ಬೆಂಗಳೂರು: ಭಾರತದಂತಹ ಸುಸಂಸ್ಕೃತ ಹಾಗೂ ಮಡಿವಂತಿಕೆಯ ದೇಶದಲ್ಲಿ ಸೆಕ್ಸ್ ಸಂಬಂಧಿತ ವಿಷಯಕ್ಕೆ ಸಾಕಷ್ಟು ಗೌಪ್ಯತೆಯಿದ್ದು, ಈ ಬಗ್ಗೆ ನಾಚಿಕೊಳ್ಳುವರೇ ಹೆಚ್ಚು. ಆದರೆ, ಆನ್ಲೈನ್ ಕಾಂಡೋಮ್ ಸ್ಟೋರ್ ಆರಂಭವಾಗುತ್ತಿದ್ದಂತೆ, ಭಾರತೀಯರು ಕೇವಲ 69 ದಿನಗಳಲ್ಲಿ 10 ಲಕ್ಷ ಕಾಂಡೋಮ್‌ಗಳನ್ನು ಆರ್ಡರ್ ಮಾಡಿದ್ದಾರಂತೆ! ಅದಲ್ಲಿಯೂ ಕರ್ನಾಟಕದ ಮಂದಿ ಹೆಚ್ಚು ಕಾಂಡೋಮ್ ಕೊಂಡಿದ್ದಾರಂತೆ!
ದೇಶದಲ್ಲಿ ಲೈಂಗಿಕ ವಿಷಯಕ್ಕೆ ಸಂಬಂಧಿಸಿದಂತೆ ಗೌಪ್ಯತೆ ಕಾಪಾಡಿಕೊಳ್ಳಲಾಗುತ್ತದೆ. ಈ ಬಗ್ಗೆ ಮುಕ್ತವಾಗಿ ಮಾತನಾಡುವುದೂ ತಪ್ಪೆಂಬ ಅಭಿಪ್ರಾಯ ಜನಮಾನಸದಲ್ಲಿದೆ. ಆದರೆ, ಲೈಂಗಿಕತೆ ಬಗ್ಗೆ ಜನರಿಗೆ ಆಸಕ್ತಿ ಇರುವುದು ಮಾತ್ರ ಸುಳ್ಳಲ್ಲ. ಅಂಗಡಿಗೇ ಹೋಗಿ ಕಾಂಡೋಮ್ ಕೊಳ್ಳೋದಕ್ಕೂ ಮುಜುಗರ ಪಟ್ಟಿಕೊಳ್ಳುವ ಜನರು, ಆನ್ಲೈನ್ ಮೂಲಕ ಖರೀದಿಸುತ್ತಿದ್ದಾರೆ.
ಏಪ್ರಿಲ್ 28ರಂದು ಏಡ್ಸ್ ಹೆಲ್ತ್‌ಕೇರ್ ಫೌಂಡೇಷನ್ ಆನ್ಲೈನ್ ಕಾಂಡೋಮ್ ಸ್ಟೋರ್ ಆರಂಭಿಸಿದ್ದು, ಮಾರಾಟಾವಾದ ಕಾಂಡೋಮ್‌ಗಳ ಅಂಕಿ ಅಂಶಗಳನ್ನು ಬಿಡುಗಡೆಗೊಳಿಸಿದೆ. ಈ ಸಂಸ್ಥೆ ಒಟ್ಟು 9.56 ಲಕ್ಷ ಕಾಂಡೋಮ್‌ಗಳನ್ನು ಉಚಿತವಾಗಿ ಪೂರೈಸಿದೆ. ಈ ಪೈಕಿ 5.14 ಲಕ್ಷ ಕಾಂಡೋಮ್‌ಗಳನ್ನು ವಿವಿಧ ಸಮುದಾಯ ಹಾಗೂ ಎನ್‌ಜಿಓಗಳು ಆರ್ಡರ್ ಮಾಡಿದ್ದರೆ, 4.41 ಲಕ್ಷ ಕಾಂಡೋಮ್‌ಗಳನ್ನು ವೈಯಕ್ತಿಕವಾಗಿ ಕೊಂಡಿದ್ದಾರೆ. ವಿಶೇಷವೆಂದರೆ, ವ್ಯಕ್ತಿಗತವಾಗಿ ಆರ್ಡರ್ ಮಾಡಿರುವವರ ಪೈಕಿ ಕರ್ನಾಟಕ ಹಾಗೂ ದಿಲ್ಲಿ ಅಗ್ರಸ್ಥಾನದಲ್ಲಿವೆ.
ಗುರಿ ತಲುಪಿದ ಕಾಂಡೋಮ್ ಮಾರಾಟ
ಸರಕಾರಿ ಸ್ವಾಮ್ಯದ ಹಿಂದುಸ್ಥಾನ ಲ್ಯಾಟಿಕ್ಸ್ ಲಿಮಿಟೆಡ್‌ (ಎಚ್‌ಎಲ್‌ಎಲ್) ಜೊತೆ ಏಡ್ಸ್ ಹೆಲ್ತ್‌ಕೇರ್ ಫೌಂಡೇಶನ್ ಪಾಲುದಾರಿಕೆ ಹೊಂದಿದ್ದು, ವಿಶೇಷ ಬ್ರ್ಯಾಂಡ್‌ಗಳ ಕಾಂಡೋಮ್ ತಯಾರಿಕೆಯಲ್ಲಿ ತೊಡಗಿದೆ.
ಏಡ್ಸ್ ಹೆಲ್ತ್‌ಕೇರ್ ಫೌಂಡೇಶನ್ ಆರಂಭಿಸಿದ ಆನ್ಲೈನ್ ಕಾಂಡೋಮ್ ಸ್ಟೋರ್‌ಗೆ ಬಂದಿರುವ ಪ್ರತಿಕ್ರಿಯೆ ಕಂಡು ಫೌಂಡೇಶನ್‌ನ ಭಾರತದ ಕಾರ್ಯಕ್ರಮ ನಿರ್ದೇಶಕ ಡಾ. ವಿ ಸ್ಯಾಮ್ ಪ್ರಸಾದ್ ಅವರು ಆಶ್ಚರ್ಯ ವ್ಯಕ್ತಪಡಿಸಿದ್ದಾರೆ. ’10 ಲಕ್ಷ ಕಾಂಡೋಮ್‌ಗಳ ಸಂಗ್ರಹ ಡಿಸೆಂಬರ್‌ ತನಕ ಸಾಗಬಹುದೆಂದು ಭಾವಿಸಿದ್ದೇವು. ಆದರೆ, ಜುಲೈ ಮೊದಲ ವಾರದಲ್ಲಿಯೇ ನಮ್ಮ ಗುರಿ ತಲುಪಿದ್ದೇವೆ. ಹಾಗಾಗಿ 20 ಲಕ್ಷ ಕಾಂಡೋಮ್‌ಗಳನ್ನು ಆರ್ಡರ್ ಮಾಡಲಾಗಿದ್ದು, ನವೆಂಬರ್ ಮೊದಲ ವಾರದಲ್ಲಿ ತಲುಪಿವೆ. ಜನವರಿಗಾಗಿ 50 ಲಕ್ಷ ಕಾಂಡೋಮ್‌ಗಳ ಆರ್ಡರ್ ಮಾಡಲಾಗುವುದು’ ಎಂದು ಪ್ರಸಾದ್ ತಿಳಿಸಿದ್ದಾರೆ.
Comments are closed.