ರಾಷ್ಟ್ರೀಯ

ಬಂಧಿತ 10 ಉಗ್ರರನ್ನು 12 ದಿನ ಎನ್‌ಐಎ ವಶಕ್ಕೆ ಒಪ್ಪಿಸಿದ ದಿಲ್ಲಿ ಕೋರ್ಟ್‌

Pinterest LinkedIn Tumblr


ಹೊಸದಿಲ್ಲಿ: ದೇಶದ ಪ್ರಮುಖ ಸ್ಥಳಗಳು ಹಾಗೂ ಗಣ್ಯ ವ್ಯಕ್ತಿಗಳ ಮೇಲೆ ದಾಳಿ ಸಂಚು ರೂಪಿಸಿದ್ದ ಆರೋಪದಡಿ ಬಂಧಿತರಾಗಿರುವ 10 ಉಗ್ರರನ್ನು ದಿಲ್ಲಿ ಕೋರ್ಟ್‌ ಗುರುವಾರ 12 ದಿನ ಎನ್‌ಐಎ (ರಾಷ್ಟ್ರೀಯ ತನಿಖಾ ದಳ) ವಶಕ್ಕೆ ಒಪ್ಪಿಸಿದೆ.

ಈ ಪೈಕಿ ಬಂಧಿತ 10 ಉಗ್ರರನ್ನು ಗುರುವಾರ ಬಿಗಿ ಭದ್ರತೆಯಲ್ಲಿ ಪಟಿಯಾಲ ಹೌಸ್‌ ಕೋರ್ಟ್‌ಗೆ ಹಾಜರುಪಡಿಸಿ, ಇವರೆಲ್ಲರೂ ಹೊಸ ವರ್ಷಾಚರಣೆ ಹಾಗೂ ಗಣರಾಜ್ಯೋತ್ಸವ ಸಮಾರಂಭದಲ್ಲಿ ದುಷ್ಕೃತ್ಯಗಳನ್ನು ನಡೆಸಲು ಸಂಚು ರೂಪಿಸಿದ್ದು, ಹೆಚ್ಚಿನ ವಿಚಾರಣೆಗಾಗಿ 15 ದಿನಗಳ ಕಾಲ ತನ್ನ ವಶಕ್ಕೆ ನೀಡಬೇಕೆಂದು ಎನ್‌ಐಎ ಮನವಿ ಮಾಡಿಕೊಂಡಿತು. ಇದಕ್ಕೆ ಆರೋಪಿಗಳ ಪರ ವಕೀಲ ಎಂ.ಎಸ್‌.ಖಾನ್‌ ಆಕ್ಷೇಪ ವ್ಯಕ್ತಪಡಿಸಿದರು. ಆದರೆ ರಹಸ್ಯ ವಿಚಾರಣೆ ನಡೆಸಿದ ಹೆಚ್ಚುವರಿ ಸೆಷನ್ಸ್‌ ನ್ಯಾಯಾಧೀಶ ಅಜಯ್‌ ಪಾಂಡೆ ಅವರು ಆರೋಪಿಗಳನ್ನು 12 ದಿನಗಳವರೆಗೆ ಎನ್‌ಐಎ ವಶಕ್ಕೆ ಒಪ್ಪಿಸಿ ಆದೇಶ ಹೊರಡಿಸಿದರು.

