ನವದೆಹಲಿ: ಇಂದು ಹಣಕಾಸು ರಾಜ್ಯ ಖಾತೆ ಸಚಿವ ಪಿಯೂಷ್ ಗೋಯೆಲ್ ಮಂಡಿಸಿದ ಬಜೆಟ್ ಬಗ್ಗೆ ಪ್ರತಿಕ್ರಿಯೆ ನೀಡುತ್ತಿದ್ದ ಕೇಂದ್ರದ ನಾಗರಿಕ ಮತ್ತು ವೈಮಾನಿಕ ಖಾತೆ ರಾಜ್ಯ ಸಚಿವ ಜಯಂತ್ ಸಿನ್ಹಾ ಅವರ ಹಿಂದೆ ನಿಂತಿದ್ದ ಹುಡುಗಿಯೊಬ್ಬಳು ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಸದ್ದು ಮಾಡುತ್ತಿದ್ದಾಳೆ.
ಬಜೆಟ್ ಸೆಷನ್ ಮುಗಿದ ಬಳಿಕ ಸಂಸತ್ನ ಎದುರು ಮಾಧ್ಯಮದವರು ಸಚಿವರು ಮತ್ತು ಸಂಸದರ ಪ್ರತಿಕ್ರಿಯೆಗಳನ್ನು ಪಡೆಯುತ್ತಿದ್ದರು. ಈ ವೇಳೆ ಸಚಿವ ಜಯಂತ್ ಸಿನ್ಹಾ ಕೂಡ ಮಾಧ್ಯಮಗಳಿಗೆ ಪ್ರತಿಕ್ರಿಯೆ ನೀಡಿದ್ದು, ಆ ವೇಳೆ ಹಿಂದೆ ನಿಂತಿದ್ದ ಹುಡುಗಿಯೊಬ್ಬಳು ನಾಲಿಗೆಯನ್ನು ಹೊರಹಾಕಿ ಕ್ಯಾಮೆರಾಗೆ ಫೋಸ್ ನೀಡಿದ್ದಾಳೆ. ಇದರಿಂದಾಗಿ ಜಯಂತ್ ಸಿನ್ಹಾ ಮಾತುಗಳಿಗಿಂತ ಎಲ್ಲರ ಗಮನ ಆಕೆಯ ಮೇಲೇ ಹೋಗುವಂತಿದ್ದು, ಆ ಹುಡುಗಿ ಯಾರೆಂಬುದು ಗೊತ್ತಾಗಿಲ್ಲ.
ಈ ವಿಡಿಯೋ ಈಗ ವೈರಲ್ ಆಗಿದ್ದು, ‘ಯಾರಿದು ಫೋಟೋಬಾಂಬ್?’ ಎಂದು ಸ್ಟೇಟಸ್ ಹಾಕಿಕೊಂಡು ಸಾವಿರಾರು ಜನರು ಟ್ವಿಟ್ಟರ್ನಲ್ಲಿ ಆ ವಿಡಿಯೋ ಶೇರ್ ಮಾಡಿದ್ದಾರೆ. ಮೋದಿ ಸರ್ಕಾರ ಉತ್ತಮ ಬಜೆಟ್ ನೀಡಿದೆ ಎಂದು ಅಭಿನಂದನೆ ಸಲ್ಲಿಸಿರುವ ಜಯಂತ್ ಸಿನ್ಹಾ ಅವರ ವಿಡಿಯೋದಲ್ಲಿನ ಈ ಹುಡುಗಿಯ ಫೋಟೋ ಈಗ ಟ್ರೋಲ್ ಆಗುತ್ತಿದೆ. ಆಕೆಯ ಮುಖ ಮಾತ್ರ ಕಾಣುತ್ತಿದ್ದು, ಸಚಿವರ ಹಿಂದೆ ನಗುತ್ತಾ ನಿಂತಿರುವ ಆಕೆ ಯಾರೆಂಬ ಬಗ್ಗೆ ಮಾಹಿತಿ ಸಿಕ್ಕಿಲ್ಲ. ಆದರೆ, ಆ ಹುಡುಗಿಯ ಕಾರಣಕ್ಕೆ ಈ ವಿಡಿಯೋ ಟ್ರೆಂಡ್ ಆಗಿದೆ.
Comments are closed.