ಹೊಸದಿಲ್ಲಿ: ರಾಜ್ಯದಲ್ಲಿ ಕ್ಯಾನ್ಸರ್‌ ಪ್ರಕರಣಗಳು ಗಣನೀಯ ಪ್ರಮಾಣದಲ್ಲಿ ಹೆಚ್ಚುತ್ತಿರುವ ಆತಂಕಕಾರಿ ಸಂಗತಿ 2019ರ ರಾಷ್ಟ್ರೀಯ ಆರೋಗ್ಯ ವಿವರ ವರದಿಯಲ್ಲಿ ಬಯಲಾಗಿದೆ. ಬಾಯಿ, ಗರ್ಭಕೋಶ ಮತ್ತು ಸ್ತನ ಕ್ಯಾನ್ಸರ್‌ನಂಥ ಸಾಮಾನ್ಯ ಕ್ಯಾನ್ಸರ್‌ ಪ್ರಕರಣಗಳ ಸಂಖ್ಯೆ ಕಳೆದ ಒಂದೇ ವರ್ಷದ ಅವಧಿಯಲ್ಲಿ ಆರು ಪಟ್ಟು ಹೆಚ್ಚಿದೆ. 2017ರಲ್ಲಿ ರಾಜ್ಯದಲ್ಲಿ 3,523 ಪ್ರಕರಣಗಳು ಪತ್ತೆಯಾಗಿದ್ದರೆ, 2018ರಲ್ಲಿ ಈ ಸಂಖ್ಯೆ 20,084ಕ್ಕೇರಿದೆ.
ಇಡೀ ದೇಶವನ್ನು ಗಮನಿಸಿದರೆ, ಕ್ಯಾನ್ಸರ್‌ ಕೇಸು ಹೆಚ್ಚಳ ಪ್ರಮಾಣ ಶೇಕಡಾ 300ರಷ್ಟಿದೆ. ಅಂದರೆ ಮೂರು ಪಟ್ಟು. ಕೇಂದ್ರ ಮತ್ತು ರಾಜ್ಯ ಸರಕಾರಗಳು ನಡೆಸುವ ಸಾಂಕ್ರಾಮಿಕವಲ್ಲದ ರೋಗಗಳ ತಪಾಸಣಾ ಕ್ಲಿನಿಕ್‌ಗಳಲ್ಲಿ ದಾಖಲಾದ ಅಂಕಿ ಅಂಶಗಳನ್ನು ಆಧರಿಸಿ ಈ ದತ್ತಾಂಶ ಬಿಡುಗಡೆ ಮಾಡಲಾಗಿದೆ. ಖಾಸಗಿ ಲ್ಯಾಬೊರೇಟರಿಗಳ ದತ್ತಾಂಶಗಳನ್ನು ಸೇರಿಸಿದರೆ ಈ ಪ್ರಮಾಣ ಇನ್ನಷ್ಟು ಹೆಚ್ಚುವ ಸಾಧ್ಯತೆಯೂ ಇದೆ.
2018ರಲ್ಲಿ ದೇಶದಲ್ಲಿ ಒಟ್ಟು 6.5 ಕೋಟಿ ಜನರು ಕ್ಯಾನ್ಸರ್‌ ತಪಾಸಣೆಗೆ ಒಳಗಾಗಿದ್ದು, ಅವರಲ್ಲಿ 1.6 ಕೋಟಿ ಜನರಿಗೆ ಕ್ಯಾನ್ಸರ್‌ ಇರುವುದು ಪತ್ತೆಯಾಗಿದೆ. 2017ರಲ್ಲಿ ಈ ಸಂಖ್ಯೆ ಕೇವಲ 39,635 ಇತ್ತು. ಕ್ಯಾನ್ಸರ್‌ ತಪಾಸಣೆಗೆ ಒಳಗಾದವರ ಸಂಖ್ಯೆಯೂ ದ್ವಿಗುಣಗೊಂಡಿದೆ. ಗುಜರಾತ್‌ನಲ್ಲಿ ಒಂದೇ ವರ್ಷದಲ್ಲಿ 68,230 ಹೊಸ ಪ್ರಕರಣಗಳು ಪತ್ತೆಯಾಗಿವೆ. ನಿಜವೆಂದರೆ, ಗುಜರಾತ್‌ನಲ್ಲಿ ತಪಾಸಣೆಗೆ ಒಳಗಾದವರ ಸಂಖ್ಯೆಯಲ್ಲಿ ಅಷ್ಟೇನೂ ಹೆಚ್ಚಳವಾಗಿಲ್ಲ.
ಕರ್ನಾಟಕ ನಂ.2: ಕ್ಯಾನ್ಸರ್‌ ಹೆಚ್ಚುತ್ತಿರುವ ರಾಜ್ಯಗಳ ಪಟ್ಟಿಯಲ್ಲಿ ಗುಜರಾತ್‌ ಬಳಿಕ ಕರ್ನಾಟಕ ಎರಡನೇ ಸ್ಥಾನದಲ್ಲಿದೆ. ಮಹಾರಾಷ್ಟ್ರ, ತೆಲಂಗಾಣ, ಪಶ್ಚಿಮ ಬಂಗಾಳ ಮುಂದಿನ ಸ್ಥಾನಗಳಲ್ಲಿವೆ. ಗುಜರಾತ್‌ನಲ್ಲಂತೂ ಏರಿಕೆ ಪ್ರಮಾಣ 18 ಪಟ್ಟು ಇದೆ.
ಕಾರಣಗಳೇನು?
ತಂಬಾಕು ಪದಾರ್ಥಗಳ ಸೇವನೆಯಿಂದ ಬಾಯಿ ಕ್ಯಾನ್ಸರ್‌
ಜಂಕ್‌ಫುಡ್‌ ಮತ್ತು ಜೀವನ ಶೈಲಿಯಿಂದ ಉಂಟಾಗುವ ಬೊಜ್ಜು
ಆಲ್ಕೋಹಾಲ್‌ ಸೇವನೆ ಕ್ಯಾನ್ಸರ್‌ಗೆ ಅವಕಾಶ ನೀಡಬಹುದು
ಕೆಲವು ಎಚ್ಚರಿಕೆ ಕ್ರಮಗಳು
ತಂಬಾಕು, ಮದ್ಯದಿಂದ ದೂರವಿದ್ದರೆ ಒಳಿತು
ಜಂಕ್‌ಫುಡ್‌ ಬೇಡ, ನಿಯಮಿತ ನಿದ್ದೆ, ವ್ಯಾಯಾಮ ಕಡ್ಡಾಯ
ಮಹಿಳೆಯರು ಹಾಲೂಡಿಸುವುದಕ್ಕೆ ಅಸಡ್ಡೆ ಮಾಡಬೇಡಿ
ಸಂಶಯ ಬಂದಾಗಲೇ ವೈದ್ಯರನ್ನು ಕಂಡರೆ ಉತ್ತಮ
Comments are closed.