‘ಹರ್ಕಲ್‌ ಉಲ್‌ ಹರ್ಬ್‌ ಇ ಇಸ್ಲಾಂ’ ಗುಂಪಿಗೆ ಸೇರಿದ ಸದಸ್ಯರ ಚಲನ ವಲನಗಳ ಮೇಲೆ ಗಮನ ಕೇಂದ್ರೀಕರಿಸಿದ್ದ ಎನ್‌ಐಎ ಬುಧವಾರ ದಿಲ್ಲಿ, ಅಮರೋಹಾ, ಲಖನೌ, ಹಾಪುರ್‌ ಹಾಗೂ ಮೀರತ್‌ ಸೇರಿ 17 ಕಡೆ ಕಾರ್ಯಾಚರಣೆ ಶಂಕಿತ ಉಗ್ರರನ್ನು ವಶಕ್ಕೆ ಪಡೆದಿತ್ತು. ರಾಕೆಟ್‌ ಲಾಂಚರ್‌, ಆತ್ಮಹತ್ಯಾ ಬಾಂಬರ್‌ಗಳು ಬಳಸುವ ಉಡುಪು, 12 ದೇಸಿ ಪಿಸ್ತೂಲುಗಳು, ನೂರಾರು ಸುತ್ತು ಜೀವಂತ ಬುಲೆಟ್‌ಗಳು, ಟೈಮರ್‌ಗಳು, 100 ಮೊಬೈಲ್‌ ಮತ್ತು 135 ಸಿಮ್‌ ಕಾರ್ಡ್‌, ಬಾಂಬ್‌ ತಯಾರಿಕೆಗೆ ಬಳಸುವ 25 ಕೆ.ಜಿ ರಾಸಾಯನಿಕಗಳನ್ನು ವಶಪಡಿಸಿಕೊಂಡಿದೆ.

ಸರಕಾರದ ಮುಕ್ತ ಪ್ರಶಂಸೆ

ಎನ್‌ಐಎ ಅಧಿಕಾರಿಗಳ ಈ ಯಶಸ್ವಿ ಕಾರ್ಯಾಚರಣೆ ಬಗ್ಗೆ ಕೇಂದ್ರ ಸರಕಾರ ಮುಕ್ತ ಕಂಠದ ಪ್ರಶಂಸೆ ವ್ಯಕ್ತಪಡಿಸಿದೆ. ”ಖಾಸಗಿ ಕಂಪ್ಯೂಟರ್‌ಗಳ ಮೇಲೆ ತನಿಖಾ ಸಂಸ್ಥೆಗಳು ನಿಗಾ ಇರಿಸುವುದರಲ್ಲಿ ಯಾವ ತಪ್ಪೂ ಇಲ್ಲ. ಎನ್‌ಐಎ ಇಂತಹದ್ದೊಂದು ನಿಗಾ ಇರಿಸಿದ್ದರಿಂದಲೇ ಐಸಿಸ್‌ ಪ್ರೇರಿತ ಉಗ್ರರ ಬಂಧನ ಸಾಧ್ಯವಾಗಿದೆ. ಇದೊಂದು ದೊಡ್ಡ ಯಶಸ್ಸು ” ಎಂದು ವಿತ್ತ ಸಚಿವ ಅರುಣ್‌ ಜೇಟ್ಲಿ ಹೇಳಿದ್ದಾರೆ. ಈ ಮೂಲಕ ಸರಕಾರ, ಕಂಪ್ಯೂಟರ್‌ಗಳ ಮೇಲೆ ತನಿಖಾ ಸಂಸ್ಥೆಗಳು ನಿಗಾ ಇರಿಸಲು ಅನುಮತಿ ನೀಡಿದ್ದ ತನ್ನ ನಡೆಯನ್ನು ಸಮರ್ಥಿಸಿಕೊಂಡಿದೆ. ಕಾಂಗ್ರೆಸ್‌ ಈ ಅನುಮತಿ ವಿರುದ್ಧ ಚಕಾರ ಎತ್ತಿದೆ.
“ಸಂಭವಿಸಬಹುದಾಗಿದ್ದ ಬಹುದೊಡ್ಡ ಉಗ್ರ ದಾಳಿಯನ್ನು ಎನ್‌ಐಎ ವಿಫಲಗೊಳಿಸಿದೆ. ತನಿಖಾ ಸಂಸ್ಥೆಯ ಅಧಿಕಾರಿಗಳ ವೃತ್ತಿಪರತೆ ಪ್ರಶಂಸನೀಯ.”
–ರಾಜನಾಥ್‌ ಸಿಂಗ್‌, ಗೃಹ ಸಚಿವ

Comments are closed.