ಅಹಮದಾಬಾದ್: ಗುಜರಾತ್ನಲ್ಲಿ ದೇಶದ ಮೊಟ್ಟ ಮೊದಲ ಏವಿಯೇಷನ್ ಪಾರ್ಕ್ ನಿರ್ಮಾಣ ಮಾಡಲು ಗುಜರಾತ್ ಸರ್ಕಾರ ತೀರ್ಮಾನಿಸಿದೆ. ಏವಿಯೇಷನ್ ಪಾರ್ಕ್ನಲ್ಲಿ ತರಬೇತಿ ಶಾಲೆ, ಹೆಲಿಪ್ಯಾಡ್ ಜತೆಗೆ ಸಣ್ಣ ಪ್ರಮಾಣದ ವಿಮಾನ ಸಂಬಂಧಿ ಭಾಗಗಳ ನಿರ್ಮಾಣ ಘಟಕ ಇರಲಿವೆ.
ಏವಿಯೇಶನ್ ಪಾರ್ಕ್ನಲ್ಲಿ ವಿಮಾನಯಾನ ವಲಯ ಕುರಿತು ವಿದ್ಯಾರ್ಥಿಗಳಿಗೆ, ವೃತ್ತಿಪರರು, ನೀತಿ ನಿರೂಪಕರು ಮತ್ತು ವ್ಯಾಪಾರಿಗಳ ಅರಿವು ಮೂಡಿಸುವ ಉದ್ದೇಶ ಹೊಂದಲಾಗಿದೆ ಎಂದು ಸರ್ಕಾರಿ ಸ್ವಾಮ್ಯದ ಗುಜರಾತ್ ರಾಜ್ಯ ವಿಮಾನಯಾನ ಮೂಲಸೌಕರ್ಯ ಅಭಿವೃದ್ಧಿ ಪ್ರಾಧಿಕಾರ(ಜಿಯುಜೆಎಸ್ಎಎಲ್)ದ ಅಧಿಕಾರಿಗಳು ತಿಳಿಸಿದ್ದಾರೆ.
ಅಹಮದಾಬಾದ್ನಿಂದ 30 ಕಿ.ಮೀ. ದೂರದಲ್ಲಿರುವ ಬಗೋಡ್ರಾ ಗ್ರಾಮದ ಬಳಿ ಏವಿಯೇಶನ್ ಪಾರ್ಕ್ ಸ್ಥಾಪನೆಯಾಗುತ್ತಿದ್ದು, ವಿಮಾನ ಬಿಡಿಭಾಗ ಉತ್ಪಾದನೆ ಮತ್ತು ಮಾನವ ಸಂಪನ್ಮೂಲ ಅಭಿವೃದ್ಧಿಗೆ ಪೂರಕವಾಗಿ ಕೆಲಸ ನಿರ್ವಹಿಸಲಿದೆ. ಪ್ರಪಂಚದಲ್ಲಿ ಇಂತಹ ಪಾರ್ಕ್ಗಳು ಕೇವಲ 3-4 ಮಾತ್ರ ಇದ್ದು, ಭಾರತದಲ್ಲಿ ಇದೇ ಮೊದಲ ಬಾರಿಗೆ ಏವಿಯೇಷನ್ ಪಾರ್ಕ್ ಸ್ಥಾಪಿಸಲಾಗುತ್ತಿದೆ ಎಂದು ಜಿಯುಜೆಎಸ್ಎಎಲ್ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ಅಜಯ್ ಚೌಹಾನ್ ತಿಳಿಸಿದರು.
ಪಾರ್ಕ್ಗಾಗಿ 60 ಹೆಕ್ಟೆರ್ ಜಾಗ ಗುರುತಿಸಿದ್ದು, ಪ್ರಸಕ್ತ ಆರ್ಥಿಕ ವರ್ಷದ ಅಂತ್ಯದ ವೇಳೆಗೆ ಯೋಜನೆ ಕಾರ್ಯರೂಪಕ್ಕೆ ಬರುವ ಸಾಧ್ಯತೆಯಿದೆ ಎಂದು ನಾಗರಿಕ ವಿಮಾನಯಾನ ಇಲಾಖೆ ನಿರ್ದೇಶಕ ಚೌಹಾನ್ ಹೇಳಿದ್ದಾರೆ.
