ಬೆಂಗಳೂರು: ಕನ್ನಡ ಸಿನಿಮಾದ ಸಹ ನಟ ನಟಿಯರ ವೈಯುಕ್ತಿಕ ಬದುಕಿನ ರಾದ್ಧಾಂತಗಳು ಒಂದಾದ ಮೇಲೊಂದರಂತೆ ಪೊಲೀಸ್‌ ಠಾಣೆ ಮೆಟ್ಟಿಲೇರುತ್ತಿದ್ದು, ಈಗ 39 ವರ್ಷದ ಸಹನಟಿಯೊಬ್ಬರು 31 ವರ್ಷದ ಸಹನಟನೊಬ್ಬ ತನ್ನನ್ನು ವಿವಾಹವಾಗಿ ಸಂಸಾರ ನಡೆಸದೆ ಮೋಸ ಮಾಡಿದ್ದಾನೆ ಎಂದು ಆರೋಪಿಸಿ ಆರ್‌ಆರ್‌ ನಗರ ಠಾಣೆಗೆ ದೂರು ನೀಡಿದ್ದಾರೆ.
ರಾಧಿಕಾ ಶೆಟ್ಟಿ ದೂರು ನೀಡಿದವರಾಗಿದ್ದು, ಸಹನಟ ವಿ. ಅಮಿತ್‌ ಮೋಸ ಮಾಡಿದ್ದಾನೆ ಎಂದು ದೂರಿನಲ್ಲಿ ವಿವರಿಸಿದ್ದಾರೆ.ಇಬ್ಬರ ವಿರುದ್ಧವೂ ದೂರು ಪ್ರತಿದೂರು ದಾಖಲಾಗಿದೆ.
”ನಮಿತ ಐ ಲವ್‌ ಯು’ ಸಿನಿಮಾದಲ್ಲಿ ನಟಿಸುವ ವೇಳೆ ಪರಸ್ಪರ ಪರಿಚಯವಾಗಿತ್ತು. ತಾನು ವಿಧವೆ ಎನ್ನುವ ವಿಷಯ ಗೊತ್ತಿದ್ದ ಅಮಿತ್‌ ತನ್ನನ್ನು ಪ್ರೀತಿಸಿದ್ದ. ಆನಂತರ ನಾವು ಶಿವಮೊಗ್ಗ ಜಿಲೆಯ ಸಿಗಂದೂರು ದೇವಸ್ಥಾನದಲ್ಲಿ ಮದುವೆ ಕೂಡ ಮಾಡಿಕೊಂಡೆವು. ಅಮಿತ್‌ ತನ್ನ ಎರಡನೇ ಗಂಡ. 2013ರ ಮೇ ತಿಂಗಳಿನಲ್ಲೇ ನಮ್ಮ ಮದುವೆ ಆಗಿದೆ. ಮದುವೆಯ ದಾಖಲೆಗಳೂ ಇವೆ. ಆತ ಸಿಗಂದೂರಿಗೆ ಬಂದು ತನ್ನನ್ನು ಮದುವೆ ಆಗಿಲ್ಲ ಎಂದು ಪ್ರಮಾಣ ಮಾಡಲಿ ನಾನು ಅಲ್ಲೇ ಪ್ರಾಣ ಬಿಡುತ್ತೇನೆ,” ಎಂದು ರಾಧಿಕಾ ಶೆಟ್ಟಿ ಮಾಧ್ಯಮಕ್ಕೆ ತಿಳಿಸಿದ್ದಾರೆ.
ರಾಧಿಕಾ ಮಾತುಗಳನ್ನು ತಳ್ಳಿ ಹಾಕಿರುವ ಅಮಿತ್‌ ತಾಯಿ ಲತಾ, ”ನನ್ನ ಮಗನಿಗೆ ರಾಧಿಕಾ ಜತೆ ಮದುವೆ ಆಗಿಲ್ಲ. ಆಕೆ ಕೊಡುತ್ತಿದ್ದ ಮಾನಸಿಕ ಹಿಂಸೆ ಮತ್ತು ಬ್ಲ್ಯಾಕ್‌ಮೇಲ್‌ನಿಂದಾಗಿ ನನ್ನ ಮಗ ನವೆಂಬರ್‌ನಲ್ಲಿ ಮಾತ್ರೆ ಸೇವಿಸಿ ಆತ್ಮಹತ್ಯೆಗೂ ಯತ್ನಿಸಿದ್ದ,” ಎಂದು ಪೊಲೀಸರಿಗೆ ತಿಳಿಸಿದ್ದಾರೆ.
