ಕೆಲವು ತಿಂಗಳ ಹಿಂದೆ ಭಾರತದ ಅತಿದೊಡ್ಡ ಪೆಟ್ರೋಲಿಯಂ ಕಂಪೆನಿ ಇಂಡಿಯನ್ ಆಯಿಲ್ ಕಾರ್ಪೊರೇಷನ್ ಪೆಟ್ರೋಲಿಯಂ ತೈಲಗಳ ಹೋಮ್ ಡೆಲಿವರಿ ಸೇವೆಯ ಪ್ರಸ್ತಾವನೆಯನ್ನು ಕೇಂದ್ರ ಸರ್ಕಾರದ ಮುಂದಿಟ್ಟಿತ್ತು. ಈ ಪ್ರಸ್ತಾವನೆಗೆ ಅನುಮೋದನೆ ದೊರೆತಿದ್ದು, ಅದರಂತೆ ಈಗ ಪುಣೆ ಮತ್ತು ಚೆನ್ನೈ ನಗರಗಳಲ್ಲಿ ಪೆಟ್ರೋಲ್ ಡೆಲಿವರಿ ಸೇವೆಯನ್ನು ಪ್ರಾರಂಭಿಸಿದೆ ಎಂದು ವರದಿಯಾಗಿದೆ.
ಈ ಸೇವೆಯನ್ನು ಡಿಸೇಲ್ ಡೆಲಿವರಿ ಮೂಲಕ ಆರಂಭಿಸಲಾಗಿದ್ದು, ಶೀಘ್ರದಲ್ಲೇ ದೇಶದ ಎಲ್ಲ ನಗರಗಳಿಗೂ ಹೊಸ ಯೋಜನೆ ವಿಸ್ತರಿಸಲಿದೆ ಎನ್ನಲಾಗಿದೆ. ಈ ಇಂಧನ ವಿತರಣಾ ಲಾರಿಯ ಫೋಟೋವೊಂದು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದು, ಇದರಿಂದ ಹೊಸ ಸೇವೆಯು ಸಾಕಷ್ಟು ಪ್ರಚಾರ ಕೂಡ ಗಿಟ್ಟಿಸಿಕೊಂಡಿದೆ.
ಈ ಡೆಲಿವರಿ ಟ್ಯಾಂಕರ್ ಲಾರಿಯಲ್ಲಿ ಪಂಪ್ ಅಳವಡಿಸಲಾಗಿದ್ದು, ಗ್ರಾಹಕರ ಕೋರಿಕೆಯ ಮೇರೆಗೆ ಇಂಧನವನ್ನು ವಿತರಿಸಲಿದೆ ಎನ್ನಲಾಗಿದೆ. ಇದರಿಂದ ಟ್ರಾನ್ಸ್ಪೋರ್ಟ್ ಸೇವೆಗಳನ್ನು ನೀಡುವ ಕಂಪೆನಿಗಳಿಗೆ ಹೆಚ್ಚು ಅನುಕೂಲ ಆಗಲಿದೆ. ಅಲ್ಲದೆ ಇದರಿಂದ ಬೇಡಿಕೆಗೆ ಅನುಗುಣವಾಗಿ ಮಾಲೀಕರು ತಮ್ಮ ವಾಹನಗಳಿಗೆ ಡಿಸೇಲ್ ಅಥವಾ ಪೆಟ್ರೋಲ್ಗಳನ್ನು ತುಂಬಿಸಿಕೊಳ್ಳಬಹುದಾಗಿದೆ.
ಅಷ್ಟೇ ಅಲ್ಲದೆ ದೂರ ಊರಿಗೆ ಕೂಡ ತೈಲ ಸೇವೆಯನ್ನು ಒದಗಿಸಲು ಇದರಿಂದ ನೆರವಾಗಲಿದ್ದು, ತುರ್ತು ಪರಿಸ್ಥಿತಿಯಂತಹ ಸಂದರ್ಭದಲ್ಲಿ ಈ ಸೇವೆಯ ಸದುಪಯೋಗ ಪಡೆದುಕೊಳ್ಳಬಹುದು. ಮೊಬೈಲ್ ಅಪ್ಲಿಕೇಶನ್ ಮೂಲಕ ಗ್ರಾಹಕರು ತೈಲದ ಡೆಲಿವರಿಗೆ ಮನವಿ ಸಲ್ಲಿಸಲು ವ್ಯವಸ್ಥೆ ಮಾಡಲಾಗಿದೆ. ಆದರೆ ಈ ಡೆಲಿವರಿಗಾಗಿ ಕನಿಷ್ಠ 200 ಲೀಟರ್ಗಳಷ್ಟು ಬೇಡಿಕೆಯನ್ನು ಸಲ್ಲಿಸಬೇಕಾಗುತ್ತದೆ. ಅಲ್ಲದೆ 2500 ಲೀಟರ್ವರೆಗೂ ತೈಲ ಡೆಲಿವರಿ ಸಿಗುತ್ತದೆ.
ಸದ್ಯ ಸಕಲ ಸುರಕ್ಷಾ ಮುನ್ನೆಚರಿಕೆಯೊಂದಿಗೆ ಡಿಸೇಲ್ ಡೆಲಿವರಿಗೆ ಇಂಡಿಯನ್ ಆಯಿಲ್ ಮುಂದಾಗಿದ್ದು, ಪೆಟ್ರೋಲ್ ವಿತರಣೆಯ ಬಗ್ಗೆ ಮತ್ತಷ್ಟು ಸುರಕ್ಷತೆಯ ಅಗತ್ಯತೆ ಇದೆ ಎಂದು ತಿಳಿಸಲಾಗಿದೆ. ಈ ಡೆಲಿವರಿ ವಾಹನದಲ್ಲಿ ಅಗ್ನಿ ಶಾಮಕ ಕಿಟ್, ಸುರಕ್ಷತಾ ಸಾಧನಗಳನ್ನು ಇರಿಸಲಾಗಿದೆ. ದೇಶದಲ್ಲಿ ಇದೇ ಮೊದಲ ಬಾರಿ ಡೆಲಿವರಿ ಯೋಜನೆಗೆ ಇಂಡಿಯನ್ ಆಯಿಲ್ ಕಾರ್ಪೊರೇಷನ್ನ ಕೈ ಹಾಕಿದ್ದು, ಯಾವ ರೀತಿಯಾಗಿ ಯಶಸ್ವಿಯಾಗಲಿದೆ ಎಂಬುದು ಮುಂದಿನ ದಿನಗಳಲ್ಲಿ ಗೊತ್ತಾಗಲಿದೆ.
Comments are closed.