ಮೆಕ್ಸಿಕೋ: ತನ್ನ ಬಾಯ್ಫ್ರೆಂಡ್ ತಲೆಯನ್ನು ಪ್ಲಾಸ್ಟಿಕ್ ಬ್ಯಾಗ್ನಲ್ಲಿ ಇಟ್ಟುಕೊಂಡು ನಡೆದು ಹೋಗುತ್ತಿದ್ದ ಮಹಿಳೆಯೊಬ್ಬಳನ್ನು ಉದ್ರಿಕ್ತ ಗುಂಪೊಂದು ಹಿಡಿದು ಹಿಗ್ಗಾಮುಗ್ಗಾ ಥಳಿಸಿರುವ ಘಟನೆ ಕೇಂದ್ರ ಮೆಕ್ಸಿಕೋದಲ್ಲಿ ನಡೆದಿದೆ.
ಭೂತದ ವಿಚಿತ್ರ ಆಚರಣೆಯ ವೇಳೆ ತನ್ನ ತನ್ನ 70 ವರ್ಷದ ಹಿರಿಯ ಬಾಯ್ಫ್ರೆಂಡ್ ತಲೆಯನ್ನು ಮಹಿಳೆ ಕಡಿದಿದ್ದಾಳೆ ಎಂದು ತಿಳಿದುಬಂದಿದೆ. ಈ ಘಟನೆ ಅಮೆರಿಕದ ಮೆಕ್ಸಿಕೋ ರಾಜ್ಯದ ಸ್ಯಾಂಟಿಯಾಗೊ ಕ್ಯುಹ್ಟೆಂಕೊ ಎಂಬಲ್ಲಿ ನಡೆದಿದ್ದು, ಮಹಿಳೆ ಮೇಲೆ ಹಲ್ಲೆ ಮಾಡಿದ ಉದ್ರಿಕ್ತ ಗುಂಪನ್ನು ಪೊಲೀಸರು ಚದುರಿಸಿ ಆಕೆಯನ್ನು ರಕ್ಷಿಸಿದ್ದಾರೆ. ಮಹಿಳೆಯನ್ನು ವೆರೊನಿಕಾ ರಿವೆರಾ (35) ಎಂದು ಗುರುತಿಸಲಾಗಿದೆ.
ರಿವೆರಾ, ಮಚ್ಚು ಮತ್ತು ಚಾಕುವಿನಿಂದ ಬಾಯ್ಫ್ರೆಂಡ್ ಜಾರ್ಜ್ ರಾಮೋಸ್ ಎಂಬಾತನ ತಲೆಯನ್ನು ಕಡಿದಿದ್ದಾಳೆ. ಬಳಿಕ ತಲೆಯನ್ನು ಪ್ಲಾಸ್ಟಿಕ್ ಬ್ಯಾಗ್ನಲ್ಲಿ ಹಾಕಿಕೊಂಡು ಅಲ್ಲಿಂದ ಪರಾರಿಯಾಗಿದ್ದಾಳೆ. ಸ್ಯಾಂಟಿಯಾಗೊ ಕ್ಯುಹ್ಟೆಂಕೊ ನಗರವನ್ನೇ ತೊರೆಯಲು ಮುಂದಾಗಿದ್ದ ಆಕೆಯನ್ನು ಅಲ್ಲಿನ ನಿವಾಸಿಗಳು ತಡೆದು ಮಾತನಾಡಿಸಿದ್ದಾರೆ. ಒಂದಕ್ಕೊಂದು ಸಂಬಂಧವಿಲ್ಲದಂತೆ ಹಾಗೂ ಗಾಬರಿಯಿಂದ ಮಾತನಾಡಿದ ಆಕೆಯನ್ನು ಸಮಧಾನಪಡಿಸಲು ಕೆಲವರು ಮುಂದಾದಾಗ ಆಕೆ, ತಲೆ ಇದ್ದ ಪ್ಲಾಸ್ಟಿಕ್ ಬ್ಯಾಗ್ ಅನ್ನು ಕೆಳ ಬೀಸಾಡಿದ್ದಾಳೆ.
ಅನುಮಾನಗೊಂಡ ಸ್ಥಳೀಯರು ರಕ್ತಸಿಕ್ತ ಬ್ಯಾಗ್ ತೆರೆದು ನೋಡಿದಾಗ ಅದರಲ್ಲಿ ರಾಮೋಸ್ ತಲೆ ಇರುವುದನ್ನು ಕಂಡು ಬೆಚ್ಚಿಬಿದ್ದಿದ್ದಾರೆ. ಬಳಿಕ ಕೋಪಗೊಂಡು ರಿವೆರಾ ಮೇಲೆ ಮನಸೋ ಇಚ್ಛೆ ಥಳಿಸಿದ್ದಾರೆ. ಇದೇ ವೇಳೆ ಗಸ್ತು ತಿರುಗುತ್ತಿದ್ದ ಪೊಲೀಸರು ಗುಂಪಿನಿಂದ ರಿವೆರಾಳನ್ನು ರಕ್ಷಿಸಿದ್ದಾರೆ. ರಕ್ತದ ಮಡುವಿನಲ್ಲಿ ಬಿದ್ದಿದ್ದ ಆಕೆಯನ್ನು ತಕ್ಷಣ ಆಸ್ಪತ್ರೆಗೆ ದಾಖಲಿಸಿದ್ದಾರೆ.
ಇದರ ನಡುವೆ ರಾಮೋಸ್ ಮಗಳಾದ ಇಸಾಬೆಲ್ ಮತ್ತು ಕುಟುಂಬದ ಇತರೆ ಸದಸ್ಯರು ಪೊಲೀಸ್ ಠಾಣೆ ಮೆಟ್ಟಿಲೇರಿ, ದೂರು ದಾಖಲಿಸಿ, ರಿವೇರಾಳೇ ಕೊಲೆಗಾತಿ ಎಂದು ಆಪಾದಿಸಿದ್ದಾರೆ. ಕ್ರಮಕ್ಕಾಗಿ ಆಗ್ರಹಿಸಿದ್ದಾರೆ.
ಸದ್ಯ ಚಿಕಿತ್ಸೆ ಪಡೆಯುತ್ತಿರುವ ರಿವೇರಾ ಪೊಲೀಸ್ ಕಸ್ಟಡಿಯಲ್ಲಿದ್ದು, ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ತನಿಖೆ ಆರಂಭಿಸಿದ್ದಾರೆ. ರಾಮೋಸ್ ದೇಹದ ಭಾಗಗಳು ತುಂಬಿದ ಮೂರು ಪ್ಲಾಸ್ಟಿಕ್ ಬ್ಯಾಗ್ ಅನ್ನು ವಶಪಡಿಸಿಕೊಂಡಿದ್ದಾರೆ.
Comments are closed.