ರಾಷ್ಟ್ರೀಯ

ಜೆಟ್​ ಏರ್​ವೇಸ್​ನಲ್ಲಿ ಕ್ಯಾಬಿನ್​ ಒತ್ತಡ: ಶ್ರವಣ ಶಕ್ತಿ ಕಳೆದುಕೊಂಡ ಪ್ರಯಾಣಿಕ

Pinterest LinkedIn Tumblr


ನವದೆಹಲಿ: 2 ತಿಂಗಳ ಹಿಂದೆ ಮುಂಬೈ-ಜೈಪುರ ಮಾರ್ಗದ ಜೆಟ್​ ಏರ್​ವೇಸ್​ನಲ್ಲಿ ಕಾಣಿಸಿಕೊಂಡಿದ್ದ ಕ್ಯಾಬಿನ್​ ಒತ್ತಡದಿಂದ ಓರ್ವ ಪ್ರಯಾಣಿಕ ಶಾಶ್ವತವಾಗಿ ಶ್ರವಣ ಶಕ್ತಿಯನ್ನು ಕಳೆದುಕೊಂಡಿದ್ದಾರೆ.

ಸೆಪ್ಟೆಂಬರ್​ ತಿಂಗಳ 20ರಂದು ಜೆಟ್​ ಏರ್​ವೇಸ್​ನಲ್ಲಿ ಕಾಣಿಸಿಕೊಂಡ ತಾಂತ್ರಿಕ ದೋಷದಿಂದ ಕ್ಯಾಬಿನ್​ ಪ್ರೆಷರ್​ ಹೆಚ್ಚಾಗಿ ಪ್ರಯಾಣಿಕರ ಮೂಗು, ಕಿವಿಗಳಲ್ಲಿ ರಕ್ತ ಕಾಣಿಸಿಕೊಂಡಿತ್ತು. ಬಳಿಕ, ವಿಮಾನವನ್ನು ಕೆಳಗಿಳಿಸಿ ತುರ್ತು ಚಿಕಿತ್ಸೆ ನೀಡಲಾಗಿತ್ತು. ಆ ಘಟನೆಯ ಬಗ್ಗೆ ವಿಮಾನಯಾನ ಸಚಿವಾಲಯ ಸ್ಪಷ್ಟೀಕರಣ ಕೇಳಿತ್ತು. ಇದಾದ ನಂತರ, ಆ ದಿನ ವಿಮಾನದಲ್ಲಿ ಕಾರ್ಯನಿರ್ವಹಿಸುತ್ತಿದ್ದ ಸಿಬ್ಬಂದಿಯನ್ನು ಜೆಟ್​ ಏರ್​ವೇಸ್​ ವಜಾಗೊಳಿಸಿತ್ತು.

ಈ ವೇಳೆ ಪ್ರಯಾಣ ಮಾಡುತ್ತಿದ್ದ ಮುಖೇಶ್​ ಶರ್ಮ ಎಂಬ ಪ್ರಯಾಣಿಕನ ಕಿವಿಯಲ್ಲಿ ರಕ್ತ ಸುರಿದಿತ್ತು. ಬಳಿಕ, ಜೈಪುರ ಆಸ್ಪತ್ರೆಯಲ್ಲಿ ಅವರ ಕಿವಿಯನ್ನು ತಪಾಸಣೆ ನಡೆಸಲಾಗಿತ್ತು. ಆದರೆ, ಅದಾದ ನಂತರ ಆತ ಕೇಳುವ ಸಾಮರ್ಥ್ಯವನ್ನು ಕಳೆದುಕೊಂಡಿದ್ದಾರೆ.

ಸಂಸ್ಥೆಯೊಂದರಲ್ಲಿ ರಿಸರ್ಚ್​ ಸ್ಕಾಲರ್​ ಆಗಿ ಕೆಲಸ ಮಾಡುತ್ತಿದ್ದ ಶರ್ಮ 2 ತಿಂಗಳ ಹಿಂದೆ ಈ ಘಟನೆಯಾದ ನಂತರ ಕಿವಿಯಲ್ಲಿ ತೀವ್ರ ನೋವು ಕಾಣಿಸಿಕೊಂಡ ಹಿನ್ನೆಲೆಯಲ್ಲಿ ತಮ್ಮ ಕೆಲಸಕ್ಕೆ ರಾಜೀನಾಮೆ ನೀಡಿದ್ದರು. ಚಿಕಿತ್ಸೆಗೆಂದೇ 6 ಲಕ್ಷ ಖರ್ಚು ಮಾಡಿದ್ದರೂ ಶಾಶ್ವತವಾಗಿ ಶ್ರವಣ ಶಕ್ತಿಯನ್ನು ಕಳೆದುಕೊಂಡಿದ್ದಾರೆ.

ಇದೇ ವೇಳೆ ಪ್ರಯಾಣಿಸುತ್ತಿದ್ದ ಕೂಡ ಇದೇ ಸಮಸ್ಯೆ ಎದುರಾಗಿದ್ದು, ಗ್ರಾಹಕರ ನ್ಯಾಯಾಲಯದ ಮೊರೆ ಹೋಗಲು ನಿರ್ಧರಿಸಿದ್ದಾರೆ. ಜೆಟ್​ ಏರ್​ವೇಸ್​ ಸಿಬ್ಬಂದಿಯ ನಿರ್ಲಕ್ಷ್ಯದಿಂದ ಆತನ ಭವಿಷ್ಯವೇ ಹಾಳಾಗಿಹೋಯಿತು ಎಂದು ಕುಟುಂಬಸ್ಥರು ಆರೋಪಿಸಿದ್ದಾರೆ. ಚಿಕಿತ್ಸೆಗೆ ತಗುಲಿದ ವೆಚ್ಚದ ಬಿಲ್​ ನೀಡಿದರೂ ಜೆಟ್​ ಏರ್​ವೇಸ್​ ಯಾವುದೇ ಸ್ಪಂದನೆ ನೀಡದ ಕಾರಣ ಗ್ರಾಹಕ ನ್ಯಾಯಾಲಯದಲ್ಲಿ ನ್ಯಾಯ ಕೇಳಲು ಅವರು ಮುಂದಾಗಿದ್ದಾರೆ.

Comments are closed.