ಜನವರಿ 10, 2019ರಂದು ಎಲ್ಲ ಹಣ ವಾಪಸ್‌ ನೀಡುವುದಾಗಿ ಭರವಸೆ ನೀಡಿದ್ದರು. ಆದರೆ, ಅವರು ಹಣ ನೀಡದಿದ್ದಾಗ ಹಾಗೂ ಕರೆ ಸ್ವೀಕರಿಸುವುದನ್ನು ನಿಲ್ಲಿಸಿದಾಗ ಕುರಾರ್ ಪೊಲೀಸ್ ಠಾಣೆಗೆ ಫೆಬ್ರವರಿಯಲ್ಲಿ ದೂರು ನೀಡಿದ್ದರು. ನಂತರ ಮಾರ್ಚ್ 29, 2019ರಂದು ಪೊಲೀಸರು ಕೇಸ್‌ ದಾಖಲಿಸಿಕೊಂಡಿದ್ದಾರೆ.
ಈ ಸಂಬಂಧ ಮಾಹಿತಿ ನೀಡಿದ ಪೊಲೀಸರು, ”ನಾವು ಆರೋಪಿಗಳ ವಿರುದ್ಧ ಕೇಸ್‌ ದಾಖಲಿಸಿಕೊಂಡಿದ್ದು, 65ವರ್ಷದ ವ್ಯಕ್ತಿ ಕೊಟ್ಟ ಫೋನ್‌ ನಂಬರ್‌ಗಳು ಹಾಗೂ ಹಣ ಹಾಕಿದ ಬ್ಯಾಂಕ್‌ ಅಕೌಂಟ್‌ಗಳ ನಂಬರ್ ಆಧಾರದ ಮೇಲೆ ತನಿಖೆ ನಡೆಸುತ್ತಿದ್ದೇವೆ” ಎಂದೂ ಹೇಳಿದ್ದಾರೆ. ಅಲ್ಲದೆ, ”ಅಂತಹ ವೆಬ್‌ಸೈಟ್‌ಗಳಿಗೆ ಮೋಸ ಹೋಗಬೇಡಿ ಎಂದು ಜನರಿಗೆ ಮನವಿ ಮಾಡಿಕೊಳ್ಳುತ್ತೇವೆ” ಎಂದೂ ಕುರಾರ್ ಪೊಲೀಸ್ ಠಾಣೆಯ ಹಿರಿಯ ಇನ್ಸ್‌ಪೆಕ್ಟರ್ ಉದಯ್‌ಕುಮಾರ್ ರಾಜೇಶಿರ್ಕೆ ಎಚ್ಚರಿಕೆ ನೀಡಿದ್ದಾರೆ.
Comments are closed.