ಹೈದರಾಬಾದ್‌: ಉನ್ನತ ಅಧ್ಯಯನಕ್ಕೆಂದು ಲಂಡನ್‌ಗೆ ತೆರಳಿದ್ದ ಹೈದರಾಬಾದ್‌ ಮೂಲದ ರಮೇಶ್ ರಾಪರ್ತಿ ನಾಪತ್ತೆಯಾಗಿ ಮೂರು ವರ್ಷಗಳೇ ಕಳೆದಿವೆ. ಆದರೂ ಇದುವರೆಗೆ ಆತನ ಪತ್ತೆಯಿಲ್ಲ.
2010ರಲ್ಲಿ ಈತ ಲಂಡನ್‌ಗೆ ತೆರಳಿದ್ದ ಆದರೆ ಮೂರು ವರ್ಷಗಳ ಹಿಂದೆ ಈತ ನಾಪತ್ತೆಯಾಗಿದ್ದಾನೆ. ಆ ಬಳಿಕ ಕುಟುಂಬದವರ ಜತೆ ಈತನ ಸಂಪರ್ಕವಿಲ್ಲ.
ದೂರವಾಣಿ ಮೂಲಕ ಆತನನ್ನು ಸಂಪರ್ಕಿಸುವ ಕುಟುಂಬದವರ ಎಲ್ಲ ಪ್ರಯತ್ನಗಳು ವಿಫಲವಾಗಿವೆ. ಕರೀಂನಗರ ಜಿಲ್ಲೆಯ ಕಾಚರಂ ಗ್ರಾಮದ ನಿವಾಸಿಯಾಗಿರುವ ರಮೇಶ್ ರಾಪರ್ತಿ 2010ರಲ್ಲಿ ಲಂಡನ್‌ಗೆ ತೆರಳುವ ಮೊದಲ ಹೈದರಾಬಾದ್‌ನಲ್ಲಿ ಶಿಕ್ಷಣ ಪಡೆದಿದ್ದರು.
ದಾಖಲೆಗಳ ಪ್ರಕಾರ, ನ್ಯೂ ಪೋರ್ಟ್‌ನ ಯುನಿವರ್ಸಿಟಿ ಆಫ್ ವೇಲ್ಸ್‌ನಲ್ಲಿ ಎಂಬಿಎ ಅಧ್ಯಯನಕ್ಕೆ ಪ್ರವೇಶ ಪಡೆದಿದ್ದರು. ಅಡ್ಮಿಷನ್‌ ಪತ್ರ 2009ರ ಅಕ್ಟೋಬರ್‌ 29ರಂದು ರವಾನೆಯಾಗಿತ್ತು.
‘ನಂತರ ಕೆಲವು ವರ್ಷಗಳ ಕಾಲ ನಮ್ಮ ಜತೆ ಸಂಪರ್ಕದಲ್ಲಿದ್ದ. ಅಲ್ಲೇ ಉದ್ಯೋಗಕ್ಕೂ ಸೇರಿರುವುದಾಗಿ ಹೇಳಿದ್ದ’ ಎಂದು ಅವರ ತಂದೆ 68 ವರ್ಷದ ರಾಪರ್ತಿ ವೆಂಕಟಿ ಸಂಡೇ ಟೈಮ್ಸ್‌ ಆಫ್ ಇಂಡಿಯಾಗೆ ತಿಳಿಸಿದರು.
ಜಗಿತಿಯಾಲ್‌ ಪೊಲೀಸರ ಗಮನಕ್ಕೆ ಈ ವಿಚಾರವನ್ನು ತಂದಿರುವುದಾಗಿ ರಮೇಶ್ ಅವರ ತಾಯಿ ರಾಪರ್ತಿ ಬೊಮ್ಮಕ್ಕ ತಿಳಿಸಿದರು. ಮೂರು ವರ್ಷಗಳ ಹಿಂದೆ ರಮೇಶ್ ದೂರವಾಣಿ ಮೂಲಕ ತಮ್ಮ ಜತೆ ಮಾತಾಡಿದ್ದು ಅದೇ ಕೊನೆ. ನಂತರ ಸಂಪರ್ಕಕ್ಕೆ ಸಿಕ್ಕಿಲ್ಲ; ಆಗ ಹಣದ ಅವಶ್ಯಕತೆಯಿರುವುದಾಗಿ ತಿಳಿಸಿದ್ದ ಎಂದು ಬೊಮ್ಮಕ್ಕ ತಿಳಿಸಿದರು.
‘ಯಾವುದೋ ಸೇತುವೆಯ ಸಮೀಪದ ಮನೆಯಲ್ಲಿ ವಾಸಿಸುತ್ತಿರುವುದಾಗಿ ರಮೇಶ್ ನಮಗೆ ತಿಳಿಸಿದ್ದ’ ಎಂದು ತಂದೆ ವೆಂಕಟಿ ನೆನಪಿಸಿಕೊಂಡರು. ಮೂರು ಸೋದರರು ಮತ್ತು ಇಬ್ಬರು ಸೋದರಿಯರ ಪೈಕಿ ರಮೇಶ್ ಕೊನೆಯವರಾಗಿದ್ದರು.
‘2009ರ ನವೆಂಬರ್‌ 4ರಂದು ವೇಲ್ಸ್ ಯುನಿವರ್ಸಿಟಿಗೆ ತೆರಳುವುದಕ್ಕಾಗಿ ಆತನಿಗೆ ವೀಸಾ ನೀಡಲಾಗಿತ್ತು. 2011ರ ಡಿಸೆಂಬರ್‌ಗೆ ಅದರ ಅವಧಿ ಮುಗಿಯುವುದಿತ್ತು. ಆ ಬಳಿಕ ರಮೇಶ್ ಭಾರತಕ್ಕೆ ಹಿಂದಿರುಗಬೇಕಿತ್ತು. 2015ರ ವರೆಗೂ ಕುಟುಂಬದ ಜತೆ ಸಂಪರ್ಕದಲ್ಲಿದ್ದ. ಆದರೆ ನಂತರ ಯಾರ ಸಂಪರ್ಕಕ್ಕೂ ಸಿಗುತ್ತಿಲ್ಲ. ಆತನಿಗೆ ಏನಾಗಿದೆ ಎಂಬುದೇ ತಿಳಿಯುತ್ತಿಲ್ಲ ನಮ್ಮ ಮಗನನ್ನು ಪತ್ತೆ ಮಾಡಲು ನೆರವಾಗಿ’ ಎಂದು ತಂದೆ ವೆಂಕಟಿ ಮನವಿ ಮಾಡಿದರು.
Comments are closed.