ಬಿಜೈ ಕಾಪಿಕಾಡ್ : ರಸ್ತೆಯಲ್ಲೇ ಹರಿಯುವ ಡ್ರೈನೇಜ್ ನೀರು – ಮನಪಾ ನಿರ್ಲಕ್ಷಕ್ಕೆ ಸ್ಥಳೀಯರ ಮೂಗು ಬಂದ್

ಮಂಗಳೂರು: ಅಭಿವೃದ್ಧಿ ಕಾಮಗಾರಿಗಳಿಂದ ಹಿಮ್ಮುಖವಾಗಿದೆ ಎಂಬ ಆರೋಪ ಎದುರಿಸುತ್ತಿರುವ ಮಂಗಳೂರು ಮಹಾನಗರಪಾಲಿಕೆ ನಗರದಲ್ಲಿ ಎಂತಹ ಗಂಭೀರ ಸಮಸ್ಯೆಗಳು ಉದ್ಭವಿಸಿದರೂ ನಿರ್ಲಿಪ್ತವಾಗಿ ಬಿಡುತ್ತದೆ ಎಂಬುದಕ್ಕೆ ಇಲ್ಲಿದೆ ಒಂದು ಉತ್ತಮ ಉದಾಹರಣೆ.

ನಗರದ ಬಿಜೈ ಕಾಪಿಕಾಡ್ ಮೊದಲ ಕ್ರಾಸ್ (ನೇತಾಜಿ ರಸ್ತೆ)ನ ರಸ್ತೆ ಪಕ್ಕದಲ್ಲಿದ್ದ ಡ್ರೈನೇಜ್ ಒಡೆದು ಹೋಗಿ ವಾರ ಕಳೆದರೂ ನಗರಪಾಲಿಕೆ ಮಾತ್ರ ಏನೂ ಆಗಿಲ್ಲ ಎಂಬಂತೆ ಕುಳಿತುಬಿಟ್ಟಿದೆ. ಈ ಬಗ್ಗೆ ಸ್ಥಳೀಯ ನಿವಾಸಿಗಳು ಹತ್ತು ಹಲವು ಬಾರಿ ನಗರಪಾಲಿಕೆಯ ಗಮನಕ್ಕೆ ತಂದರೂ ಸಂಬಂಧಪಟ್ಟವರು ಮಾತ್ರ ಈ ಬಗ್ಗೆ ತಲೆ ಕೆಡಿಸಿಕೊಂಡಿಲ್ಲ.

ಈ ರಸ್ತೆಯ ಡಾಮರ್ ಕಿತ್ತು ಹೋಗಿ ಸಂಚರಿಸಲು ಆಗದಂತಹ ಸಂದರ್ಭದಲ್ಲಿ ಸ್ಥಳೀಯರ ತೀವ್ರ ವಿರೋಧದ ಮಧ್ಯೆ ರಸ್ತೆಗೆ ತೇಪೆಯ ಕಾಮಗಾರಿ ನಡೆಸಲಾಯಿತು.ಕೊನೆಯ ಸುಮಾರು 50 ಮೀಟರಿನಷ್ಟು ರಸ್ತೆ ಬಹಳಷ್ಟು ಕಟ್ಟು ಹೋಗಿದ್ದ ಪರಿಣಾಮ(ಇಲ್ಲಿ ಪ್ರಭಾವಿ ವ್ಯಕ್ತಿಗಳಿದ್ದಾರೆ…!) ಕಾಂಕ್ರೀಟ್ ಹಾಕಲು ನಿರ್ಧರಿಸಲಾಗಿತ್ತು. 

ಅಂತೆಯೇ, ಒಂದು ವಾರದ ಹಿಂದೆ ಈ ರಸ್ತೆಯ ಕೊನೆಯ ಭಾಗವನ್ನು ಕಾಂಕ್ರೀಟೀಕರಣ ಮಾಡಲಾಯಿತು. ಈ ಸಂಧರ್ಭದಲ್ಲಿ ಗುತ್ತಿಗೆದಾರರ ದೊಡ್ಡ ದೊಡ್ಡ ಟಿಪ್ಪರ್ ಗಳು ಈ ರಸ್ತೆಯಲ್ಲಿ ಓಡಾಡಿ ಪಕ್ಕದಲ್ಲಿದ್ದ ಗ್ರೀನ್ ಹಿಲ್ ಅಪಾರ್ಟ್ ಮೆಂಟ್ ಬದಿಯ ಡ್ರೈನೇಜನ್ನು ಒಡೆದು ಹಾಕಿದವು. ಅಂದಿನಿಂದ ಈ ಡ್ರೈನೇಜ್ ಕೊಳಚೆ ರಸ್ತೆಯಲ್ಲೇ ಹರಿಯುತ್ತಿದೆ. ಇದರಿಂದಾಗಿ ಇಲ್ಲಿನ ನಿವಾಸಿಗಳು ಮೂಗು ಮುಚ್ಚಿಕೊಂಡ ಇರಬೇಕಾದಂತಹ ಪರಿಸ್ಥಿತಿ ಒದಗಿ ಬಂದಿದೆ.

ಇದನ್ನು ದುರಸ್ಥಿಗೊಳಿಸುವಂತೆ ನಗರಪಾಲಿಕೆಗೆ ಮನವಿ ಸಲ್ಲಿಸಿದರೂ ಇದುವರೆಗೂ ಯಾವುದೇ ಕ್ರಮ ಕೈಗೊಂಡಿಲ್ಲ. ಸ್ಥಳೀಯರಿಗೆ ಈ ವಾರ್ಡಿನ ಕಾರ್ಪೋರೇಟರ್ ಅಂತೂ ಇದ್ದಾರೋ, ಇಲ್ಲವೋ ಎಂಬುದೇ ತಿಳಿಯದಂತಾಗಿದೆ. ಈ ವಾರ್ಡಿನ ಬಹುತೇಕ ಚರಂಡಿಗಳ ನೀರು ರಸ್ತೆಯಲ್ಲೇ ಹರಿಯುವುದು ಸಾಮಾನ್ಯವಾಗಿ ಬಿಟ್ಟಿದೆ. ಆದರೂ ಇಲ್ಲಿನ ಕಾರ್ಪೋರೇಟರ್ ಮಾತ್ರ ಈ ಬಗ್ಗೆ ತಲೆ ಕೆಡಿಸಿಕೊಂಡಿಲ್ಲ.

ಸ್ಮಾರ್ಟ್ ಸಿಟಿ ಯೋಜನೆಯಡಿ ಆಯ್ಕೆಯಾಗಿರುವ ಮಂಗಳೂರು ನಗರ ಇದೇ ರೀತಿ ಮುಂದುವರಿದರೆ ಇಲ್ಲಿನ ಕಾರ್ಪೋರೇಟರ್ ಗಳು ಮಾತ್ರ ಖಂಡಿತವಾಗಿಯೂ ಮತ್ತಷ್ಟು `ಸ್ಮಾರ್ಟ್’ ಆಗುವುದರಲ್ಲಿ ಯಾವುದೇ ಸಂಶಯವಿಲ್ಲ…!