ಬಿಬಿಪುರ್‌: ಹರಿಯಾಣಾದ ಬಿಬಿಪುರದ ಗ್ರಾಮದ ಸರಪಂಚರ ‘ಮಗಳ ಜತೆ ಸೆಲ್ಫಿ’ ಅಭಿಯಾನಕ್ಕೆ ಪ್ರಧಾನಿ ನರೇಂದ್ರ ಮೋದಿ ಅವರಿಂದ ಮೆಚ್ಚುಗೆ ವ್ಯಕ್ತವಾದ ಬೆನ್ನಿಗೇ, ಗ್ರಾಮದ ಮನೆಗಳಲ್ಲೀಗ ಹೆಣ್ಣು ಮಕ್ಕಳ ಹೆಸರಿನ ನಾಮಫಲಕ ರಾರಾಜಿಸಿದೆ.
ಡಿಜಿಟಲ್‌ ಇಂಡಿಯಾ ಹಾಗೂ ಬೇಟಿ ಬಚಾವೋ ಆಂದೋಲನದ ಭಾಗವಾಗಿ ಗ್ರಾಮದಲ್ಲೀಗ ಎರಡು ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳಲಾಗಿದೆ.
ಪಂಚಾಯಿತಿ ಪ್ರತಿನಿಧಿಗಳು ಗ್ರಾಮದ ಪ್ರತಿ ಮನೆಗೂ ಭೇಟಿ ನೀಡಿ, ಮಗಳ ಹೆಸರಿನ ಫಲಕದಲ್ಲಿ ಆಕೆಯ ಇಮೇಲ್ ವಿಳಾಸ ಇರುವುದನ್ನು ಖಚಿತಪಡಿಸಿಕೊಳ್ಳುತ್ತಿದ್ದಾರೆ.
‘ಬಿಬಿಪುರ್‌ ಗ್ರಾಮದಲ್ಲಿ ಈಗ ಎರಡು ಕಾರ್ಯಕ್ರಮಗಳಿಗೆ ಚಾಲನೆ ದೊರೆತಿದೆ. ಮೊದಲನೆಯದು ಆಯ್ದ 30 ಮನೆಗಳಲ್ಲಿ ನಾಮಫಲಕ ಬದಲಿಸಲಿಸುವ ಜತೆಗೆ ಇಮೇಲ್ ಐಡಿ ನೀಡುವ ಕಾರ್ಯಕ್ರಮ ನಡೆದಿದೆ. ಬೇಟಿ ಬಚಾವೋ ಆಂದೋಲನದ ಐತಿಹಾಸಿಕ ಪ್ರಯತ್ನ ಇದಾಗಿದೆ. ನಾಮಫಲಕ ಬದಲಿಸಲು ತಗಲುವ ವೆಚ್ಚವನ್ನು ಪಂಚಾಯಿತಿಯೇ ಭರಿಸುವುದು,’ ಎಂದು ಸರಪಂಚ್‌ ಹೇಳಿದ್ದಾರೆ.
‘ಮಗಳ ಹೆಸರಿನ ನಾಮಫಲಕ ಹಾಕಿರುವುದು ಬಹಳ ಸಂತೋಷವಾಗಿದೆ.ಇದು ಮಹಿಳೆಯರ ಗೌರವ ಹೆಚ್ಚಿಸುತ್ತದೆ,’ಎಂದು ಗ್ರಾಮಸ್ಥರು ಹೇಳಿದ್ದಾರೆ.
