ಹೊಸದಿಲ್ಲಿ: ಸ್ಮಾರ್ಟ್ ಸಿಟಿಗಳ ನಾಮನಿರ್ದೇಶನದಲ್ಲಿ ದೊಡ್ಡ ರಾಜ್ಯವಾದ ಉತ್ತರಪ್ರದೇಶಕ್ಕೆ(13 ನಗರಗಳು) ಅಗ್ರಪಾಲು ಸಿಕ್ಕಿದೆ. ಅಲ್ಲದೇ, ಈ ರಾಜ್ಯವು ಅಮೃತ್‌ನಗರಗಳ ಅಭಿವೃದ್ಧಿಗಾಗಿ 54 ನಗರಗಳನ್ನು ನಾಮನಿರ್ದೇಶನ ಮಾಡುವ ಅವಕಾಶವನ್ನೂ ಹೊಂದಿದೆ. ತಮಿಳುನಾಡು ಮತ್ತು ಮಹಾರಾಷ್ಟ್ರ ರಾಜ್ಯಗಳು ನಂತರದ ಸ್ಥಾನದಲ್ಲಿವೆ.
ಕರ್ನಾಟಕದಂತೆಯೇ ಮೋದಿ ತವರು ರಾಜ್ಯ ಗುಜರಾತ್‌ನಲ್ಲೂ 6 ಸ್ಮಾರ್ಟ್ ಸಿಟಿಗಳು ಸೃಷ್ಟಿಯಾಗಲಿವೆ. 100 ಸ್ಮಾರ್ಟ್ ಸಿಟಿ ನಿರ್ಮಾಣದ ಗುರಿಯನ್ನು ಕೇಂದ್ರ ಸರಕಾರ ಹೊಂದಿದ್ದು, ಸ್ಮಾರ್ಟ್ ಸಿಟಿ ಅಭಿವೃದ್ಧಿಗೆ ನಗರಗಳನ್ನು ನಾಮನಿರ್ದೇಶನ ಮಾಡಲು ರಾಜ್ಯ ಮತ್ತು ಕೇಂದ್ರಾಡಳಿತ ಪ್ರದೇಶಗಳಿಗೆ ಸೂಚಿಸಲಾಗಿದೆ.
ಸ್ಮಾರ್ಟ್ ಸಿಟಿ ಜತೆಗೆ ಕೆಲವು ನಗರಗಳನ್ನು ಅಮೃತ್ ನಗರಗಳಾಗಿ ಅಟಲ್ ನಗರ ನವೀಕರಣ ಹಾಗೂ ಪುನಶ್ಚೇತನ ಯೋಜನೆಯನ್ವಯ(ಅಮೃತ್) ಅಭಿವೃದ್ಧಿ ಪಡಿಸಲೂ ಸರಕಾರ ಮುಂದಾಗಿದೆ. ಈ ಎರಡೂ ಯೋಜನೆಗಳಿಗೆ ಮೋದಿ ಅವರು ಜೂ.25ರಂದು ಚಾಲನೆ ನೀಡಲಿದ್ದಾರೆ.
12 ಸ್ಮಾರ್ಟ್ ಸಿಟಿ, 33 ಅಮೃತ್ ಸಿಟಿಗಳ ನಾಮನಿರ್ದೇಶನ ಮಾಡಲು ತಮಿಳುನಾಡಿಗೆ ಅವಕಾಶ ನೀಡಲಾಗಿತ್ತು. ಸ್ಮಾರ್ಟ್ ಸಿಟಿಗೆ 10 ನಗರಗಳನ್ನು ಮಹಾರಾಷ್ಟ್ರ ನಾಮನಿರ್ದೇಶನ ಮಾಡಿತ್ತು.
ನಾಮನಿರ್ದೇಶನದ ರಾಜ್ಯವಾರು ವಿವರ: * ಮಹಾರಾಷ್ಟ್ರದಲ್ಲಿ 37, ಗುಜರಾತ್‌ನಲ್ಲಿ 31 ಅಮೃತ್‌ನಗರಗಳ ಅಭಿವೃದ್ಧಿ * ಬಿಹಾರ, ಆಂಧ್ರಪ್ರದೇಶ, ಪಂಜಾಬ್‌ನಲ್ಲಿ ತಲಾ ಮೂರು ಸ್ಮಾರ್ಟ್ ಸಿಟಿಗಳು * ದಿಲ್ಲಿಯಲ್ಲಿ ತಲಾ ಒಂದೇ ಒಂದು ಸ್ಮಾರ್ಟ್ ಮತ್ತು ಅಮೃತ್ ಸಿಟಿ * ಪಶ್ಚಿಮ ಬಂಗಾಳ ಮತ್ತು ರಾಜಸ್ಥಾನದಲ್ಲಿ ತಲಾ ನಾಲ್ಕು ಸ್ಮಾರ್ಟ್ ಸಿಟಿಗಳು * ಆಂಧ್ರ ಪ್ರದೇಶದಲ್ಲಿ 31, ರಾಜಸ್ಥಾನಕ್ಕೆ 28, ಪಶ್ಚಿಮ ಬಂಗಾಳಕ್ಕೆ 27, ಬಿಹಾರಕ್ಕೆ 19 ಅಮೃತ ನಗರಗಳು * ಒಡಿಶಾ, ಹರಿಯಾಣಾ, ತೆಲಂಗಾಣ, ಛತ್ತೀಸ್‌ಗಢಕ್ಕೆ ಎರಡು ಸ್ಮಾರ್ಟ್ ಸಿಟಿಗಳು * ಜಮ್ಮು ಮತ್ತು ಕಾಶ್ಮೀರ, ಕೇರಳ, ಜಾರ್ಖಂಡ್, ಅಸ್ಸಾಂ, ಹಿಮಾಚಲ, ಗೋವಾ, ಅರುಣಾಚಲ, ಚಂಡೀಗಢಕ್ಕೆ ಒಂದು ಸ್ಮಾರ್ಟ್ ಸಿಟಿಯಷ್ಟೆ ಲಭ್ಯ.
