ಮುಂಬೈ(ಪಿಟಿಐ): ಸಾಮಾಜಿಕ ಕಾರ್ಯಕರ್ತ ಅಣ್ಣಾ ಹಜಾರೆ ತಮ್ಮ ಸ್ಕಾರ್ಪಿಯೊ ವಾಹನವನ್ನು ಹರಾಜಿನಲ್ಲಿ ಮಾರಾಟ ಮಾಡಿದ ತಿಂಗಳ ಬಳಿಕ ಹೊಸ ಇನ್ನೊವಾ ಕಾರನ್ನು ಖರೀದಿಸಿದ್ದಾರೆ.
ತಮ್ಮ ಹೊಸ ಟೊಯೊಟಾ ಇನ್ನೊವಾ ಕಾರಿನಲ್ಲಿ ಅಣ್ಣಾ ಅವರು ರಾಳೇಗಣ ಸಿದ್ಧಿಯಲ್ಲಿ ಗುರುವಾರ ಸುತ್ತಾಟ ನಡೆಸಿದರು. ಗ್ರಾಮದ ಜನರು ರಸ್ತೆಗಳಲ್ಲಿ ಗುಂಪು ಗೂಡಿ ಅಣ್ಣಾ ಅವರ ಹೊಸ ಕಾರಿನ ‘ಮೆರವಣಿಗೆ’ ವೀಕ್ಷಿಸಿದರು.
‘ಇನ್ನೊವಾ ಕಾರು ನಿನ್ನೆ ರಾಳೇಗಣ ಸಿದ್ಧಿಗೆ ಬಂತು. ಅಣ್ಣಾ ಹಜಾರೆ ಅವರಿಗೆ ಬೆನ್ನುನೋವಿರುವುದರಿಂದ ಅವರಿಗೆ ಹಿತವೆನಿಸುವ ಹಾಗೆ ಕಾರಿನ ಆಸನಗಳನ್ನು ಮರು ವಿನ್ಯಾಸ ಮಾಡಿಸಲಾಗಿದೆ’ ಎಂದು ಅಣ್ಣಾ ಅವರ ಸಹಾಯಕ ದತ್ತಾ ಅವಾರಿ ತಿಳಿಸಿದ್ದಾರೆ.
ಎಂಟು ವರ್ಷ ಹಳೆಯದಾಗಿದ್ದ ಸ್ಕಾರ್ಪಿಯೊ ವಾಹನವನ್ನು ಮೇ 17ರಂದು ನಡೆದ ಬಹಿರಂಗ ಹರಾಜಿನಲ್ಲಿ ₹ 9.11 ಲಕ್ಷಕ್ಕೆ ಮಾರಾಟ ಮಾಡಲಾಗಿತ್ತು. ಪ್ರವೀಣ ಅಲಿಯಾಸ್‌ ಅತುಲ್‌ ಲೋಖಂಡೆ ಎಂಬುವರು ಸ್ಕಾರ್ಪಿಯೊ ಕೊಂಡಿದ್ದರು.