ಹಲ್ಲೆ ದೂರು: ”ತನಗೆ ಮೊದಲ ಪತಿಯಿಂದ ಎರಡು ಮಕ್ಕಳಿದ್ದಾರೆ ಎಂದು ಗೊತ್ತಿದ್ದೂ ಅಮಿತ್‌ ತನ್ನನ್ನು ಮದುವೆಯಾಗಿದ್ದ,” ಎಂದು ರಾಧಿಕಾ ಪೊಲೀಸರಿಗೆ ತಿಳಿಸಿದ್ದರೆ, ”ರಾಧಿಕಾ ಮತ್ತು ಅಮಿತ್‌ ನಡುವೆ ಸಿಲುಕಿ ನಾನು ನೆಮ್ಮದಿ ಕಳೆದುಕೊಂಡಿದ್ದೇನೆ,”ಎಂದು ರಾಧಿಕಾ ಮಗ ಆಶಿಕ್‌ ಪೊಲೀಸರಿಗೆ ಹೇಳಿದ್ದಾನೆ. ”ಡಿ.20 ರಂದು ಅಮಿತ್‌ ಮತ್ತು ಕುಟುಂಬದವರು ಸೇರಿ ತನ್ನ ಮೇಲೆ ಹಲ್ಲೆ ನಡೆಸಿದ್ದಾರೆ,” ಎಂದು ಆಶಿಕ್‌ ತಿಳಿಸಿದ್ದಾನೆ.
ಹಲ್ಲೆ ವಿಷಯ ನಿರಾಕರಿಸಿರುವ ಅಮಿತ್‌ನ ತಾಯಿ ”ರಾಧಿಕಾ ಮತ್ತು ಆಕೆಯ ಕಡೆಯವರು ಸೇರಿ ನನ್ನ ಮಗನ ಮೇಲೆ ಅವರ ಮನೆಯ ಸಮೀಪವೇ ಹಲ್ಲೆ ನಡೆಸಿದ್ದಾರೆ,” ಎಂದು ತಿಳಿಸಿದ್ದಾರೆ.
ಆರ್‌ಆರ್‌ ನಗರ ಠಾಣೆ ಪೊಲೀಸರು ದೂರು, ಪ್ರತಿದೂರು ದಾಖಲಿಸಿಕೊಂಡಿದ್ದು ಇದುವರೆಗೂ ಯಾರನ್ನೂ ವಶಕ್ಕೆ ಪಡೆದಿಲ್ಲ.
ಹಲವು ಪ್ರಕರಣ: ಕೆಲವು ದಿನಗಳ ಹಿಂದಷ್ಟೇ ‘ಹೊಂಬಣ್ಣ’ ಸಿನಿಮಾದ ನಟಿಯೊಬ್ಬರು ಸುಬ್ರಮಣ್ಯ ಎಂಬ ಸಹನಟ ತನ್ನ ಮೇಲೆ ಅತ್ಯಾಚಾರ ನಡೆಸಿದ್ದಾಗಿ ದೂರು ನೀಡಿದ್ದರು. ಇದಾಗಿ ಎರಡು ದಿನಗಳಲ್ಲಿ ಮತ್ತೊಬ್ಬ ನಾಯಕ ನಟಿಯೊಬ್ಬರು ತನ್ನ ಸಹನಟನೊಬ್ಬ ತಮ್ಮ ಚಾರಿತ್ರ್ಯದ ಕುರಿತು ಅವಾಚ್ಯವಾಗಿ ಎಸ್‌ಎಂಎಸ್‌ ಮಾಡಿದ್ದರ ವಿರುದ್ಧ ದೂರು ದಾಖಲಿಸಿದ್ದರು. ಈಗ ರಾಧಿಕಾ ಮತ್ತು ಅಮಿತ್‌ ಸಂಬಂಧ ಪೊಲೀಸ್‌ ಠಾಣೆ ಮೆಟ್ಟಿಲೇರಿದೆ.
Comments are closed.