ಇಸ್ಲಾಮಾಬಾದ್: ಅಮೆರಿಕದ ಒತ್ತಡ ಹೆಚ್ಚಿದ್ದರಿಂದ ಪಾಕಿಸ್ತಾನ ಸರ್ಕಾರವು ಭಯೋತ್ಪಾದಕರ ವಿರುದ್ಧದ ತನ್ನ ನೀತಿಯಲ್ಲಿ ಆಮೂಲಾಗ್ರ ಬದಲಾವಣೆ ಮಾಡಿದ್ದು, 26/11ರ ಮುಂಬೈ ದಾಳಿ ಸಂಚುಕೋರ ಹಫೀಜ್ ಸಯೀದ್ ನೇತೃತ್ವದ ಜಮಾತ್- ಉದ್-ದಾವಾ (ಜೆಯುಡಿ), ತೀವ್ರ ಅಪಾಯಕಾರಿ ಎನಿಸಿದ ಹಖಾನಿ ಹಾಗೂ ಇತರ ಒಂಬತ್ತು ಉಗ್ರಗಾಮಿ ಸಂಘಟನೆಗಳನ್ನು ನಿಷೇಧಿಸಿ ಗುರುವಾರ ಆದೇಶ ಹೊರಡಿಸಿದೆ.
ಪೆಶಾವರ ಶಾಲೆಯ ಮೇಲೆ ತಾಲಿಬಾನ್ ಭಯೋತ್ಪಾದಕರು ದಾಳಿ ಮಾಡಿ 136 ಮಕ್ಕಳೂ ಸೇರಿದಂತೆ 150 ಜನರನ್ನು ಹತ್ಯೆ ಮಾಡಿದ ನಂತರ ಒಳ್ಳೆಯ ಮತ್ತು ಕೆಟ್ಟ ಉಗ್ರ ಸಂಘಟನೆ ಎಂಬ ನೆಪ ಹೂಡುತ್ತ ಕಾಲ ಕಳೆಯದೆ ಎಲ್ಲಾ ಭಯೋತ್ಪಾದಕ ಸಂಘಟನೆಗಳನ್ನು ನಿಷೇಧಿಸಬೇಕು ಎಂಬ ಒತ್ತಡಕ್ಕೆ ಪಾಕಿಸ್ತಾನ ಸರ್ಕಾರ ಕೊನೆಗೂ ಮಣಿದಿದೆ.
ಜೆಯುಡಿ ಮತ್ತು ಇತರ ಭಯೋತ್ಪಾದಕ ಉಗ್ರ ಸಂಘಟನೆಗಳನ್ನು ನಿಷೇಧಿಸುವ ನಿರ್ಧಾರವನ್ನು ಸರ್ಕಾರ ಕೆಲವು ದಿನಗಳ ಹಿಂದೆಯೇ ತೆಗೆದುಕೊಂಡಿದೆ. ನಿಷೇಧಾಜ್ಞೆಯನ್ನು ಯಾವ ರೀತಿ ಜಾರಿ ಮಾಡಬೇಕು ಎಂಬ ತೀರ್ಮಾನವನ್ನು ಆಂತರಿಕ ಭದ್ರತಾ ಸಚಿವಾಲಯಕ್ಕೆ ಬಿಟ್ಟಿದ್ದರಿಂದ ಈಗ ಅಧಿಕೃತವಾಗಿ ನಿಷೇಧ ಕ್ರಮವನ್ನು ಪ್ರಕಟಿಸಲಾಗುತ್ತಿದೆ ಎಂದು ಅಧಿಕೃತ ಮೂಲಗಳು ತಿಳಿಸಿವೆ.
