ಹಾಸನ: ಕೋಲಾರ, ಚಿಕ್ಕಬಳ್ಳಾಪುರ ಹಾಗೂ ಇತರ ಜಿಲ್ಲೆಗಳಿಗೆ ಕುಡಿಯುವ ನೀರು ಒದಗಿಸುವ ‘ಎತ್ತಿನಹೊಳೆ ಏತ ನೀರಾವರಿ ಯೋಜನೆ’ಗೆ ಸಂಬಂಧಿಸಿದಂತೆ ಜಲಸಂಪನ್ಮೂಲ ಸಚಿವ ಎಂ.ಬಿ. ಪಾಟೀಲ ಅಧ್ಯಕ್ಷತೆಯಲ್ಲಿ ಸೋಮವಾರ ಸಕಲೇಶಪುರದಲ್ಲಿ ಕರೆದಿದ್ದ ಜನಾಭಿಪ್ರಾಯ ಸಂಗ್ರಹ ಸಭೆಯಲ್ಲಿ ಸಚಿವರು ಆಡಿದ ಒಂದು ಮಾತು ಭಾರಿ ಕೋಲಾಹಲಕ್ಕೆ ಕಾರಣವಾಯಿತು.
ಸಭೆಯಲ್ಲಿ ಮಾತನಾಡಿದ ಮಲೆನಾಡು ಜನಪರ ಹೋರಾಟ ಸಮಿತಿ ಅಧ್ಯಕ್ಷ ಕಿಶೋರ್‌ ಕುಮಾರ್‌, ‘ಯಾರಿಗೂ ನೋಟಿಸ್‌ ನೀಡದೆ ಆಯೋಜಿಸಿದ್ದ ಈ ಸಭೆಯನ್ನು ಅಧಿಕೃತ ಜನಾಭಿಪ್ರಾಯ ಸಂಗ್ರಹ ಸಭೆ ಎಂದು ಒಪ್ಪಿಕೊಳ್ಳಲಾಗದು’ ಎಂದರು. ಜತೆಗೆ, ಬಂದಿದ್ದ ಜನಪ್ರತಿನಿಧಿಗಳು, ಸಂಘ–ಸಂಸ್ಥೆ ಪ್ರತಿನಿಧಿಗಳು ಹಾಗೂ ಪರಿಸರವಾದಿಗಳು ಸಹ ಸರ್ಕಾರದ ವಿರುದ್ಧ ಹರಿಹಾಯ್ದರು.
ಈ ಸಂದರ್ಭದಲ್ಲಿ ಪರಿಸರವಾದಿಗಳ ವಿರುದ್ಧ ಸಿಟ್ಟಾದ ಸಚಿವರು, ‘ಕಾನೂನು ಬೇರೆ, ಮಾನವೀಯತೆ ಬೇರೆ. ನಾವು ಮಾನವೀಯತೆ ನೆಲೆಯಲ್ಲಿ ಯೋಜನೆ ಕೈಗೆತ್ತಿಕೊಂಡಿದ್ದೇವೆ. ಪಶ್ಚಿಮಘಟ್ಟದಲ್ಲಿ ಅಭಿವೃದ್ಧಿ ಕಾಮಗಾರಿಯೇ ನಡೆಸಬಾರದು ಎಂದಾದರೆ ನೀವೇನು ಆದಿಮಾನವರಂತೆ ಬದುಕುತ್ತೀರಾ?’ ಎಂದು ಪ್ರಶ್ನಿಸಿದರು.
