ನವದೆಹಲಿ: ಕೆಲವೊಮ್ಮೆ ಸಣ್ಣಪುಟ್ಟ ನಿರ್ಲಕ್ಷ್ಯಗಳೂ ಜೀವಕ್ಕೇ ಕುತ್ತು ತಂದುಬಿಡುತ್ತವೆ. ಹಣೆಬರಹ ಸರಿಯಿಲ್ಲದಿದ್ದರೆ ಕುತ್ತಿಗೆಗೆ ಹಾಕಿಕೊಳ್ಳುವ ಟೈ ಕೂಡ ಉರುಳಾಗಿ ಪರಿಣಮಿಸುತ್ತದೆ. ದೆಹಲಿಯ ಈ ಭೂಪನದ್ದೂ ಅದೇ ಕತೆ.
ದೆಹಲಿಯ ಚಳಿಯಲ್ಲಿ ಬೆಳಗ್ಗೆ ಏಳುವುದೇ ದೊಡ್ಡ ಸಾಹಸ. ನಿದ್ದೆಗಣ್ಣಿನಲ್ಲಿ ಎದ್ದು, ಮನಸಿಲ್ಲದಿದ್ದರೂ ಬ್ರಶ್ ಮಾಡಿ, ಸ್ನಾನ ಮಾಡಬೇಕಾದ ಅನಿವಾರ್ಯತೆ. ದೆಹಲಿಯ ಸೀಮಾಪುರಿಯಲ್ಲಿ ನೆಲೆಸಿರುವ ಅವಿದ್ ಎಂಬ ವ್ಯಕ್ತಿ ಬೆಳಗ್ಗೆ ಬ್ರಶ್ ಮಾಡಿದ ನಂತರ ಅದರ ಹಿಂಭಾಗದಿಂದ ನಾಲಿಗೆಯನ್ನು ಸ್ವಚ್ಛಗೊಳಿಸಿಕೊಳ್ಳುತ್ತಿದ್ದ. ಅದೇನಾಯಿತೋ ಗೊತ್ತಿಲ್ಲ.. ಇದ್ದಕ್ಕಿದ್ದಂತೆ ಗಂಟಲೊಳಗೆ ಇಳಿದ ಬ್ರಶ್ ಹೊರಬರಲೇ ಇಲ್ಲ!
36 ವರ್ಷ ವಯಸ್ಸಿನ ಅವಿದ್ ಬ್ರಶ್ ಮಾಡುವಾಗ ಟೂತ್ಬ್ರಶ್ ನುಂಗಿದ ಬಗ್ಗೆ ಮೊದಲು ಯಾರ ಬಳಿಯೂ ಹೇಳಿರಲಿಲ್ಲ. ಆದರೆ, ಮಾರನೇ ದಿನ ಎದ್ದಾಗ ಹೊಟ್ಟೆಯಲ್ಲಿ ವಿಪರೀತ ನೋವು ಕಾಣಿಸಿಕೊಂಡ ಕಾರಣ ಆತನನ್ನು ಆಸ್ಪತ್ರೆಗೆ ಸೇರಿಸಲಾಯಿತು. ನಾಲಿಗೆಯನ್ನು ಸ್ವಚ್ಛಗೊಳಿಸಿದ ನಂತರ ಗಂಟಲ ಬಳಿ ಸ್ವಚ್ಛಗೊಳಿಸುವಾಗ 12 ಸೆ.ಮೀ. ಉದ್ದದ ಬ್ರಶ್ ಗಂಟಲಿನ ಒಳಗೆ ಇಳಿದಿತ್ತು. ಖಾಸಗಿ ಆಸ್ಪತ್ರೆಯಿಂದ ಅವಿದ್ನನ್ನು ಎಐಐಎಂಎಸ್ ಆಸ್ಪತ್ರೆಗೆ ಸೇರಿಸಲಾಯಿತು.
ಆಗ ಕೂಡ ವೈದ್ಯರ ಬಳಿ ತಾನು ಟೂತ್ಬ್ರಶ್ ನುಂಗಿರುವ ವಿಷಯವನ್ನು ಅವಿದ್ ಹೇಳಿಕೊಂಡಿಲ್ಲ. ಹೀಗಾಗಿ, ವೈದ್ಯರು ಪೇನ್ ಕಿಲ್ಲರ್ ಮಾತ್ರೆಗಳನ್ನು ಕೊಟ್ಟು ಆತನ ನೋವನ್ನು ಕಡಿಮೆಗೊಳಿಸಲು ಪ್ರಯತ್ನಿಸಿದರು. ಆದರೆ, ಅದರಿಂದ ಯಾವ ಪ್ರಯೋಜನವೂ ಆಗಲಿಲ್ಲ. ನಂತರ ಎಕ್ಸ್ರೇ ಮತ್ತು ಎದೆಯ ಸಿಟಿ ಸ್ಕ್ಯಾನ್ ಮಾಡಿದರೂ ಹೊಟ್ಟೆನೋವಿನ ಕಾರಣ ತಿಳಿಯಲಿಲ್ಲ. ಆಮೇಲೆ ಅಬ್ಡೋಮೆನ್ (ಹೊಟ್ಟೆ) ಭಾಗದ ಸಿಟಿ ಸ್ಕ್ಯಾನಿಂಗ್ ಮಾಡಿದಾಗ ಯಾವುದೋ ವಸ್ತು ಇರುವುದು ಪತ್ತೆಯಾಯಿತು. ಆಗ ಅವಿದ್ ತಾನು ಆಕಸ್ಮಿಕವಾಗಿ ಟೂತ್ ಬ್ರಶ್ ನುಂಗಿರುವ ವಿಷಯವನ್ನು ಹೇಳಿದ್ದಾನೆ.
ಆ ಬ್ರಶ್ನಿಂದ ಜೀರ್ಣಾಂಗಕ್ಕೆ ಏನಾದರೂ ಹಾನಿಯಾಗಿದೆಯಾ ಎಂದು ಪರಿಶೀಲಿಸಲಾಯಿತು. ಆದರೆ, ಅಬ್ಡಾಮೆನ್ ಭಾಗದಲ್ಲಿ ಆ ಬ್ರಶ್ ಸಿಲುಕಿಕೊಂಡಿದ್ದರಿಂದ ಅದರಿಂದ ಬೇರಾವ ಭಾಗಕ್ಕೂ ತೊಂದರೆ ಆಗಿಲ್ಲ ಎಂಬುದು ಗೊತ್ತಾಯಿತು. ಹೀಗಾಗಿ, ಆಪರೇಷನ್ ಮಾಡದೆ ಎಂಡೋಸ್ಕೋಪಿ ಮೂಲಕ ಆ ಬ್ರಶ್ ಅನ್ನು ಹೊರತೆಗೆಯಲಾಯಿತು ಎಂದು ಎಐಐಎಂಎಸ್ನ ತುರ್ತು ವೈದ್ಯಕೀಯ ವಿಭಾಗದ ಮುಖ್ಯಸ್ಥ ಡಾ. ಪ್ರವೀಣ್ ಅಗರವಾಲ್ ತಿಳಿಸಿದ್ದಾರೆ.
Comments are closed.