ಸಯೀದ್ ನೇತೃತ್ವದ ಇನ್ನೊಂದು ಸಂಘಟನೆ ಫಲಾಹಿ ಇನ್ಸಾನಿಯತ್ ಪ್ರತಿಷ್ಠಾನವನ್ನೂ ನಿಷೇಧಿತ ಸಂಘಟನೆಗಳ ಪಟ್ಟಿಯಲ್ಲಿ ಸೇರಿಸಲಾಗಿದೆ. ಇದಲ್ಲದೆ, ಸಯೀದ್ ವಿದೇಶ ಪ್ರವಾಸವನ್ನೂ ನಿಷೇಧಿಸಲಾಗಿದೆ. ಹಖಾನಿ ಮತ್ತು ಜೆಯುಡಿ ನಿಷೇಧಿಸುವಂತೆ ಅಮೆರಿಕ ಮತ್ತು ಅಂತರರಾಷ್ಟ್ರೀಯ ಸಮುದಾಯ ಒತ್ತಡ ಹೇರುತ್ತಲೇ ಇದ್ದವು. ಆದರೆ ಪಾಕಿಸ್ತಾನ ಸರ್ಕಾರ ನೆಪಗಳನ್ನು ಹೇಳುತ್ತ ಕಾಲ ಕಳೆಯುತ್ತಿತ್ತು. ಈಗ ಅಮೆರಿಕ ಅಧ್ಯಕ್ಷ ಒಬಾಮ ಗಣರಾಜ್ಯೋತ್ಸವದ ಮುಖ್ಯ ಅತಿಥಿಯಾಗಿ ಭಾರತಕ್ಕೆ ಭೇಟಿ ನೀಡುತ್ತಿರುವುದರಿಂದ ತರಾತುರಿಯಿಂದ ಉಗ್ರ ಸಂಘಟನೆಗಳ ನಿಷೇಧ ಕ್ರಮವನ್ನು ಪ್ರಕಟಿಸಿದೆ ಎನ್ನಲಾಗಿದೆ.
ನಿಷೇಧಿತ ಇತರ ಭಯೋತ್ಪಾದಕ ಸಂಘಟನೆಗಳು: ಹರ್ಕತ್- ಉಲ್-ಜಿಹಾದ್ ಇಸ್ಲಾಮಿ, ಹರ್ಕತ್- ಉಲ್-ಮುಜಾಹಿದೀನ್, ಉಮ್ಮಾ ತಮೀರ್‌ – ಇ-ನಾವು, ಹಾಜಿ ಖೈರುಲ್ಲಾ ಹಜ್ಜಿ ಸತ್ತಾರ್ ವಿದೇಶಿ ವಿನಿಮಯ ಸಂಸ್ಥೆ, ರಹಾತ್ ಲಿಮಿಟೆಡ್ ಸಂಸ್ಥೆ, ರೋಷನ್ ವಿದೇಶಿ ವಿನಿಮಯ ಸಂಸ್ಥೆ, ಅಲ್‌-ಅಕ್ಬರ್ ಟ್ರಸ್ಟ್ ಮತ್ತು ಅಲ್‌-ರಷೀದ್ ಟ್ರಸ್ಟ್.
ನಿಷೇದಾಜ್ಞೆ ಜಾರಿ ಮಾಡಿದ ನಂತರ ಈ ಸಂಘಟನೆಗಳ ಚರ, ಸ್ಥಿರಾಸ್ತಿಗಳನ್ನು ಮುಟ್ಟುಗೋಲು ಹಾಕಿಕೊಳ್ಳಲಾಗಿದೆ. ಜೆಯುಡಿ ಮುಖಂಡರ ಹೆಸರುಗಳನ್ನು ‘ಬೇಕಾಗಿದ್ದಾರೆ’ ಪಟ್ಟಿಯಲ್ಲಿ ಸೇರಿಸಲಾಗುತ್ತಿದೆ. ಈಗಾಗಲೇ ವಿಶ್ವಸಂಸ್ಥೆಯ ಭದ್ರತಾ ಮಂಡಳಿ ಮತ್ತು ಅಮೆರಿಕವು ಅನೇಕ ಭಯೋತ್ಪಾದಕ ಸಂಘಟನೆಗಳ ಮುಖಂಡರುಗಳ ಹೆಸರುಗಳನ್ನು ‘ಬೇಕಾಗಿದ್ದಾರೆ’ ಪಟ್ಟಿಯಲ್ಲಿ ಸೇರಿಸಿವೆ.