ಈ ಮಾತು ಸ್ಥಳೀಯರನ್ನು ಕೆರಳಿಸಿತು. ಸರ್ಕಾರದ ವಿರುದ್ಧ ಆಕ್ರೋಶ ಇದ್ದರೂ ಶಾಂತವಾಗಿ ಕುಳಿತಿದ್ದ ಜನರು ಸಚಿವರು ಆಡಿದ ಈ ಮಾತಿನ ನಂತರ ವೇದಿಕೆಯತ್ತ ಧಾವಿಸಿ ಮಾತಿನ ಚಕಮಕಿಗೆ ಇಳಿದರು. ‘ಧಮ್ಕಿ ಹಾಕಿ, ದಬ್ಬಾಳಿಕೆಯಿಂದ ನಮ್ಮನ್ನು ಆಳಬಹುದು ಎಂದು ಭಾವಿಸಬೇಡಿ. ನಾವು ಸುಮ್ಮನಿರುವವರಲ್ಲ’ ಎಂದು ಆಕ್ರೋಶ ವ್ಯಕ್ತಪಡಿಸಿದರು. ಅರ್ಧ ಗಂಟೆಗೂ ಹೆಚ್ಚು ಕಾಲ ಗದ್ದಲ ಮುಂದುವರಿಯಿತು. ಸ್ಥಳದಲ್ಲಿದ್ದ ಪೊಲೀಸರು ಜನರನ್ನು ನಿಯಂತ್ರಿಸಲು ಹರಸಾಹಸಪಟ್ಟರು.
ಯೋಜನೆಗೆ ವಿರೋಧ ವ್ಯಕ್ತಪಡಿಸಿದ ಜೀವ ವೈವಿಧ್ಯ ನಿರ್ವಹಣಾ ಸಮಿತಿಯ ಅಧ್ಯಕ್ಷ ಕಿಶೋರ್‌ಕುಮಾರ್‌, ‘ಯೋಜನೆಯ ಬಗ್ಗೆ ಸ್ಥಳೀಯರಿಗೆ ಯಾವುದೇ ಮಾಹಿತಿ ಕೊಟ್ಟಿಲ್ಲ, ಭೂಸ್ವಾಧೀನ ಮಾಡದೆಯೇ ಜನರ ಜಮೀನಿನಲ್ಲಿ ಅಧಿಕಾರಿಗಳು ಅಕ್ರಮ ಪ್ರವೇಶ ಮಾಡುತ್ತಿದ್ದಾರೆ. ಜಮೀನು ಸರ್ವೆ ನಡೆಸದೆ ಒತ್ತಾಯಪೂರ್ವಕವಾಗಿ ರೈತರಿಂದ ಒಪ್ಪಂದ ಪತ್ರಗಳಿಗೆ ಸಹಿ ಮಾಡಿಸುತ್ತಿದ್ದಾರೆ.
ಯೋಜನೆಗಾಗಿ ಭೂಮಿ ಕಳೆದುಕೊಳ್ಳುವವರಿಗೆ ಅಧಿಕೃತವಾಗಿ ನೋಟಿಸ್‌ ಕೊಡದಿದ್ದರೆ ಸಭೆಗೆ ಮಾನ್ಯತೆ ಬರುವುದು ಹೇಗೆ? ನಿಯಮದಂತೆ ನೋಟಿಸ್‌ ಕೊಟ್ಟು, ಸಭೆ ಆಯೋಜಿಸಿ ಅದರ ನಡಾವಳಿಗಳನ್ನು ದಾಖಲಿಸಬೇಕು. ವಿಡಿಯೊ ಚಿತ್ರೀಕರಣ ಆಗಬೇಕು. ಇಲ್ಲಿ ಯಾವುದೂ ನಡೆಯದಿರುವುದರಿಂದ ಇದು ಅಧಿಕೃತ ಸಭೆ ಎಂದು ಮಾನ್ಯ ಮಾಡಲು ಆಗುವುದಿಲ್ಲ’ ಎಂದರು.
