ಹೊಸದಿಲ್ಲಿ: ಕಳ್ಳಾಟದ ಕಳಂಕದಿಂದ ಅಮಾನತುಗೊಂಡಿರುವ ಎರಡು ತಂಡಗಳ ಜಾಗದಲ್ಲಿ ಹೊಸ ಪ್ರಾಂಚೈಸಿಗಳ ಖರೀದಿಗೆ ಇ-ಕಾಮರ್ಸ್‌ ದಿಗ್ಗಜ ಕಂಪನಿಗಳು ಆಸಕ್ತಿ ತೋರಿವೆ.
ಪ್ಲಿಪ್‌ಕಾರ್ಟ್‌, ಅಮೆಜಾನ್‌, ಸ್ನಾಪ್‌ಡೀಲ್‌, ಪೇಟಿಎಂ ಮುಂತಾದ ಸಂಸ್ಥೆಗಳು ಇಂಡಿಯನ್ ಪ್ರಿಮಿಯರ್‌ ಲೀಗ್‌ನಲ್ಲಿ ತಮ್ಮ ತಂಡ ಹೊಂದಲು ಬಯಸುತ್ತಿವೆ. ಈ ಮೂಲಕ ತಂಡ ಖರೀದಿಗೆ ಆಸಕ್ತ ಕಂಪನಿಗಳ ಸಂಖ್ಯೆ ಏರತೊಡಗಿದೆ.
ಐಪಿಎಲ್‌ನ ಚೆನ್ನೈ ಸೂಪರ್‌ ಕಿಂಗ್ಸ್‌ ಮತ್ತು ರಾಜಸ್ಥಾನ್ ರಾಯಲ್ಸ್‌ ಫ್ರಾಂಚೈಸಿಗಳನ್ನು ಎರಡು ವರ್ಷಗಳ ಕಾಲ ಅಮಾನತು ಮಾಡಿರುವ ಸುಪ್ರೀಂಕೋರ್ಟ್‌ ಪ್ಯಾನೆಲ್‌ ಕ್ರಮದಿಂದ ಇತರೆ ಕಂಪನಿಗಳಿಗೆ ಅವಕಾಶ ಹಾದಿ ತೆರೆದುಕೊಂಡಿದೆ. ಇದರಿಂದ ಹೊಸತಾಗಿ ಎರಡು ತಂಡಗಳಿಗೆ ಅವಕಾಶ ಲಭ್ಯವಾಗಲಿದೆ. ಒಂದೆಡೆ ಹೀರೋ ಮೋಟೊಕಾರ್ಪ್‌, ಜೆಎಸ್‌ಡಬ್ಲ್ಯು ಮುಂದಾದ ಕಂಪನಿಗಳು ಪ್ರಾಂಚೈಸಿ ಖರೀದಿಗೆ ಆಸಕ್ತಿ ಪ್ರದರ್ಶಿಸಿದ್ದರೆ, ಇನ್ನೊಂದೆಡೆ ಟಾಲಿವುಡ್‌ ನಟ ಮಹೇಶ್‌ ಬಾಬು ಸೇರಿದಂತೆ ಸಿನಿಮಾ ಮಂದಿ, ಸಜ್ಜನ್‌ ಜಿಂದಾಲ್‌ರಂಥ ಉದ್ಯಮಿಗಳು ಕೂಡ ತಮ್ಮದೇ ತಂಡ ಹೊಂದಲು ಬಯಸಿದ್ದಾರೆ.
ಬೆಟ್ಟಿಂಗ್ ಹಗರಣದಿಂದ ಎರಡು ತಂಡಗಳನ್ನು ಕಳೆದುಕೊಳ್ಳುವಂತಾಗಿ ಭಾರಿ ಪೆಟ್ಟು ತಿಂದಿರುವ ಇಂಡಿಯನ್ ಪ್ರೀಮಿಯರ್ ಲೀಗ್ ಟೂರ್ನಿ, ತನ್ನ 9ನೇ ಆವೃತ್ತಿಯಲ್ಲೂ ಕನಿಷ್ಠ 8 ತಂಡಗಳೊಂದಿಗೆ ಭರ್ಜರಿಯಾಗಿ ಮೂಡಿಬರಲಿದೆ ಎಂಬ ವಿಶ್ವಾಸವನ್ನು ಐಪಿಎಲ್ ಅಧ್ಯಕ್ಷ ರಾಜೀವ್ ಶುಕ್ಲಾ ವ್ಯಕ್ತಪಡಿಸಿರುವುದು ಆಸಕ್ತ ಕಂಪನಿಗಳಿಗೆ ಆಹ್ವಾನ ನೀಡಿದಂತಾಗಿದೆ.