ಜಲಾಲುದ್ದೀನ್ ಹಖಾನಿ ನೇತೃತ್ವದ ಹಖಾನಿ ಸಂಘಟನೆಯು 2008ರಲ್ಲಿ ಆಫ್ಘಾನಿಸ್ತಾನದಲ್ಲಿನ ಭಾರತೀಯ ರಾಯಭಾರ ಕಚೇರಿಯ ಮೇಲೆ ದಾಳಿ ನಡೆಸಿ 58 ಜನರನ್ನು ಹತ್ಯೆ ಮಾಡಿತ್ತು. ನಂತರ ಇದೇ ಸಂಘಟನೆ 2011ರಲ್ಲಿ ಕಾಬೂಲ್‌ನಲ್ಲಿರುವ ಅಮೆರಿಕ ರಾಯಭಾರ ಕಚೇರಿ ಮೇಲೆ ದಾಳಿ ನಡೆಸಿತ್ತು. ಈ ಸಂಘಟನೆಗೆ ಪಾಕಿಸ್ತಾನದ ಐಎಸ್‌ಐ ಬೆಂಬಲವಿದೆ ಎಂದು ಅಮೆರಿಕ ಮತ್ತು ಆಫ್ಘನ್‌ ಸರ್ಕಾರಗಳು ಆಪಾದಿಸಿದ್ದವು.
ಸರ್ಕಾರಕ್ಕೆ ಸುಪ್ರೀಂ ಕೋರ್ಟ್‌ ಸೂಚನೆ: ನಿಷೇಧಿಸಿದ ಎಲ್ಲ ಉಗ್ರಗಾಮಿ ಸಂಘಟನೆಗಳ ಹೆಸರುಗಳನ್ನು ಸಾರ್ವಜನಿಕರಿಗೆ ತಿಳಿಯುವಂತೆ ಬಹಿರಂಗಪಡಿಸಬೇಕು ಎಂದು ಪಾಕಿಸ್ತಾನದ ಸುಪ್ರೀಂಕೋರ್ಟ್‌ ಗುರುವಾರ ಸರ್ಕಾರಕ್ಕೆ ಸೂಚಿಸಿದೆ.
ಇದರಿಂದ ಈ ಸಂಘಟನೆಗಳಿಗೆ ಜನರು ದೇಣಿಗೆ ನೀಡುವುದನ್ನು ನಿಲ್ಲಿಸುವರು ಎಂದು ನ್ಯಾಯಮೂರ್ತಿ ಜವ್ವಾದ್‌ ಖ್ವಾಜಾ ತಮ್ಮ ಆದೇಶದಲ್ಲಿ ತಿಳಿಸಿದ್ದಾರೆ.
ಹಫೀಜ್ ಸಯೀದ್ ನೇತೃತ್ವದ ಜೆಯುಡಿ ಸೇರಿದಂತೆ ಹಲವು ಉಗ್ರಸಂಘಟನೆಗಳನ್ನು ಸರ್ಕಾರ ನಿಷೇಧಿಸಿದ ಬೆನ್ನಲ್ಲೇ ಈ ಆದೇಶ ನೀಡಿದ ನ್ಯಾಯಪೀಠವು, ಉಗ್ರರ ವಿರುದ್ಧ ಸರ್ಕಾರವು ಯುದ್ಧ ಸಾರಿರುವ ಸಂದರ್ಭದಲ್ಲಿ ಯಾವ ಉಗ್ರಗಾಮಿ ಸಂಘಟನೆಗಳನ್ನು ನಿಷೇಧಿಸಲಾಗಿದೆ ಎಂಬುದು ಜನತೆಗೆ ತಿಳಿಯಬೇಕು ಎಂದು ಹೇಳಿತು.