‘ಸ್ಥಳೀಯರಿಗೆ ಮೂಲ ಸೌಲಭ್ಯ ನೀಡದೆ, ಇಲ್ಲಿಯ ನೀರನ್ನು ಬೇರೆಡೆಗೆ ಕೊಂಡೊಯ್ಯುವುದಾದರೆ ನಮ್ಮ ಶವಗಳನ್ನೂ ಒಯ್ಯಬೇಕಾಗುತ್ತದೆ’ ಎಂದು ಮಾಜಿ ಶಾಸಕ ಎಚ್‌.ಎಂ. ವಿಶ್ವನಾಥ್‌ ಹೇಳಿದರು. ಯೋಜನೆಯ ಪರವಾಗಿ ಮಾತನಾಡಿದ ಅರಸೀಕೆರೆ ಶಾಸಕ ಕೆ.ಎಂ. ಶಿವಲಿಂಗೇಗೌಡ ಅವರೂ ಸ್ಥಳೀಯರಿಂದ ವಿರೋಧ ಎದುರಿಸಬೇಕಾಗಿ ಬಂತು.
ಶಿವಲಿಂಗೇಗೌಡ ಸಭೆಯಿಂದ ಹೋದ ಬಳಿಕ ಮಾತನಾಡಿದ ಸಚಿವ ಪಾಟೀಲ, ‘ನಮ್ಮ ಉದ್ದೇಶ ಕೋಲಾರ ಮತ್ತು ಚಿಕ್ಕಬಳ್ಳಾಪುರಕ್ಕೆ ನೀರು ಕೊಡುವುದು. ನೀರು ಉಳಿದರೆ ಅರಸೀಕೆರೆಗೂ ಕೊಡುತ್ತೇವೆ. ಆದರೆ, ಆ ಬಗ್ಗೆ ಈಗಲೇ ಭರವಸೆ ಕೊಡಲಾಗದು’ ಎಂದರು.
‘ನೀವೇ ಚಿಕ್ಕಬಳ್ಳಾಪುರದಲ್ಲೋ, ಕೋಲಾರದಲ್ಲೋ ಹುಟ್ಟಿದ್ದರೆ ಏನು ಮಾಡುತ್ತಿದ್ದಿರಿ ಎಂಬುದನ್ನು ಒಂದು ಕ್ಷಣ ಚಿಂತಿಸಿ ನಿರ್ಧಾರ ಕೈಗೊಳ್ಳಿ. ಸಭೆ ಆಯೋಜಿಸಲು ತಡವಾಗಿದ್ದಕ್ಕೆ ಕ್ಷಮೆ ಯಾಚಿಸುತ್ತೇನೆ’ ಎಂದು ಸಭೆಯ ಆರಂಭದಲ್ಲೇ ಸಚಿವರು ಹೇಳಿದರೂ ಅವರ ಮಾತನ್ನು ಕೇಳುವ ಸ್ಥಿತಿಯಲ್ಲಿ ಸ್ಥಳೀಯರು ಇರಲಿಲ್ಲ.
ಸಭೆಯಲ್ಲಿದ್ದ ಕೆಲವರು ಆಕ್ರೋಶಭರಿತರಾಗಿ ಸರ್ಕಾರದ ವಿರುದ್ಧ ಹರಿಹಾಯ್ದರು. ಈ ಯೋಜನೆ ನಮ್ಮ ಬದುಕನ್ನು ಹಾಳು ಮಾಡುತ್ತದೆ. ಇದಕ್ಕೆ ನಮ್ಮ ವಿರೋಧವಿದೆ ಎಂದು ಒಕ್ಕೊರಲಿನಿಂದ ಹೇಳಿದರು. ಕೊನೆಗೆ, ‘ಶೀಘ್ರದಲ್ಲೇ ಅಧಿಕೃತವಾಗಿ ಎಲ್ಲರಿಗೂ ನೋಟಿಸ್‌ ಕೊಟ್ಟು ಇನ್ನೊಂದು ಸಭೆ ಆಯೋಜಿಸುತ್ತೇವೆ’ ಎಂದು ಸಚಿವ ಪಾಟೀಲ ಭರವಸೆ ನೀಡಿದರು.