ಸ್ಮಾರ್ಟ್ ಸಿಟಿ ವರ್ಸಸ್ ಅಮೃತ್ ಸಿಟಿ ರಸ್ತೆ, ನೀರು, ಆಸ್ಪತ್ರೆ , ಶೌಚಾಲಯ ಸೇರಿ ನಾಗರಿಕರಿಗೆ ಜಾಗತಿಕ ದರ್ಜೆಯ ಮೂಲಭೂತ ಸೌಕರ‌್ಯಗಳನ್ನು ನೀಡುವ ಮೂಲಕ ಜೀವನ ಮಟ್ಟ ಸುಧಾರಣೆ ಸ್ಮಾರ್ಟ್ ಅಥವಾ ಅಮೃತ್ ಸಿಟಿಗಳ ಮುಖ್ಯ ಗುರಿ. ಈ ನಗರಗಳಲ್ಲಿ ಪ್ರತಿಯೊಂದೂ ಗಣಕಯಂತ್ರದ ಮೂಲಕ ನಡೆಯುತ್ತದೆ; ಅಂದರೆ ಇಲ್ಲಿ ಇ-ಆಡಳಿತ ಜಾರಿಯಲ್ಲಿರುತ್ತದೆ. ಡಿಜಿಟಲ್ ತಂತ್ರಜ್ಞಾನದ ಮೂಲಕ ಜನಜೀವನ ನಡೆಯುತ್ತದೆ. ಈ ಮೂಲಕ ಜೀವನವನ್ನು ಆಧುನಿಕ, ಸರಳ ಹಾಗೂ ಉತ್ತಮ ಮಾಡುವುದಷ್ಟೇ ಅಲ್ಲ, ಬರಿದಾಗುತ್ತಿರುವ ನೈಸರ್ಗಿಕ ಸಂಪನ್ಮೂಲಗಳನ್ನು ಮಿತವಾಗಿ, ದಕ್ಷವಾಗಿ ಬಳಸಿಕೊಳ್ಳುವ ಉದ್ದೇಶ ಈ ಯೋಜನೆಯಲ್ಲಿ ಅಡಗಿದೆ.
10 ಲಕ್ಷಕ್ಕೂ ಹೆಚ್ಚು ಜನಸಂಖ್ಯೆ ಇರುವ ನಗರಗಳಲ್ಲಿ ‘ಸ್ಮಾರ್ಟರ್ ಅನುಕೂಲ’ಗಳನ್ನು ಕಲ್ಪಿಸುವುದು ಸ್ಮಾರ್ಟ್ ನಗರ ಯೋಜನೆಯಾದರೆ, 1 ಲಕ್ಷ ಅಥವಾ ಅದಕ್ಕಿಂತ ಕೊಂಚ ಹೆಚ್ಚು ಜನರಿರುವ ಪುರ, ಪಟ್ಟಣಗಳಲ್ಲೂ ಆಧುನಿಕ ಸೌಲಭ್ಯ ಕಲ್ಪಿಸಿ ಸಂಪನ್ಮೂಲ ಉಳಿತಾಯ ಮಾಡುವುದು ಅಮೃತ್ ನಗರಗಳ ಉದ್ದೇಶ. ಸಾಮಾನ್ಯವಾಗಿ ಪ್ರವಾಸಿ ಸ್ಥಳ, ನದಿ ದಂಡೆ, ದ್ವೀಪ, ಬೆಟ್ಟಗುಡ್ಡ ಮುಂತಾದ ಕಡೆಯಲ್ಲಿರುವ ಸಣ್ಣ ಪುಟ್ಟ ಪಟ್ಟಣಗಳನ್ನೇ ಅಮೃತ್‌ನಗರಗಳಾಗಿ ಅಭಿವೃದ್ಧಿಪಡಿಸಲಾಗುತ್ತದೆ. ಕಾಲಕ್ರಮೇಣ ಅಮೃತ್ ನಗರಗಳು ಸ್ಮಾರ್ಟ್ ಸಿಟಿಗಳಾಗಿ ಬದಲಾಗಲಿವೆ.
